جوبا اياسىندا قاتىسۋشىلار ءار اپتا سايىن ونەركاسىپ ورىندارىنىڭ جۇمىسىن كوزبەن كورىپ, وندىرىستىك ماماندىقتاردىڭ قىر-سىرىمەن تانىسادى. وسى ماقساتتا الماتى قالاسىنىڭ ستۋدەنتتەرى «اسفالتبەتون» زاۋىتىنا باردى. وندا جاستار ءوندىرىس جەلىسىمەن تانىسىپ, ماتەريالداردىڭ جاسالۋ جولىن, ارنايى تەحنولوگيالاردىڭ ماقسات-مىندەتىن ءبىلىپ قايتتى. اشىق الاڭدا ەڭبەك ەتىپ جۇرگەن ناعىز جۇمىسشى ماماندارمەن اڭگىمەلەستى.
– تاجىريبەلىك كەزدەسۋلەر جاستاردىڭ كاسىبي باعدارىن ايقىنداپ, قاراپايىم ماماندارعا دەگەن قۇرمەتىن ارتتىرادى. ەڭبەكتىڭ پارقىن تۇسىنەدى. تەحنولوگيالىق پروتسەسستى تىكەلەي باقىلاي, كاسىبي قۇپيالاردى مەڭگەرەدى, زاۋىتتاعى جۇمىس مۇمكىندىكتەرىنەن قۇلاعدار بولادى. وسىلاي باعىت-باعدار بەرىپ, ازاماتتاردىڭ ءوز جولىن تابۋىنا, زاماناۋي تەحنولوگيالاردى مەڭگەرۋىنە, جاڭا يدەيالاردىڭ باستاماشى بولۋىنا ۇلەس قوسقىمىز كەلەدى. ەسەسىنە ولار ەل ەكونوميكاسىنىڭ ىلگەرىلەۋىنە نەگىز بولادى. جاستار قاناتىنىڭ دا مىندەتى وسى, ستۋدەنتتەرگە جۇمىسقا ورنالاسۋعا وڭتايلى جولىن كورسەتۋ, – دەيدى الماتى قالالىق «جاستار رۋحى» توراعاسى ديداربەك دىلدابەك.
قىزىلوردا وبلىسىنداعى «ادىلەت» ءوندىرىس كومپانياسىنا ەكسكۋرسيا بارىسىندا جاستار ناۋبايحانا, سابىن مەن كىر جۋعا ارنالعان ۇنتاق شىعارۋ بولىمدەرىنىڭ جۇمىسىمەن تانىستى. بۇل ءوندىرۋشى كومپانيا 72 پايىزدىق كىر سابىننىڭ كۇنىنە 1000 داناسىن, «اقنيەت» كىر جۋ ۇنتاقتارىنىڭ ايىنا 6 تونناسىن جانە وتتەگەگى اعارتقىشىنىڭ 1 تونناسىن وندىرەدى. ونىمدەرى تەك قالا تۇرعىندارىنا عانا ەمەس, رەسپۋبليكاعا جونەلتىلىپ جاتىر.
– ءبىز ءۇشىن مۇنداي كەزدەسۋلەردىڭ ورنى بولەك. سەبەبى, بۇل تەك اقپارات الماسۋ ەمەس, جاستارعا شابىت سىيلاپ, ولاردى ءوندىرىس سالاسىنىڭ شىنايى كەلبەتىمەن تانىستىرۋ مۇمكىندىگى. كاسىبىمىزدىڭ قىر-سىرىن, جۇمىس بارىسىن كورسەتىپ, ولاردىڭ كاسىبي باعدار الۋىنا كومەكتەسۋ, – دەيدى «ادىلەت» دارا كاسىپكەرلىگىنىڭ تەحنولوگ مامانى باعدات شۋلەنباەۆ.
قوستانايلىق ستۋدەنتتەر دە «سوكولوۆ-سارىباي تاۋ-كەن بايىتۋ وندىرىستىك بىرلەستىگىنە» بارىپ قايتتى. جالپى كاسىپورىن ەلىمىزدىڭ مەتاللۋرگيا سالاسىندا ماڭىزدى ءرول اتقارادى. بۇگىندە ونىمدەرى الەمنىڭ بىرنەشە مەملەكەتىنە جىبەرىلەدى.
ال الماتى وبلىسى قوناەۆ قالاسىنىڭ كوپسالالى كوللەدجىنىڭ جاستارى قازاقستانداعى جالعىز انتيفريز ءوندىرۋشى «باعاشار مەكەن» جشس زاۋىتىنا وندىرىستىك ەكسكۋرسيا جاسادى. ءىس-شارا اياسىندا كوللەدج, زاۋىت جانە «جاستار رۋحى» ۇيىمى ۇشجاقتى مەموراندۋمعا قول قويدى. قۇجات ستۋدەنتتەردىڭ وندىرىستىك تاجىريبەدەن وتۋىنە جانە ۇزدىكتەردىڭ جۇمىسقا قابىلدانۋىنا مۇمكىندىك بەرەدى.
