بايقاۋ تەحنولوگيالار فەستيۆالى فورماتىندا ءوتتى. وعان قازاقستان, قىرعىزستان, وزبەكستان, رەسەي, فرانتسيا جانە بىرىككەن اراب امىرلىكتەرىنىڭ 57 وقۋ ورنىنان كەلگەن 60-تان استام جوبالىق كوماندالار قاتىستى. قاتىسۋشىلاردىڭ جاس شاماسى 7 مەن 22 جاس ارالىعىندا بولدى, ولار عارىشقا بايلانىستى 12 تاقىرىپ بويىنشا جاساعان ماكەتتەرى مەن جۇمىس ۇلگىلەرىنەن باستاپ, عىلىمي-زەرتتەۋلىك ازىرلەمەلەرگە دەيىنگى عىلىمي جوبالارىن ۇسىندى.
Kazakhstan Smart Space 2025 بايقاۋى اياسىندا عارىشتى يگەرۋ جانە يننوۆاتسيالىق تەحنولوگيالاردى پايدالانۋ يدەياسى ارقىلى بىرىكتىرىلگەن ونداعان جارقىن جانە الۋان ءتۇرلى جوبالار ۇسىنىلدى. قاتىسۋشىلار سپۋتنيكتەردىڭ, ايدا ءجۇرۋ اپپاراتتارىنىڭ جانە وربيتالىق ستانتسيالاردىڭ ۇلگىلەرىن, مارس بازالارىنىڭ جۇمىس ۇلگىلەرىن, ەنەرگيانى لازەرلىك تاسىمالداۋ جۇيەلەرى مەن جەرۇستىلىك ورتادا سۋ جيناۋعا ارنالعان قوندىرعىلاردىڭ ۇلگىلەرىن كورسەتتى. اسىرەسە ەكولوگيالىق ماسەلەلەرگە جانە عارىش قالدىقتارىن قايتا وڭدەۋ ماسەلەلەرىنە ەرەكشە كوڭىل ءبولىندى. قازىلار القاسى ءارتۇرلى جاس ساناتتارى بويىنشا 20-عا جۋىق كوماندانىڭ جۇمىسىن ەرەكشە اتاپ ءوتتى.
Kazakhstan Smart Space بايقاۋى 2021 جىلى شۋحرات يبراگيموۆ, مارات نۇرعوجين جانە ۆلاديمير زاتولوكيننىڭ باستاماسىمەن قۇرىلعان بولاتىن. وسى ءتورت جىل ىشىندە ول ءبىلىم الماسۋ جانە تەحنولوگيالىق يننوۆاتسيالار ءۇشىن حالىقارالىق الاڭعا اينالدى. بايقاۋدىڭ باستى مىندەتتەردىڭ ءبىرى – ۇيىمداستىرۋشىلاردىڭ ايتۋىنشا, بۇۇ-نىڭ «كۇن ءتارتىبى: عارىش – 2030» اتتى ستراتەگياسىنىڭ ماقساتتارىن جۇزەگە اسىرۋ, «حالىقارالىق عارىشتىق جەلى قوعامداستىعى» يننوۆاتسيالىق باعدارلاماسىن ىلگەرىلەتۋ جانە TRIZATHLON جوباسىن دامىتۋ.
بايقاۋعا قاتىسۋشىلاردىڭ جۇمىسىنا قازاقستان عارىش سالاسىنىڭ جەتەكشى ساراپشىلارى باعا بەرەدى. قازىلار القاسىنىڭ قۇرامىنا ەلىمىزدىڭ «عارىشتىق زەرتتەۋلەر جانە تەحنولوگيالاردىڭ ۇلتتىق ورتالىعى», «رەسپۋبليكالىق عارىشتىق بايلانىس ورتالىعىنىڭ», عىلىمي ينستيتۋتتار مەن تەحنيكالىق زەرتحانالاردىڭ وكىلدەرى كىردى. وسى ءىس-شارا اياسىندا عارىش سالاسىنداعى جەتەكشى قازاقستاندىق جانە شەتەلدىك ساراپشىلار بايانداما وقىپ, شەبەرلىك ساباقتارى وتۋدە. بايقاۋ ساتباەۆ ۋنيۆەرسيتەتىنىڭ, «ۇلتتىق عارىشتىق زەرتتەۋلەر جانە تەحنولوگيالاردىڭ ۇلتتىق ورتالىعى» جانە قازاقستان جوبالاردى باسقارۋ ينستيتۋتىنىڭ قولداۋىمەن وتكىزىلىپ جاتىر.
