جىلدان-جىلعا بۇل سپورت تۇرىنە قىزىعۋشىلار قاتارى ارتىپ كەلە جاتقانىن كاسپي جاعالاۋىنداعى جارىس ايقىنداپ بەردى. بۇعان دەيىن وتكەن ەل بىرىنشىلىكتەرىندە مۇنشالىق سپورتشى جينالعان ەمەس. قاتىسۋشىلاردىڭ رەكوردتىق كورسەتكىشى تىركەلگەن ەل بىرىنشىلىگىنىڭ ءاربىر جەكپە-جەگى تارتىسپەن ءوتتى. ولاي بولاتىن دا ءجونى بار. سەبەبى جۇلدە ولجالاپ, جارقىراي كورىنگەن تالانتتى سپورتشىلار الدا بولاتىن قۇرلىق دوداسىنا, سونىمەن قاتار الەم چەمپيوناتىنا قاتىسۋعا مۇمكىندىك الدى.
ءدۇبىرلى دودادا توكيو وليمپياداسىنىڭ قولا جۇلدەگەرى سوفيا بەرۋلتسەۆا, تۇڭعىش الەم چەمپيونى ءمولدىر جاڭبىرباي, ازيا ويىندارىندا چەمپيون اتانعان, جۇلدەگەر بولعان قايسار الپىسباي, اسەل قاناي, نۇرقانات اجىقانوۆ, ديدار ءامىرالى, دانيار يۋلداشەۆ سىندى تاجىريبەلى كاراتەشىلەر جاستاردىڭ قارىمىن بايقاپ كوردى.
ەرلەر اراسىنداعى كۋميتە دوداسىندا 55 كگ سالماقتا ميراس ابدىقادىر (جامبىل وبلىسى) چەمپيون اتانسا, اتىراۋ وبلىسىنىڭ سپورتشىسى نۇربەك كەنجەباي 60 كگ سالماقتا ۇزدىك شىقتى. 67 كگ سالماق دارەجەسىندە ەركىنبەك بايتورەەۆ (ماڭعىستاۋ وبلىسى), 75 كگ سالماقتا نۇرقانات اجىقانوۆ (اقتوبە وبلىسى) دارالاندى. 84 كگ سالماقتا شىمكەنت قالاسىنىڭ ۇزدىگى دانيار يۋلداشەۆ جەڭىسكە جەتسە, + 84 كگ سالماقتا سىنعا تۇسكەن سپورتشىلار اراسىندا الماتىلىق دياس ۇلىقبەك توپ جاردى.
ايەلدەر اراسىنداعى تارتىستا دا كەيىنگى بۋىننىڭ قارىمدى ەكەنى بايقالدى. دەسە دە ۇلتتىق قۇرامانىڭ بەلدى وكىلى سانالاتىن تاجىريبەلى ساڭلاقتار ءوز بيىگىنەن تومەندەگەن جوق. اتاپ ايتقاندا, 50 كگ سالماق دارەجەسىندە الەم چەمپيونى, ازيا ويىندارىنىڭ كۇمىس جۇلدەگەرى ءمولدىر جاڭبىرباي (قىزىلوردا وبلىسى) جەڭىسكە جەتتى. 55 كگ سالماقتا ماڭعىستاۋ وبلىسىنىڭ سپورتشىسى ءايشابيبى شاراحان, 61 سالماق دارەجەسىندە اسەل قاناي (تۇركىستان وبلىسى), 68 كگ سالماقتا دايانا دارەنسكايا (الماتى قالاسى) ەلىمىزدىڭ چەمپيونى اتاندى. 68 كگ سالماقتان اۋىر تارتاتىن سپورتشىلار دوداسىندا سوفيا بەرۋلتسەۆا (شىمكەنت قالاسى) ۇزدىك شىقتى.
تامىز ايىندا قىتايدىڭ چەندۋ قالاسىندا XII دۇنيەجۇزىلىك ويىندار (The World Games) تۇڭلىگىن تۇرەدى. وسى الەمدىك دودادا ەل بىرىنشىلىگىندە ولجا سالعان ساڭلاقتارعا سەنىم ارتىلماق. 2022 جىلى اقش-تىڭ بيرمينگەم قالاسىندا وتكەن دۇنيەجۇزىلىك ويىنداردان ءبىزدىڭ سپورتشىلارىمىز 1 التىن, 2 كۇمىس, 1 قولا مەدالمەن ورالدى. فينالعا شىققان ءۇش ساڭلاعىمىزدىڭ اراسىنان تەك سوفيا بەرۋلتسەۆا عانا ءانۇرانىمىزدى شىرقاتتى. سوفيا بيىل دا جاھاندىق جارىستا شەبەرلىگىن سىناپ, الەمنىڭ تاڭداۋلى كاراتە شەبەرلەرى سىنعا تۇسەتىن الاماندا ەل مەرەيىن اسىرۋعا ۇمتىلادى. تاجىريبەلى سپورتشى ءمولدىر جاڭبىرباي دا جانكۇيەرلەرىن جەڭىسپەن قۋانتۋعا بارىن سالاتىنىن جەتكىزدى.
– بيىلعى ەل چەمپيوناتىنداعى باسەكەلەستىك جوعارى بولدى. قاتىسۋشىلاردىڭ قاتارى قالىڭ بولۋى دا كوپ جايتتى اڭعارتسا كەرەك. دەگەنمەن تىنىمسىز توككەن تەردىڭ وتەۋىنە كەزەكتى رەت التىن مەدال بۇيىردى. الدا قىسقا مەرزىمگە دەمالىس الىپ تىنىعامىن. ودان كەيىن قايتا جاتتىعۋدى باستايمىز. وراسان جاۋاپكەرشىلىك, جانكۇيەرلەردىڭ اماناتىن ارقالايتىن ءدۇبىرلى دودالارعا قاتىسامىز. ارمانىم – الەمدە تەڭدەسسىز ەكەنىمدى پاش ەتىپ, تۋىمىزدى جەلبىرەتۋ, – دەيدى م.جاڭبىرباي.
بۇل جىل جەمىسسىز دە ەمەس. قاڭتاردا پاريجدە پرەمەر-ليگا ساناتىنداعى ءدۇبىرلى دودانىڭ ءبىرىنشى كەزەڭى ءوتىپ, ۇزدىكتەرىمىز 2 كۇمىس, 1 قولا ولجالادى. ناۋرىز ايىندا قىتايدىڭ حانچجوۋ قالاسىندا ۇيىمداستىرىلعان وسى دودانىڭ ەكىنشى كەزەڭىندە ۇلتتىق قۇراما مۇشەلەرى اراسىنان 3 سپورتشىمىز كۋميتە باعدارلاماسىندا 1 كۇمىس,
2 قولا مەدال ەنشىلەدى. بۇل سايىسقا ءار سالماقتا الەمدىك رەيتينگتە جوعارى تۇرعان 32 سپورتشى عانا قاتىسقانىن قاپەرگە الساق, از تابىس ەمەس. ايەلدەر اراسىنداعى تارتىستا ءمولدىر جاڭبىرباي, اسەل قاناي, سوفيا بەرۋلتسەۆا سەنىمدى اقتادى.
