بىلىكتى ماماندارمەن تولىعادى

قۇرىلىس يندۋسترياسى, ءوندىرىس, اۋىل شارۋاشىلىعى, كولىك جانە لوگيستيكا سياقتى سالالاردا كادر تاپ­شى­. سوندىقتان جاڭا جۇ­مىس ورىندارىن قۇرىپ قانا قوي­ماي, كادرلاردىڭ ءتيىستى دايار­لى­عىن قامتاماسىز ەتۋدىڭ ءجونى بولەك.

قازىردە جۇمىسسىز ازاماتتاردى, سونىڭ ىشىندە جاستاردى جۇمىسشى ماماندىقتارىنا تەگىن وقىتۋدى ۇسىناتىن بىرقاتار مەملەكەتتىك باعدارلامالار بار. قايتا دايارلاۋ باعدارلامالارى ءارتۇرلى جاستاعى ادامدارعا جاڭا ماماندىق الۋعا مۇمكىندىك بەرەدى. ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىك ورگاندارمەن, اكىمدىكتەرمەن بىرلەسىپ كاسىپتىك ءبىلىم بەرۋ, جۇمىسپەن قامتۋ سالاسىنداعى جاعدايدى ايتارلىقتاي جاق­سار­تۋعا باعىتتالعان ءىس-شارا­لار كەشەنىن قولعا الدى. ەڭبەك نا­رىعىن بىلىكتى كادرلارمەن تو­لىق­­تىرۋ مەن ازاماتتاردىڭ الەۋ­مەتتىك-ەكونوميكالىق ءال-اۋقا­تىن ارتتىرۋعا مۇمكىندىك بەرە­تىن جۇمىس اياسىندا بوس ورىن­دار جارمەڭكەلەرىن وتكىزۋ, كاسىبي ستاندارتتاردى جەتىلدىرۋ, جۇمىس بەرۋشىلەرمەن ءوزارا ءىس-قيمىلدى كۇشەيتۋ كوزدەلگەن. مي­نيسترلىكتىڭ حالىقتى جۇمىس­پەن قامتۋ دەپارتامەنتىنىڭ ديرەك­تورى ءازيز يبراگيموۆتىڭ اي­تۋىنشا, قۇرىلىس, اۋىل شارۋا­شىلىعى, وڭدەۋ ونەركاسىبى, دەن­ساۋ­ل­ىق ساقتاۋ سالالارىندا جۇمىسشى كادرلار جوعارى سۇ­رانىسقا يە. «الداعى 6 جىلدا كادرلارعا جيىنتىق سۇرا­نىس 1,6 ملن ادام سانىنا باعا­لانا­دى. ونىڭ 900 مىڭعا جۋىعى – كاسىپتىك-تەحنيكالىق ءبىلىمى بار قىز­مەتكەرلەرگە, 400 مىڭنان اس­تامى جۇمىسشى ماماندىق يەلە­رىنە تيەسىلى بولادى», دەيدى ول.

قۇرىلىس سالاسىنداعى ەڭ ۇل­كەن سۇرانىس: سىلاقشىلاردىڭ (9 758 ادام), قۇرىلىس بريگادا­لا­رى پرورابتارىنىڭ (9 477 ادام), دا­نەكەرلەۋشىلەردىڭ (7 229 ادام) ۇلەسىنە تيەسىلى. اۋىل شارۋا­­شىلىعى سالاسىنا: 10 695 فەرمەر, 7 141 تراكتورشى, 4 940 ءىرى قارا ءوسىرۋ­شى كەرەك. سول سەكىلدى وڭدەۋ ونەركاسىبىندە: دانەكەرلەۋشىلەرگە (3 342 ادام), تىگىنشىلەر مەن كيىمدى قالپىنا كەلتىرۋشىلەرىگە (2 606 ادام), ونەركاسىپتىك جابدىقتاردىڭ سلەسارلارىنا (2 367 ادام), سانتەحنيكتەر مەن قۇبىر وتكىزۋشىلەرگە (2 051 ادام) قاجەتتىلىك ارتادى. دەن­ساۋلىق ساقتاۋ سالاسى 24 614 ورتا مە­دي­تسينالىق قۇراممەن, 4 604 جەدەل جاردەم جۇرگىزۋ­شى­سى­مەن, 4 536 فەلدشەرمەن تولىعۋعا ءتيىس.

«مانساپ كومپاسى» پلاتفور­ما­سىنىڭ بازاسىندا 100 مىڭ جوعارى سىنىپ وقۋشىلارىن قامتي وتىرىپ, كاسىپتىك باعدار بەرۋ جۇمىستارى جۇرگىزىلەدى. قازىرگى ۋاقىتتا وسى پلاتفورمادا كاسىبي دياگنوستيكا بويىنشا فۋنكتسيونالدى ەنگىزۋ باستالىپ, ساۋىردە ىسكە قوسىلماق. سونداي-اق «جاستار پراكتيكاسى» جوباسى اياسىندا جاس مامانداردى دايارلاۋعا كەمىندە 35 مىڭ تالىمگەر تارتۋ, جۇمىس ورنىندا كاسىپتىك وقىتۋ جوسپارلانعان. بيىلدىڭ وزىندە جاستار پراكتيكاسىنا 3,2 مىڭ ادام جىبەرىلدى. جەرگىلىكتى اتقارۋشى ورگانداردىڭ مالى­مەتىنشە, جاستار پراكتيكاسىنا قاتىسۋشىلارعا 2 645 تالىمگەر بەكىتىلگەن.

بۇگىندە «Skills Enbek» پلاتفورماسىندا 9 827 وقۋشى مەن تجكب ستۋدەنتتەرى ونلاين-وقىتۋمەن قامتىلدى. سونداي-اق بيىل كە­مىن­دە 500 مىڭ وقۋشى مەن تجكب ستۋدەنتتەرى «ەلەكتروندىق ەڭبەك بيرجاسى» بىرىڭعاي تسيفرلىق پلاتفورماسىن پايدالانا وتىرىپ, جۇمىس ىزدەۋ, جۇمىسقا ورنالاستىرۋ داعدىلارىنا وقىتى­لا­دى. تجكب-نىڭ ۇزدىك مىڭ تۇلە­گىن ەلدىڭ جەتەكشى كومپانيالارىنا جۇمىسقا ورنالاستىرۋ جوس­پارلانعان. جۇمىس بەرۋشى جۇمىس­سىزداردى 6 ايلىق كاسىپتىك وقىتۋ­دى ۇيىمداستىرادى.

بيىلدان باستاپ ەلىمىزدىڭ بار­­لىق وڭىرلەرىندە بوس جۇمىس ورىن­دارى جارمەڭكەلەرى جۇمىس­شى ماماندىقتارىنا باسىمدىق بەرە وتىرىپ وتكىزىلەدى. ەلوردادا مۇنداي جارمەڭكە «جۇمىسشى ماماندىقتار قالاسى» فەستيۆالى اياسىندا ءوتىپ, ءبىر اپتاعا سوزىلدى. وسىلايشا, بوس جۇمىس ورىندارى جارمەڭكەلەرىنە مىڭنان استام جۇمىس بەرۋشى قاتىسىپ, جۇمىسشى ماماندىقتار بويىن­شا 9,6 مىڭ بوس جۇمىس ورنىن ۇسىندى.

سونىمەن قاتار سۋ شارۋا­شى­لىعى, ماشينا جاساۋ, حيميا ونەركاسىبى, تاۋ-كەن مەتاللۋرگيا ونەركاسىبى, قۇرىلىس, جەڭىل ونەركاسىپ, اۋىل شارۋاشىلىعى سالاسى, كولىك لوگيستيكاسى, اۆتو­موبيل جولدارى, تاعى باسقا سالا­لار­دا 100 كاسىپتىك ستاندارت ازىر­لەنىپ, جاڭارتىلادى. بىلىك­تىلىكتى تانۋ­دى باعالاۋ ءتورت تاۋەلسىز ورتا­لىق­تىڭ بازاسىندا باستالعان. تاعى بەس ورتالىق اشىلىپ, ەكەۋى حا­لىق­ارا­­لىق ستاندارتتارعا نەگىز­دە­لەتىن بولادى.