كوللەدج ديرەكتورى شاعانگۇل جاناەۆانىڭ ايتۋىنشا, بۇل سۋرەت وقۋ ورنىنىڭ قورىندا ساقتالىپ قالعان. بۇل سەكىلدى تاعى باسقا زەرتتەلمەگەن قۇندى مۇرالار بار. وكىنىشكە قاراي, كەڭەس زامانىندا كوپ دۇنيەنىڭ كوزى جويىلعان. بىراق قازىرگى قولدا بار دۇنيەلەردى زەرتتەپ, عىلىمي اينالىمعا ەنگىزسە از ولجا بولماس ەدى.
تاريحي سۋرەتتە قازاقستان ارحەولوگيا عىلىمىنىڭ نەگىزىن سالۋشى, عىلىمنىڭ كوپتەگەن سالاسى: ەتنوگرافيا, تاريح, شىعىستانۋ, ادەبيەتتانۋ, ونەرتانۋ بويىنشا كورنەكتى قايراتكەر, فيلولوگيا عىلىمدارىنىڭ دوكتورى, پروفەسسور, قازاق كسر عا اكادەميگى الكەي مارعۇلان, پۋبليتسيست, دراماتۋرگ, اۋدارماشى, تاريح عىلىمدارىنىڭ دوكتورى, پروفەسسور مۇساتاي اقىنجانوۆ بار.
ال وقىتۋشىلارعا كەلسەك, وندا سەمەيدىڭ قازاق پەداگوگيكالىق تەحنيكۋمىنىڭ ديرەكتورى, بۇرىنعى مۇعالىمدەر سەمينارياسىنىڭ تۇلەگى, اعارتۋشى-پەداگوگ, الاش قايراتكەرى ابىكەي ساتباەۆ, لەنينگراد مەملەكەتتىك ۋنيۆەرسيتەتىنىڭ فيلولوگيا فاكۋلتەتىنىڭ ستۋدەنتى (1923–1928), ايگىلى جازۋشى مۇحتار اۋەزوۆ, عۇلاما عالىم قانىش ساتباەۆتىڭ بولاشاق جارى تايسيا الەكسەەۆنا كوشكينا, سەمەي قازاق تەاترىنىڭ نەگىزىن قالاعان, سەمەيدىڭ قازاق پەداگوگيكالىق تەحنيكۋمىندا ۇزاق جىلدار قازاق ءتىلى مەن ادەبيەتى پانىنەن ساباق بەرگەن عالياقپار تورەباەۆ, پەداگوگ-عالىم, ى.التىنسارين اتىندىعى عىلىمي زەرتتەۋ ينستيتۋتىنىڭ ديرەكتورى ءامىرجان سىدىقوۆ بەينەسى ساقتالعان. سونىمەن قاتار رەسەي ۋنيۆەرسيتەتتەرى مەن ينستيتۋتتارىن بىتىرگەن وقىتۋشىلار ە.گ.مەرتۆەتسوۆ, س.گ.سيروتكين, ي.ف.ۆينوحودوۆ, ە.گ.گەراسيموۆ بار.
بۇل ناقتى اتى-ءجونى انىقتالعان تۇلعالار عانا. قاراپ تۇرساڭىز, تۇلەكتەردىڭ قاتارىندا ەكى ايمانوۆتىڭ ەسىمى كورسەتىلگەن. قىزىعى, بۇل تاريحي ءبىلىم ورداسىندا اتاقتى كينورەجيسسەر شاكەن ايمانوۆ تا ءبىلىم العانى بەلگىلى. اتالعان ەكى ايمانوۆتىڭ شاكەن ايمانوۆقا تۋىستىعى بولۋى مۇمكىن دەگەن دە پىكىر بار. ويتكەنى سەمەيدەگى مۇعالىمدەر سەمينارياسىندا باياناۋىلدان بارىپ وقىعان تۇلعالاردىڭ قاتارى كوپ.
اباي وبلىسى
