فوتو: ۇكىمەتتىڭ ءباسپاسوز قىزمەتى
ەلىمىزدەگى ماتەريالدىق ەمەس مادەني مۇرا ەلەمەنتتەرىنىڭ ۇلتتىق تىزىمى قايتا زەردەلەنىپ, بۇعان دەيىن تىركەلگەن 45 ەلەمەنتتىڭ قاتارى 79-عا دەيىن ۇلعايعان. بۇل قادام ۇلتتىق مادەنيەتتى ساقتاۋ مەن ناسيحاتتاۋعا باعىتتالعان ماڭىزدى باستاما بولىپ وتىر.
ايتا كەتەيىك, بۇگىندە قازاقستاننىڭ اتىنان «ادامزاتتىڭ ماتەريالدىق ەمەس مادەني مۇراسى تىزىمىنە» ەنگىزىلگەن ەلەمەنتتەر سانى 14-كە جەتكەن. بۇل – ەلىمىزدىڭ كوپعاسىرلىق رۋحاني جانە مادەني بايلىعىنىڭ حالىقارالىق دەڭگەيدە مويىندالۋىنىڭ ايقىن كورىنىسى.
«بۇگىندە ەلىمىزدەگى تاريحي-مادەني مۇرا وبەكتىلەرىنىڭ سانى 25 مىڭنان اسادى. اتاپ ايتقاندا, رەسپۋبليكالىق ماڭىزى بار تاريحي جانە مادەني ەسكەرتكىشتەر تىزىمىندە 265 ەسكەرتكىش بولسا, جەرگىلىكتى ماڭىزى بار 12 مىڭنان اسا تاريحي جانە مادەني ەسكەرتكىشى تىركەلدى. قازىرگى كەزدە يۋنەسكو-نىڭ بۇكىلالەمدىك مۇرا تىزىمىندە ەلىمىزدىڭ 10 تاريحي جانە مادەني ەسكەرتكىشى بار», دەدى ايدا بالاەۆا.
