الماتى قالاسى اكىمدىگىنىڭ ءباسپاسوز قىزمەتى
لوكاليزاتسيانىڭ ءبىرىنشى كەزەڭىندە ورتاق ينۆەستيتسيا كولەمى 4 ملرد تەڭگەنى قۇراعان. 2024 جىلدىڭ جەلتوقسان ايىندا كومپانيا ورىندىقتارعا ارنالعان كوبىكتى قالىپ-پىشىندەردىڭ سىناما پارتياسىن شىعارىپ, سەرتيفيكاتسيادان ءوتىپ, ونىمدەردى «Hyundai» جەڭىل اۆتوكولىكتەر وندىرىسىنە جەتكىزۋ ماقساتىندا «Hyundai Motor Company» (كورەيا رەسپۋبليكاسى) كەلىسىمىن العان بولاتىن.
حالىقارالىق ستاندارت تالاپتارى مەن قىزمەتكەرلەردىڭ بىلىكتىلىك دەڭگەيىنىڭ سايكەستىگى راستالعان سوڭ, كاسىپورىن ورىندىقتاردى ءوندىرۋ بويىنشا تەحنولوگيالىق وپەراتسيالاردى جۇزەگە اسىرۋ ماقساتىندا مەملەكەتپەن كەلىسىمگە وتىردى.
«پرەزيدەنت ەل ەكونوميكاسىن دامىتۋداعى جەكە ينۆەستورلاردىڭ ماڭىزدى رولىنە توقتالىپ, كاسىپورىندارعا جۇمىس ورىندارىن ساقتاۋ جانە ءوندىرىستى جاڭعىرتۋ بويىنشا كوڭىلگە قونىمدى مىندەتتەمەلەر جۇكتەلۋگە ءتيىس ەكەنىن اتاپ ءوتتى. ءبىز موينىمىزعا العان مىندەتتەرىمىز الدىنداعى جاۋاپكەرشىلىكتى تولىقتاي سەزىنەمىز. وسى ماقساتتا سىرتقى فاكتورلارعا تاۋەلدىلىكتى ازايتۋ, اۆتوكولىك ونەركاسىبىندە بىلىكتى ينجەنەرلەر بۋىنىن دايىنداۋ, سونىمەن بىرگە شاعىن جانە ورتا بيزنەستى دامىتۋعا جاردەمدەسۋ ءۇشىن اۆتوكومپونەنتتەر مەن شيكىزات وڭدەۋدىڭ قوماقتى ۇلەسىن لوكاليزاتسيالاۋعا قاراي باعىت الىپ كەلەمىز», دەيدى «استانا موتورس» باس ديرەكتورى بەكنۇر نەسىپباەۆ.
«Youngsan» توراعاسى پاك چون بومنىڭ ايتۋىنشا, بۇل تەك العاشقى قادام عانا.
ء«بىز «استانا موتورس» پەن «Youngsan» اراسىنداعى بەكەم بايلانىسقا نەگىزدەلگەن باستامالاردىڭ ناتيجەسىن كورىپ وتىرمىز. الەمدە جانە تمد ايماعىنداعى اۆتوكولىك ونەركاسىبىندەگى قارقىندى وزگەرىستەردى ەسكەرە وتىرىپ, وسى باعىتتا ۇنەمى جۇمىس ىستەيمىز», دەدى.
«Almaty Autoparts Production» ءوندىرىس قۋاتى – جىلىنا 100 مىڭ ورىندىق جيناعى. «Hyundai Trans Kazakhstan» زاۋىتىندا ۇساق ءتۇيىندى ءوندىرىسى ارقىلى «Hyundai Tucson» مودەلىنە ارنالعان ورىندىقتار شىعارىلادى. جاقىندا زاۋىت «Hyundai Santa Fe» مودەلىنە ارنالعان ورىندىقتار وندىرىسىنە دە كىرىسپەك. بولاشاقتا كاسىپورىن ونىمدەرىن جاڭا «Astana Motors Manufacturing Kazakhstan» مۋلتيبرەندتى زاۋىتىنا, سونداي-اق باسقا دا اۆتوكولىك كاسىپورىندارىنا جەتكىزۋدى جوسپارلاپ وتىر.
«Almaty Autoparts Production» كاسىپورنىنىڭ ماماندارى كوبىكتى قالىپ-پىشىندەردى ءوندىرۋدىڭ تەحنولوگيالىق وپەراتسيالارىن مەڭگەرگەن. 2026 جىلى زاۋىت جەتكىزىلەتىن شيكىزاتتان ورىندىق قاپتاماسىن تىگۋ بويىنشا لوكاليزاتسيانىڭ ەكىنشى كەزەڭىنە شىعادى. كاسىپورىن تىگىن تسەحىن اشىپ, ونى جابدىقتاۋعا جانە كادرلاردى وقىتۋعا قوسىمشا 720 ملن تەڭگە ينۆەستيتسيا جۇمساۋدى كوزدەپ وتىر.
