– اۋەجاي قۇرىلىسى باستالعانىن ءبىلىپ وتىرمىز. وتە دۇرىس. بىراق, مۇقىم حالىق ءجۇرىپ جۇرگەن جولمەن 40 توننالىق جۇك كولىكتەرىنىڭ ءجۇرۋى ساناعا سىيمايدى. ولارعا نەگە رۇقسات بەرەدى؟ قوسىمشا جول سالىپ, سونىمەن جۇرۋلەرى كەرەك ەدى. ەندى بالەنباي شاقىرىم جولدى قايتا قالپىنا كەلتىرۋ دە وڭاي ەمەس, – دەيدى اۋدان تۇرعىنى ەرنات بولات.
ءيا, شىعىس قازاقستان وبلىسىنداعى ەڭ جاقسى جولداردىڭ ءبىرى وسى, وسكەمەن – راحمان قاينارى باعىتىنداعى جول ەدى. تۋريستىك ماۋسىم باستالعانشا قايتا قالپىنا كەلتىرىلسە جاقسى. شقو جولاۋشىلار كولىگى جانە اۆتوموبيل جولدارى باسقارماسىنىڭ باسشىسى نۇرجان ءجۇمادىلوۆتىڭ ايتۋىنشا, جاعداي قاداعالاۋعا الىندى.
– تۇرعىنداردىڭ نارازىلىعىن ءبىلىپ وتىرمىز. دەگەنمەن, پرەزيدەنتتىڭ تاپسىرماسى ورىندالۋى ءتيىس. اۋەجاي ستراتەگيالىق جاعىنان وتە ماڭىزدى نىسان. اۋىر جۇك كولىكتەرى ءۇشىن قوسىمشا جول سالۋ مۇمكىن ەمەس. اسفالتتىڭ ب ۇلىنگەن تۇستارى تۋريستىك ماۋسىم باستالعانشا قايتا قالپىنا كەلتىرىلەدى. ونى مەردىگەر كومپانيا ءوز مويىندارىنا الىپ وتىر, – دەدى باسقارما باسشىسى نۇرجان سايلاۋبەك ۇلى.
بۇل ورايدا «قازاۆتوجول» شقو فيليالى باسشىلىعى دا جولدىڭ قايتا قالپىنا كەلتىرىلۋىن قاداعالايتىنىن ايتتى.
– اتالعان جول 10 توننا سالماققا ەسەپتەلگەن. كوكتەم كەزى توپىراقتىڭ جۇمسارىپ, ىلعالدىڭ كوبەيۋىنە بايلانىستى رۇقسات ەتىلگەن سالماقتى ون توننادان سەگىز تونناعا دەيىن تۇسىرگەن ەدىك. الايدا, مەردىگەر كومپانيا بۇل ەرەجەنى بۇزىپ وتىر, – دەيدى «قازاۆتوجول» شقو فيليالىنىڭ باسشىسى نۇربەك تەمىرحانوۆ.
ول زاڭدىلىقتى قاداعالايتىن ترانسپورت پوليتسياسى ازىرشە بۇل ماسەلە بويىنشا پىكىر بىلدىرمەدى. قالاي دەسەك تە, اۋەجاي قۇرىلىسىنداعى جۇمىستار جەرگىلىكتى تۇرعىندار مەن اۋدان قوناقتارىنا كەدەرگى كەلتىرمەۋى ءتيىس.
