ءوندىرىس جاندانىپ كەلەدى
جاڭا كاسىپورىندار اشىلىپ, لوگيستيكالىق حابتار ىسكە قوسىلعان. بۇل جۇزدەگەن جاڭا جۇمىس ورنىنا سەپ. ءوندىرىسىن («بۋراتينو» ساۋدا ماركاسى) الماتىدان اۋدانعا كوشىرۋدىڭ قامىن جاساپ جاتقان «Caspian Beverage Holding» باستاماسى دا ماقتاۋعا تۇرارلىق.
«بىزگە ماڭىزدىسى – ينۆەستيتسيا تارتۋ ارقىلى اۋدان ەكونوميكاسىن دامىتۋ. جاڭا كاسىپورىندار مەن وندىرىستەر قارجى قۇيىپ قانا قويماي, حالىققا جاڭا جۇمىس ورنىن بەرەدى. سوندىقتان ينۆەستورلار ءۇشىن قولايلى جاعداي جاسايمىز. بىلتىر ونەركاسىپ ءوندىرىسى 621,8 ملرد تەڭگەگە جەتىپ, 9,4 پايىزعا ءوستى, ونىڭ ىشىندە وڭدەۋ ونەركاسىبىنىڭ ۇلەسى 91,7 پايىزدى قۇراپ, 576,1 ملرد تەڭگەگە جەتتى. اۋىل شارۋاشىلىعىندا 74,6 ملرد تەڭگەنىڭ ءونىمى ءوندىرىلىپ, ناقتى كولەم يندەكسى 100,2 پايىزدى قۇراسا, 224,2 ملرد تەڭگە ينۆەستيتسيا تارتىلىپ, 40,4 پايىزعا ءوستى», دەيدى اۋدان اكىمىنىڭ ورىنباسارى ءادىس سەيداقماتوۆ.
قازىر اۋداندا 18 ءىرى وندىرىستىك ورىن, ونىڭ ىشىندە 7-ەۋى جۇيە قۇراۋشى كاسىپورىن جۇمىس اتقارىپ جاتىر. ولار – «RG BRANDS Kazakhstan», «Coca-Cola Almaty Bottlers», «Hamle Company LTD», «Asia Agro Food», «Efes Kazakhstan», «Kagazy Recycling», «كەلۋن كازفارم» سياقتى فلاگماندار. وتكەن جىلى شامالعان اۋىلىندا «قازاقستاندىق قۇبىر ارماتۋراسى زاۋىتىنىڭ» (كزتا) قۇرىلىسى اياقتالىپ, تۇراقتى 80 جۇمىس ورنى قۇرىلدى. ساۋىنشى اۋىلىندا «BMG Holdinq» كومپانياسىنىڭ سەندەۆيچ-پانەل شىعاراتىن زاۋىت قۇرىلىسى اياقتالىپ, 60-قا جۋىق جاڭا جۇمىس ورنى اشىلدى.
بيىل قاڭتاردا نەگىزگى كاپيتالعا تارتىلعان ينۆەستيتسيا كولەمى 13,3 ملرد تەڭگەنى قۇراپ, وتكەن جىلمەن سالىستىرعاندا 3 ەسە وسكەن (2024 جىلى قاڭتاردا – 4,4 ملرد تەڭگە).
اۋداندا ءتيىمدى لوگيستيكالىق كەشەندەر دە بوي كوتەرىپ جاتىر. «Focus Logistics» كەشەنىنىڭ ءبىرىنشى كەزەڭى اياقتالىپ, «Ozon» قويماسى ىسكە قوسىلدى. بۇل جەردە مىڭعا تارتا ادام جۇمىسقا ورنالاستى. وسى ايدا «Samsung» قويماسى اشىلىپ, تاعى 100 جاڭا جۇمىس ورنى پايدا بولادى. «Imagine Apple City» جوباسى اياسىندا 500 جۇمىس ورنى قۇرىلماق. جالپى العاندا, اۋدان بويىنشا 4 500 جاڭا جۇمىس ورنى اشىلادى دەپ جوسپارلانعان.
لوگيستيكالىق قويمالار قۇرىلىسى باستالادى
«Focus Logistics» جەر ۋچاسكەلەرى الماتى اگلومەراتسياسىنىڭ سولتۇستىك-باتىس بولىگىندە, الماتى قالاسىنان 19 شاقىرىم جەردە ورنالاسقان. ۇلكەن الماتى اينالما اۆتوموبيل جولى ء(ۇاااج) مەن «اقسەڭگىر» تەمىرجول ستانساسىنا جاقىن ورنالاسقاندىقتان جۇكتەردى بارلىق باعىتتا جىلدام جەتكىزۋگە مۇمكىندىك بار. كومپانيانىڭ جەر ۋچاسكەلەرىن يگەرۋ 3 كەزەڭگە بولىنگەن. اۋەلى 95 گەكتار الاڭدا كونتەينەرلىك تەرمينالى بار «ا+» كلاستى لوگيستيكالىق پارك سالۋ كوزدەلىپ وتىر.
«بىلتىر قازاننان باستاپ جالپى اۋدانى 40 000 شارشى مەتردەن اساتىن «Ozon» فۋلفيلمەنت ورتالىعىنىڭ ءبىرىنشى كەزەگىندە وپەراتسيالىق قىزمەت جۇرگىزىلىپ جاتىر (جوسپار بويىنشا – جالپى قۋاتى 112 000 شارشى مەتر بولاتىن 3 كەزەڭ). وسى جىلدىڭ ءبىرىنشى جارتىجىلدىعىندا پايدالانۋعا بەرىلەتىن BTS جانە BTR فورماتى بويىنشا 200 000 شارشى مەتردەن استام ا كلاستى امبەباپ قويمالاردى سالۋ جوسپارلانۋدا. ءۇشىنشى كەزەڭدە قۋاتتىلىعى 100 000 TEU دەيىنگى زاماناۋي كونتەينەرلىك تەرمينال قۇرىلىسىن اياقتاۋ كوزدەلگەن», دەيدى «Focus Logistics» جشس باس ديرەكتورى دياس عاليەۆ.
وسى كۇنى ىسكە قوسىلعان «Ozon» قويماسىندا قاراساي اۋدانىنىڭ ەلدى مەكەندەرىنەن كەلەتىن مىڭعا جۋىق ادام جۇمىس ىستەيدى. ولار حالىق تۇتىناتىن تۇرمىستىق تاۋارلاردى تاپسىرىسقا قاراي بۋىپ-ءتۇيۋ جۇمىستارىمەن اينالىسادى. الىپ قويمانىڭ تاعى ءبىر ارتىقشىلىعى – وتاندىق ءونىم وندىرۋشىلەردىڭ دە تاۋارىنىڭ ساتىلۋىنا سەپتىگىن تيگىزەتىنى. ەكىجاقتى كەلىسىمشارت جاساسىپ, تاعام تۇرلەرىنەن وزگە ەكسپورتقا شىعاتىن ونىمدەر وسى قويما ارقىلى الىس-جاقىن شەتەلدەگى «Ozon» قويمالارىنا جەتكىزىلىپ, ودان ءارى تۇتىنۋشىلارعا جونەلتىلەدى. بۇل ءوز كەزەگىندە وتاندىق ءونىم تۇرلەرىنىڭ وتىمدىلىگىن ارتتىرۋعا ىقپال ەتپەك.
«التىن تاعانىڭ» اۋقىمى كەڭ
اۋدانداعى ءىرى ءوندىرىس وشاعىنىڭ ءبىرى بولادى دەپ بولجانىپ وتىرعان «التىن تاعا» تەمىر-بەتون بۇيىمدارىن ءوندىرۋ زاۋىتىنىڭ قۇرىلىسى دا قارقىندى جالعاسىپ جاتىر. تولىق قۋاتقا جەتكەندە 700 ادام ەڭبەككە ارالاسپاق.
«زاۋىت 2023 جىلدىڭ سوڭىندا ىسكە قوسىلىپ, 1-تسەحتا ەلەكتر جەلىلەرىن تارتۋعا ارنالعان باعانداردى شىعارۋدى باستادىق. 2-تسەحتا 35 كيلوۆاتتىق جەلىلەردى تارتۋعا ارنالعان ۇلكەن تىرەكتەر شىعارىلادى. ولار تولىقتاي تسەمەنت بۇيىمدارى. گەرمان تەحنولوگياسىمەن جابدىقتالعان 3-تسەحتا 100 ءتۇرلى تۇستەگى تسەمەنت توسەنىشتەر 20 شاقتى قالىپتا شىعارىلادى. مۇندا جوعارى ساپالى بورديۋرلەر جانە سپلينتەرلىك بلوك كىرپىشتەردى وندىرەمىز. 4-تسەحتا كارەر جۇمىستارىنىڭ تەمىردەن جاسالاتىن جابدىقتارىن جانە تىركەمەلەردى, كران-بالكىلەردى شىعارۋ جوسپارلانعان. سونداي-اق سىرتتان تاپسىرىس قابىلداپ, ونى تولىقتاي وسى مەتالل وندىرەتىن تسەحتا شىعارىپ بەرۋ مۇمكىندىگى قاراستىرىلعان. قازىر 5-تسەحتى ىسكە قوسۋعا دايارلىق جۇمىسى جۇرگىزىلۋدە. جالپى اۋماعى شامامەن 13 000 شارشى مەتر بولادى. وندا سەندۆيچ-پانەلدەر شىعارىلادى», دەيدى «التىن تاعا» جشس ديرەكتورى نۇربول بەرىكبول ۇلى.
ونىڭ ايتۋىنشا, 250 ۆاگون سىياتىن جانە جىلىنا 4 مىڭ توننا تسەمەنت ساقتايتىن قويما تۇرعىزىلماق. بۇل شىعارىلعان ءونىمدى ساپالى ساقتاپ, ءتيىستى جەرگە ىركىلىسسىز جەتكىزۋگە مۇمكىندىك بەرەدى.
الماتى وبلىسى
