ءىس-شاراعا قورعانىس ءمينيسترىنىڭ ورىنباسارلارى, ۆەدومستۆونىڭ قۇرىلىمدىق بولىمشەلەرىنىڭ باسشىلارى قاتىستى.
قورعانىس ءمينيسترى گەنەرال-پولكوۆنيك رۋسلان جاقسىلىقوۆ قازاقستان ارمياسىنىڭ حالىقارالىق ارەناداعى بەدەلىن ارتتىرۋعا قوسقان ۇلەسى ءۇشىن بىرىككەن روتانىڭ اسكەري قىزمەتشىلەرىنە العىسىن ءبىلدىردى. مينيستر بىتىمگەرلىك ميسسياعا قاتىسۋ اسكەري داعدىلاردى عانا ەمەس, سونىمەن قاتار ديپلوماتيانىڭ, شىدامدىلىق پەن ادامگەرشىلىكتىڭ جوعارى دەڭگەيىن تالاپ ەتەتىنىن اتاپ ءوتتى.
«سىزدەر گولان جوتالارىندا جاۋاپتى ميسسيانى ورىنداپ, ەلگە ابىرويمەن ورالدىڭدار. سىزدەردىڭ ەندىگى مىندەتتەرىڭ – كۇردەلى ميسسيا بارىسىندا جيناعان تاجىريبەنى بەرۋ. بۇل قارۋلى كۇشتەردى ودان ءارى نىعايتۋعا ىقپال ەتەدى», دەپ اتاپ ءوتتى ۆەدومستۆو باسشىسى.
اسكەري بورىشىن ءمىنسىز ورىنداعانى جانە حالىقارالىق قاۋىپسىزدىكتى نىعايتۋعا قوسقان ۇلەسى ءۇشىن ۇلتتىق بىتىمگەرشىلىك كونتينگەنتىنىڭ ءبىرىنشى قۇرامىنىڭ بارلىق اسكەري قىزمەتشىلەرى «بىتىمگەرشىلىك وپەراتسيالارىنا قاتىسقانى ءۇشىن» مەدالىمەن ماراپاتتالدى.
«ەل قورعانى» مەدالىن 22750 اسكەري ءبولىمى اۆتوكولىكپەن قامتاماسىز ەتۋ توبىنىڭ تەحنيك-جۇرگىزۋشىسى ستارشينا ازامات ساعىندىقوۆ پەن بارلاۋ توبىنىڭ سەرجانتى – 22750 اسكەري ءبولىمى ارنايى ماقساتتاعى كومانداسىنىڭ جاۋىنگەرلىك جانە دەنە شىنىقتىرۋ دايارلىعى جونىندەگى نۇسقاۋشى سەرجانت تەمىرلان ماۋسىمباەۆ الدى.
قورعانىس مينيسترلىگى بىتىمگەرلىك وپەراتسيالار ورتالىعىنىڭ مەديتسينالىق قىزمەت سەرجانتى – سانيتارلىق نۇسقاۋشىسى اعا سەرجانت ارداق كۇرتەباەۆا مەن باس اسكەري كلينيكالىق گوسپيتالى انەستەزيولوگيا جانە رەانيماتسيا بولىمشەسىنىڭ اعا مامانى ەفرەيتور ايكەرىم سەسەرحان ادال قىزمەتى ءۇشىن «قازاقستان رەسپۋبليكاسى قارۋلى كۇشتەرىنىڭ ۇزدىگى» توسبەلگىسىمەن ماراپاتتالدى. كاسىبي بىلىكتىلىگى جانە جاۋاپتى ءىسى ءۇشىن 58012 اسكەري ءبولىمى ينجەنەرلىك-ساپەرلىك روتاسىنىڭ سەرجانتى 3-سىنىپتى سەرجانت ماديار ستامشال «ميناسىزداندىرۋداعى ەرلىگى ءۇشىن» توسبەلگىسىمەن ماراپاتتالدى.
22750 اسكەري ءبولىمى ارنايى ماقساتتاعى بارلاۋ توبىنىڭ مەرگەنى لەيتەنانت مۇحيت جولاۋشيەۆكە مەرزىمىنەن بۇرىن «اعا لەيتەنانت» اتاعى بەرىلدى.
كەزدەسۋ بارىسىندا قورعانىس ۆەدومستۆوسىنىڭ باسشىسى قولباسشىلىققا تاجىريبەنى جيناقتاۋ, جەكە قۇرامدى دايىنداۋ بويىنشا ۇسىنىستاردى قالىپتاستىرۋ, بىتىمگەرلىك ميسسيالاردىڭ تاكتيكاسىنا, ستراتەگياسىنا جانە پراكتيكالىق قىزمەتىنە تۇزەتۋلەر ەنگىزە وتىرىپ, كەشەندى باعالاۋ جۇرگىزۋ جونىندە بىرقاتار تاپسىرمالار بەردى.
