وبلىستىق اقپاراتتاندىرۋ, مەملەكەتتىك قىزمەتتەر كورسەتۋ جانە ارحيۆتەر باسقارماسىنىڭ باسشىسى ازامات كاشيەۆتىڭ ايتۋىنشا, مەملەكەتتىك قىزمەت كورسەتۋدىڭ ەلەكتروندى فورماتى اكىمشىلىك كەدەرگىلەردى ازايتىپ, ازاماتتاردىڭ ۋاقىتىن ۇنەمدەيدى.
«ەلەكتروندىق ۇكىمەت پورتالى ارقىلى قىزمەتتەر ومىرلىك جاعدايلار بويىنشا توپتاستىرىلعان. مىسالى: «راسىمدەلۋ», «بالا تۋ», «جۇمىسقا تۇرۋ», «بيزنەس اشۋ» سياقتى ساناتتارمەن كورسەتىلەدى. بۇل ازاماتتار ءۇشىن قىزمەتتى ىزدەۋدى ايتارلىقتاي جەڭىلدەتەدى», دەيدى باسقارما باسشىسى.
2024 جىلى وبلىس اكىمدىگى مەن مەملەكەتتىك قىزمەت ىستەرى اگەنتتىگىنىڭ قوستاناي وبلىسى بويىنشا دەپارتامەنتى بىرلەسىپ, ورتالىق مەملەكەتتىك ورگاندارعا 49 ۇسىنىس جولداعان. ونىڭ ىشىندە وزەكتى دەپ تانىلعان 14 ماسەلە رەسپۋبليكالىق كوميسسيانىڭ قاراۋىندا تالقىلانىپ, 10 ۇسىنىس وتكەن جىلى ىسكە استى. اتاپ ايتقاندا, قىزمەتتەر تىزىلىمىنە ەرەكشە قاجەتتىلىگى بار ازاماتتارعا ارنالعان جاڭا مەملەكەتتىك قىزمەتتەر ەنگىزىلدى.
وڭىردە مەملەكەتتىك قىزمەتتەردىڭ ساپاسى جىل سايىن الەۋمەتتىك زەرتتەۋلەر ارقىلى باعالانىپ وتىرادى. سوڭعى ءۇش جىلدا ەلەكتروندى قىزمەتتەر ۇلەسى 91%-تەن 98,3%-كە دەيىن وسكەن. اسىرەسە دەنساۋلىق ساقتاۋ سالاسىندا تسيفرلاندىرۋ قارقىندى جۇرگىزىلىپ جاتىر. بۇرىن ەمحانادا كەزەك كۇتۋ نەمەسە انىقتاما الۋ ۋاقىت السا, بۇگىندە وسى قىزمەتتەردى «دامۋمەد» قوسىمشاسى ارقىلى ونلاين الۋ مۇمكىندىگى بار. سونىمەن قاتار, ناركولوگيالىق جانە پسيحياتريالىق انىقتامالار دا ەلەكتروندى تۇردە قولجەتىمدى.
