سۋرەت: instagram.com/asylmurakz/
قوڭىر بەكايدار الماتى سۋرەتشىلەر ۋچيليششەسىندە وقىپ, الماتى سۋۆەنير سىيلىق بۇيىمدار جاسايتىن فابريكادا سۋرەتشى بولىپ جۇمىس ىستەگەن. كەيىن تەمىربەك جۇرگەنوۆ اتىنداعى ونەر اكادەمياسىندا وقىپ, فابريكانىڭ باس سۋرەتشىسى قىزمەتىن اتقارعان. قوڭىر اعا سالالى ساۋساقتارىمەن تەك سۋرەت قانا سالىپ قويماي, ۇلت جادىندا جاندانعان ەجەلگى اسىل بۇيىمداردى جاساۋعا دا ىقىلاس تانىتادى.
وداق ىدىراپ, زاۋىت-فابريكا توقتاپ, جۇرت جۇمىسسىز قالعان 90 جىلدارى قوڭىر ەگەن ۇلى قىزىعۋشىلىعىن كاسىپكە اينالدىرىپ, اسىل جارى اناركۇل ناربوتانوۆا ەكەۋى وتباسىلىق بيزنەستى باستادى. اناركۇل دە ونەردەن قاراجاياۋ ەمەس. ون ساۋساعى مىڭ سان ويۋ جاساۋعا جارالعان تىگىنشى. ول 1-ماي بىرلەستىگىندە تۇتاس تىگىن تسەحىنىڭ باستىعى قىزمەتىنە دەيىن كوتەرىلگەن ەدى. بىرلەستىك جۇمىسىن توقتاتقاندا جارىنىڭ قاسىنان تابىلىپ, ەكى شەبەر ۇلتتىق تىگىن ونەرى مەن زەرگەرلىكتى ۇيلەستىرىپ, زامانا سۇرانىسىنا ساي ءىس جۇرگىزدى. وسى كاسىپپەن وتباسىن اسىراپ, بالالارىن ءوسىردى.
«تاۋسامالى اۋىلىنان جەر الىپ, ءۇي سالدىق. ءۇش ۇل, ءبىر قىز تاربيەلەپ, ونەرگە باۋلىدىق. بالالاردىڭ ءبارى الماتى سۋرەتشىلەر كوللەدجىن ءبىتىرىپ, كەيىن جوعارى ءبىلىم دە الدى. قازىر ايدوستىڭ قاسكەلەڭدە ءمۇسىن جاسايتىن جەكە ءوندىرىسى بار. باقىتجان كەراميكا, تەرى بۇيىمدارى, ات ابزەلى سەكىلدى قولونەرىن جاساۋمەن اينالىسادى. عالىمجاننىڭ جەكە ونەر مەكتەبى بار. زەرگەرلىك, كەراميكا, سۋرەت سالۋ ماماندىعىمەن شۇعىلدانادى. عالىمجاننىڭ جۇبايى بينازيرا سازدان قۇمىرا, سازسىرناي جاساپ شىعارادى. ەركەجان توقىما, باتيك, گوبەلەن جانە مودا كوللەكتسياسىن كورسەتەدى», دەيدى قوڭىر اعا.
ەلىمىز بەن شەتەلدەردە وتكەن كورمەلەردىڭ باس جۇلدەسىن يەلەنىپ جۇرگەن شەبەر سۋرەتشىلەر جانە ەۋرازيالىق ديزاينەرلەر وداعىنىڭ مۇشەسى. 2022 جىلى «قازاقستانعا ەڭبەك سىڭىرگەن قىزمەتكەر» وردەنىمەن ماراپاتتالعان. 2017 جىلى وتكەن «EXPO-2017» كورمەسىنە قاتىستى. بەلگىلى قولونەر شەبەرى داركەنباي شوقپار ۇلىنىڭ 75 جىلدىعىنا وراي جاسالعان كورمە بايقاۋىندا 1-ورىن يەلەندى. «Born Nomad Power Awards 2022» جوباسىنا قاتىسىپ, وندا دا ۇزدىك اتاندى. الماتى وبلىسى بويىنشا وتكىزىلگەن «مەرەيلى وتباسى» بايقاۋىندا دا العا وزدى.
جان جارى اناركۇل زامانعا ساي ەتنوستيلدە كيىم تىگىپ شىعارادى. ءسان كوللەكتسياسىن كورسەتەدى. مەملەكەت جانە قوعام قايراتكەرى, ەتنوگراف وزبەكالى جانىبەكوۆتىڭ 90 جىلدىعىنا ارناپ تۇركىستاندا وتكىزىلگەن «تايقازان» رەسپۋبليكالىق ۇلتتىق كيىمدەر بايقاۋىنا قاتىسىپ, «تۇركىستان – 2021» گران-ءپريىن ۇتىپ العان. باسقا دا قانشاما بايقاۋدا توپجاردى. «ماقساتىم – قولونەردى, ونىڭ ىشىندە ۇلتتىق ەتنو كيىمدەردى قازىرگى زامانعا ساي جەتىلدىرىپ, الەمگە تانىتۋ», دەيدى شەبەر اناركۇل.
