«كىتاپقۇمارلىق – جاقسى قاسيەت. كوپتەگەن مەملەكەت ۇلتتىق كىتاپ كۇنىن اتاپ وتەدى. ءبىز, ەڭ الدىمەن, جاستاردى كىتاپ وقۋعا باۋلۋىمىز كەرەك. سوندا جاپپاي كىتاپ وقيتىن ۇلتقا اينالامىز», – دەگەن پرەزيدەنت تاپسىرماسىن جۇزەگە اسىرۋ اياسىندا جەرگىلىكتى كىتاپحانالار جاڭارتۋدان ءوتىپ, وقىرماندارىن قۋانتىپ جاتىر. سونىڭ ءبىرى – قوناەۆ قالاسىنداعى ورتالىق كىتاپحانا.
الماتى وبلىسى اكىمدىگىنىڭ قولداۋىمەن التى اي ارالىعىندا جاڭعىرتۋدان وتكەن قالالىق كىتاپحانا ەلىمىزدە العاش اتالىپ وتەتىن مەرەكە قارساڭىندا ەسىگىن ايقارا اشىپ, وقىرماندارىنا زور قۋانىش سىيلادى.
زاماناۋي ستاندارتتارعا سايكەس جابدىقتالعان كىتاپحانا ءبىر مەزەتتە 100 ادامعا قىزمەت كورسەتۋگە مۇمكىندىك بەرەدى. مۇندا جوعارى جىلدامدىقتى ينتەرنەت, كوۆوركينگ ايماقتار, شىعارماشىلىق كەڭىستىكتەر مەن زاماناۋي ادەبيەتتەر قورى قاراستىرىلعان.
وسىلايشا, زاماناۋي ۇلگىدەگى كىتاپحانانىڭ ماتەريالدىق-تەحنيكالىق بازاسى تولىقتاي جاڭارتىلعانىن تانىستىرعان كىتاپحانا ديرەكتورى ايگۇل اقتانوۆا, كىتاپ قورىنىڭ ساقتاۋ ەرەجەلەرىن ەسكەرىپ, اۋا الماستىرعىش قۇرىلعىلار ورناتىلىپ, «پلانسكان» ارناۋلى كىتاپ سكانەرى قويىلعانىن, بالالارعا ارنالعان ءبىلىم مەن دەمالىس ايماعى قۇرىلعانىن اتاپ ايتتى.
رۋحانيات ورداسىنىڭ اشىلۋ راسىمىندە وبلىس اكىمىنىڭ ورىنباسارى بولات كۇرەڭبەكوۆ بۇل جوبانىڭ ءوڭىردىڭ رۋحاني-مادەني ومىرىندەگى ماڭىزىن ايرىقشا اتادى.
«بۇل جاي عانا جاڭارتىلعان عيمارات ەمەس, بىلىمگە, وقۋعا, دامۋعا جەتەلەيتىن زاماناۋي مادەني ورتانى قالىپتاستىرۋدىڭ ۇلكەن مۇمكىندىگى. مەملەكەت باسشىسى قاسىم-جومارت توقاەۆ كىتاپحانا ءىسىنىڭ ماڭىزىن بىرنەشە مارتە اتاپ وتكەن بولاتىن. ءبىز بۇل باعىتتا جۇيەلى جۇمىستاردى جالعاستىرامىز», – دەدى ول.
الماتى وبلىسىندا وسى كۇنى 144 كىتاپحانا جۇمىس ىستەيدى. بيىلعى جىلى ءوڭىردىڭ ۇيعىر اۋدانىنداعى, ەڭبەكشىقازاق اۋدانىنىڭ شەلەك اۋىلىنداعى جانە قاراساي اۋدانىنىڭ جاندوسوۆ اۋىلىنداعى كىتاپحانالارعا جاڭعىرتۋ جۇمىستارىن جۇرگىزۋ جوسپارلانعان. جىل سايىن جەرگىلىكتى بيۋدجەت ەسەبىنەن قالامگەرلەرگە ارنايى ستيپەنديا تاعايىندالىپ, اقىن-جازۋشىلاردىڭ جارىققا شىققان ەڭبەكتەرى ءوڭىر كىتاپحانالارىنا تاراتىلىپ كەلەدى.
كىتاپتىڭ قۇندىلىعىن تىلگە تيەك ەتكەن سالتاناتتى ءىس-شارادا جازۋشى ساۋلە دوسجان, ۇلتتىق كىتاپحانا ديرەكتورى عازيزا نۇرعاليەۆا, اقىن ماقپال مىسا جۇرەكجاردى تىلەكتەرىن جەتكىزدى.
ءوڭىردىڭ بارلىق اۋداندارىنىڭ كىتاپحاناشىلارى كوشپەلى كورمە ۇيىمداستىرىپ, تاۋ تۇلعالى قالامگەرلەرىنىڭ تۋىندىلارىن تانىستىردى.
«وسى كىتاپحانانىڭ تۇراقتى وقىرمانىمىز. ۇيدە ءوزىمىزدىڭ جەكە كىتاپ بۇرىشىمىز بار. بالالارىم كىتاپحانانىڭ اتىنان كوپتەگەن بايقاۋلارعا قاتىسىپ, ءتۇرلى دەڭگەيدەگى جۇلدەلى ورىندارعا يە بولىپ ءجۇر. بۇگىنگى اشىلىپ جاتقان كىتاپحاناعا جەر مەن كوكتەي وزگەرىس جاسالىپ, بىرقاتار جاڭا كىتاپتار قوسىلىپتى. وسىنداي جايلى ورىندا كىتاپ وقۋعا قۇمارلىق ارتا تۇسەرى ءسوزسىز», – دەيدى كوپبالالى انا اقتولقىن مايساليموۆا.
كىتاپحانانىڭ اشىلۋ سالتاناتى ءتۇس اۋا «رۋحانياتتىڭ جاناشىرى – كىتاپ» اتتى مەرەكەلىك كەشكە ۇلاستى. وبلىستىق ورتالىق امبەباپ كىتاپحانا ۇجىمى ۇيىتقى بولعان بۇل شاراعا اقىن, جازۋشىلار مەن مادەنيەت سالاسىنىڭ مايتالماندارى, قوعام بەلسەندىلەرى قاتىستى. ايتىسكەر اقىن ايبەك بەستەنقۇل جىردان شاشۋ شاشتى. ەل الدىندا ءسوز العان جازۋشىلار وداعىنىڭ مۇشەلەرى, اقىن جاراس سارسەك, اقىن, دراماتۋرگ باقىت بەدەلحان, الماتى وبلىستىق جازۋشىلار وداعى فيليالىنىڭ توراعاسى ەرجان توقتار, جازۋشى قانات ابىلقايىر, جازۋشى, دراماتۋرگ, قازاقستان پرەزيدەنتىنىڭ ارناۋلى ادەبي سىيلىعىنىڭ لاۋرەاتى الىشەر ايتۋار كىتاپ وقۋ – ادام ويىن دامىتىپ, ورەسىن وسىرەتىنىن, ءتىل بايلىعىن ۇشتاپ, ومىردە ءوز ورنىن تابۋعا ىقپال ەتەرىن العا تارتتى.
كىتاپتىڭ قوعامداعى ءرولى مەن رۋحاني قۇندىلىعىن ناسيحاتتاپ, جاس ۇرپاقتىڭ كىتاپقا دەگەن سۇيىسپەنشىلىگىن ارتتىرۋعا باعىتتالعان ءىس-شارا بارىسىندا اقىن-جازۋشىلارمەن كەزدەسۋ ۇيىمداستىرىلىپ, قولتاڭبا الىپ, كىتاپتار تالقىلانىپ, ۆيكتورينالىق ويىندار وينالىپ, كونتسەرتتىك باعدارلامالار ۇسىنىلىپ, كوپشىلىكتىڭ كوڭىلىن شالقىتتى.
الماتى وبلىسى
