پاۋستوۆسكيدىڭ «التىن راۋشان» كىتابىنداعى بلوكقا قاتىستى ءبولىمى جوعارىداعىداي جولدارمەن باستالادى. ءيا, بلوك پوەزياسىندا جۇرەك تىنىشتىعى, جان تەرەڭىنىڭ ءىزى بار. پۋشكين ايتقانداي, «تەرەڭ سۋ جاي اعار, اسىل ادام سايابىر بولار». بىردە بلوك ماياكوۆسكيدىڭ مۋزەيدە وتكەن كەشىنە بارادى. سوندا مۋزەيدە ادام كول-كوسىر بولعان دەسەدى. كەيىن ءوزى ولەڭدەرىن وقىماققا ادەبي كەش جاسايدى, بەس-اق ادام كەلەدى. سودان بلوك ءۇنسىز عانا باس يزەپ, شاعىن ساحناعا شىعىپ ءبىر ساعاتتاي ولەڭ وقىعان ەكەن.
ء«تۇن, كوشە, ءدارىحانا, شامدار,
ماعىناسىز جارىق ءبىر كۇڭگىرت.
شيرەك عاسىر ءومىر ءالى الدار –
ءبارى دە سول عوي. سوڭى جوق تىرلىك.
ءولىپ — ءبارىن باستاپ قايتادان
باياعى كۇيدى قايتالاپ تاعى:
ءتۇن, ارنا سۋى مۇزداي شايقالعان
ءدارىحانا, كوشە, كۇپ-كۇڭگىرت شامى». (اۋدارعان – د.س.)
كەڭىنەن تانىمال ەكى شۋماقتان ءومىر اعىسىنىڭ ءمانسىزىن, جالعاننىڭ جارعا ايدالعان ارباداي وتكىنشى, ءتۇبى ويران ەكەنىن تۇسىنۋگە بولادى. بلوك ەشبىر ويدى اتتانداپ, نە كۇشەنشەكتىكپەن جەتكىزبەيدى. پافوس جەلى وعان قاس.
پاۋستوۆسكي بلوك تىنىشتىعىن وزىنشە سۋرەتتەيدى. «كۇز كۇنىندە قارا وزەننىڭ بەتىن قۇرعاق جاپىراقتار جاباتىن. جاعالاۋدان سوڭ قالانىڭ جۇمىسشىلار تۇراتىن قالاشىعى باستالادى. كاسىپورىندار, كەمە جوندەيتىن ورىندار, كەمە دىڭگەكتەرى, ءتۇتىن مەن كەش الدىنداعى بوزاڭ اسپان. بىراق جاعالاۋ بوس ءارى تىنىش, اۋىلدىڭ ەڭ تۇكپىرى وسى جەر ىسپەتتى. بۇل بلوك سەكىلدى وڭاشا, وعاش ورىن. مۇمكىن بلوك وسى تىنىشتىق پەن وزەنگە جاقىن ماڭدى ىزدەگەن بولار. ونىڭ جىرلارى ادام جۇرەگىنىڭ تىنىشتىعىنا شاقىرادى».
راسىندا, «دۇنيەدە باقىت جوق, تەك ەركىندىك پەن تىنىشتىق قانا بار». بۇل داۋسىز شىندىق.
