ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ مالىمەتىنشە, ءۇستىرت مەملەكەتتىك تابيعي قورىعى عىلىم, اقپارات جانە مونيتورينگ ءبولىمىنىڭ اعا عىلىمي قىزمەتكەرى ا.پۋلاتوۆ عىلىمي-زەرتتەۋ جۇمىستارى بارىسىندا قىزىل كىتاپقا ەنگەن «مايدا قاتىران» وسىمدىگىن كەزدەستىردى.
- مايدا قاتىران – سيرەك كەزدەسەتىن, تارالۋى شەكتەۋلى ءتۇر. تۇران پروۆينتسياسىنىڭ ەندەميگى, رەليكت ءتۇر. بۇل وسىمدىك تۇقىم ارقىلى كوبەيەدى. ءساۋىر-مامىر ايلارىندا گۇلدەپ, مامىر-ماۋسىمدا جەمىس بەرەدى, - دەلىنگەن مالىمەتتە.
بۇل وسىمدىكتىڭ تىركەلۋى بوتانيكا عىلىمى ءۇشىن ماڭىزدى جاڭالىق جانە ءۇستىرت ءوڭىرىنىڭ قايتالانباس ەكوجۇيەسىن ساقتاۋ قاجەتتىلىگىن كورسەتەدى. قورىق ماماندارى وسىمدىكتىڭ تارالۋ ايماعىن زەرتتەۋدى ءارى قاراي جالعاستىرادى.
