فوتو: اقوردا
پرەزيدەنتتىڭ مالىمدەۋىنشە, وبلىستا نارەستە ءولىمىنىڭ كورسەتكىشى تومەندەپ كەلە جاتقانىمەن, بۇل كورسەتكىش رەسپۋبليكا بويىنشا ورتاشا دەڭگەيدەن جوعارى قالىپ وتىر. قازاقستاندا ورتاشا كورسەتكىش – 6,01. سونىمەن قاتار, قاتەرلى ىسىككە شالدىعۋ مەن وسى دەرتتەن قايتىس بولۋ جاعدايلارى ازايعانىمەن, اۋرۋدى اسقىندىرىپ الاتىن ازاماتتار سانى ءالى دە كوپ. وبلىستا جەدەل جاردەم بريگادالارى جەتىسپەيدى.
سونىمەن قاتار مەملەكەت باسشىسى مەكتەپتەردە وقۋشىلاردىڭ جاپپاي ۋلانۋ فاكتىلەرىن سىنعا الدى. بىلتىردىڭ وزىندە 400-دەن استام بالا, بيىل 42 بالا ۋلانعان. بۇل – مەكتەپتەردە ازىق-ت ۇلىك قاۋىپسىزدىگى تالاپتارىنىڭ ساقتالماي وتىرعانىنىڭ ايقىن كورىنىسى.
«ۇكىمەتكە جاۋاپتى مەملەكەتتىك ورگاندارمەن بىرلەسىپ, وقۋشىلاردىڭ قاۋىپسىزدىگىن قاتاڭ باقىلاۋعا الۋدى تاپسىرامىن. ءبىلىم بەرۋ مەكەمەلەرى قىزمەت كورسەتەتىن ۇيىمدارمەن ساپالى ءارى ناقتى جۇمىس جۇرگىزۋى كەرەك. اكىمدىك وسىنداي ورەسكەل جاعدايلارعا مۇلدە جول بەرمەۋگە ءتيىس. جالپى الەۋمەتتىك سالانىڭ ماڭىزى ايرىقشا. سەبەبى, ءبىز – الەۋمەتتىك ەلمىز», دەدى پرەزيدەنت.
قاسىم-جومارت توقاەۆ ەلىمىز الەۋمەتتىك باعىت ۇستاناتىنىن جانە قانداي جاعداي بولماسىن, حالىق الدىنداعى مىندەتتەرىن ورىنداۋعا دايىن ەكەنىن ەرەكشە ايتتى. مۇقتاج ازاماتتارعا قاجەتتى كومەك كورسەتىلەدى, بۇل – مەملەكەتتىڭ مىزعىماس ۇستانىمى.
«سونداي-اق ماسەلەنىڭ ەكىنشى جاعى بار. الەۋمەتتىك جەڭىلدىكتەر مەن جاردەمگە يە بولۋ ءۇشىن قيتۇرقى ارەكەتتەر جاسايتىندار از ەمەس. ءتىپتى الەۋمەتتىك الاياقتىق پايدا بولدى دەپ ايتۋعا بولادى. ونداي الاياقتار مەملەكەتكە دە, قوعامعا دا زيانىن تيگىزىپ جاتىر. كومەك شىن مۇقتاج ادامدارعا بەرىلۋگە ءتيىس. سوندىقتان تاعى دا قايتالاپ ايتامىن, الەۋمەتتىك قولداۋ جۇيەسىن مۇقيات زەردەلەۋ كەرەك. وبلىس اكىمى سيرەك كەزدەسەتىن مەتالداردىڭ كوزىن اشۋ ءۇشىن گەولوگيالىق بارلاۋدى بەلسەندى تۇردە جۇرگىزۋ كەرەك دەپ ۇسىنىس ايتتى. قولدايمىن. ۇكىمەت بۇل ماسەلەگە ەرەكشە كوڭىل ءبولۋى قاجەت. وسىمەن كۇن تارتىبىندەگى ماسەلەنىڭ ءبارىن قارادىق. بارلىق تاپسىرمالار ۋاقتىلى ورىندالۋعا ءتيىس», دەدى مەملەكەت باسشىسى.
ءسوز سوڭىندا مەملەكەت باسشىسى بارلىق تاپسىرمالاردىڭ ۋاقتىلى ءارى ناقتى ورىندالۋى قاجەت ەكەنىن ايتىپ, ولاردى جەكە باقىلاۋىنا الاتىنىن جەتكىزدى.
«قورىتا ايتقاندا, ءبىرىنشى تالابىم – ءبارىمىز ادال جۇمىس ىستەۋىمىز كەرەك. ەكىنشى تالابىم – ءبارىمىز وزىق ويلى بولۋىمىز قاجەت. ءۇشىنشى تالابىم – جاستارىمىزعا دۇرىس ءبىلىم مەن تاربيە بەرىپ, ولارعا جول اشۋىمىز كەرەك. ال ماڭعىستاۋ وبلىسىنا كەلسەك, ءبىز بۇل ايماقتى جەدەل دامۋدىڭ ۇلگىسى رەتىندە كورسەتۋىمىز كەرەك. وبلىستىڭ الەۋەتى زور. سونى ءتيىمدى پايدالانباساق, بارىمىزگە كەشىرىلمەس كۇنا بولادى. راقمەت, بارشاڭىزعا», دەدى قاسىم-جومارت توقاەۆ.
جيىندا ماڭعىستاۋ وبلىسىنىڭ اكىمى نۇرداۋلەت قيلىباي, پرەمەر-ءمينيستردىڭ ورىنباسارلارى قانات بوزىمباەۆ پەن ەرمەك كوشەرباەۆ, «قازمۇنايگاز» ۇلتتىق كومپانياسىنىڭ باسقارما توراعاسى اسحات حاسەنوۆ بايانداما جاسادى.
