فوتو: اشىق دەرەككوز
اق ءۇي بۇل ماسەلەگە قاتىستى اقش-تىڭ سالىق قىزمەتىنە جۇگىنىپ, گارۆاردتى سالىقتىق جەڭىلدىكتەن ايىرۋدى سۇراعان.
ناۋرىز ايىندا ادىلەت مينيسترلىگى ۋنيۆەرسيتەتتىڭ بارلىق فەدەرالدى كەلىسىمشارتتارى مەن ۇكىمەت قارجىلاندىراتىن گرانتتارىنا كەشەندى شولۋ باستاعان. ال وتكەن اپتادا ىشكى قاۋىپسىزدىك مينيسترلىگى گارۆاردقا ارنالعان 2,7 ميلليون دوللار كولەمىندەگى گرانتتاردى توقتاتقان.
ترامپ بۇل ماسەلەگە بايلانىستى ءوزىنىڭ Truth Social جەلىسىندەگى پاراقشاسىندا مالىمدەمە جاسادى.
«گارۆارد باعىتىنان تايعان, ول فەدەرالدى قارجىلاندىرۋعا لايىق ەمەس. ولار تەك سولشىل راديكالدى, اقىلسىز جانە «بوسبەلبەۋ» ادامداردى جۇمىسقا الادى. بۇل مەكەمە ستۋدەنتتەر مەن بولاشاق كوشباسشىلارعا تەك ساتسىزدىكتى ۇيرەتەدى. گارۆارد – كۇلكىگە قالعان, جەككورۋشىلىك پەن اقىماقتىققا تاربيەلەيتىن ورىن. ول ەندى الەمنىڭ ۇزدىك ۋنيۆەرسيتەتتەرىنىڭ تىزىمىنە كىرۋگە ءتيىس ەمەس», دەدى ترامپ.
ۋنيۆەرسيتەتتىڭ مەملەكەتتىك باسقارۋ سالاسى بويىنشا پروفەسسورى رايان ەنوس بۇل پىكىرگە قارسى شىعىپ, گارۆاردتىڭ فەدەرالدى ۇكىمەتكە باعىنباۋىن قولدايتىنىن ايتقان.
«ۇكىمەتتىڭ جەكە مەكەمەگە ىشكى ىستەرى بويىنشا نە ىستەۋ كەرەكتىگىن ايتۋعا قۇقىعى جوق. ادامدار ءوز پىكىرىن بىلدىرۋگە جانە كەز كەلگەن نارسەگە قارسى شىعۋعا قۇقىلى. ەگەر بۇل ەكەۋىن شاتاستىرساق, ءسوز بوستاندىعىنا قاۋىپ توندىرەمىز», دەدى پروفەسسور.
ايتا كەتەيىك, بۇعان دەيىن گارۆارد فەدەرالدى ۇكىمەتكە باعىنۋدان باس تارتقان العاشقى ۋنيۆەرسيتەت بولعان. ەندى وقۋ ورنىنا بولىنەتىن 2,2 ميلليارد دوللار كولەمىندەگى گرانتتار توقتاتىلۋى مۇمكىن.
