كورمەنىڭ اشىلۋ سالتاناتىنا Torri ART جانە «مەرەي» شىعارماشىلىق ستۋدياسى مەن «ۆۋندەركيند» بالالاردى دامىتۋ ورتالىعىنىڭ تاربيەلەنۋشىلەرى, تاراز قالاسىنداعى فيزيكا-ماتەماتيكالىق باعىتىنداعى نازارباەۆ زياتكەرلىك مەكتەبى مەن تەحنيكالىق شىعارماشىلىق, مەكتەپ وليمپيادالارىن جانە مەكتەپتەن تىس ءىس-شارالاردى وتكىزەتىن وبلىستىق ورتالىقتارىنىڭ وقۋشىلارى مەن قالا تۇرعىندارى قاتىستى. بۇدان وزگە, ا. س. پۋشكين اتىنداعى №40, №41 گيمنازيالارى جانە №42, №66 تاراز جانە امانگەلدى اۋىلى ورتا مەكتەپتەرىنىڭ وقۋشىلارى دا كورمەنىڭ وتۋىنە بەلسەندى تۇردە اتسالىستى.
شارانىڭ نەگىزگى ماقساتى بالالار مەن جاسوسپىرىمدەردىڭ شىعارماشىلىق قاسيەتىن قولداۋ جانە ناسيحاتتاۋ, بالالار ەڭبەگىنىڭ ناتيجەسىن كورسەتۋ ارقىلى شىعارماشىلىق جانە تۇلعالىق دامۋىنا تۇجىرىم جاساۋ.
سالتاناتتى جيىندى وبلىستىق اقپارات جانە قوعامدىق دامۋ باسقارماسى «قوعامدىق كەلىسىم» كمم باسشىسى مۋباراك جيناقباەۆا قۇتتىقتاۋ سوزىمەن اشىپ, كورمە جۇمىسىنا ساتتىلىك تىلەدى.
جيىنعا ارنايى كەلگەن كەراميست-سۋرەتشى, وبلىستىق قولونەرشىلەر وداعىنىڭ مۇشەسى, تاراز قالاسىنىڭ «ارت تاراز» سۋرەتشىلەر وداعىنىڭ مۇشەسى جانە تاراز قالاسىنىڭ نيش قوسىمشا ءبىلىم بەرۋ پەداگوگى ينديرا گۋباشەۆا جانە قالامىزدىڭ №40 گيمنازياسىنىڭ كوركەم ەڭبەك ءپانىنىڭ مۇعالىمى تاتيانا ۆوتينتسەۆا كورمەنىڭ اشىلۋىنا ىزگى تىلەكتەرىن ءبىلدىرىپ, كورەرمەن نازارىنا ۇسىنىلعان تۋىندىلاردىڭ ماڭىزدىلىعىنا, جاستاردىڭ شىعارماشىلىق قابىلەتتەرىنە توقتالدى.
كورمەگە 5-16 جاس ارالىعىنداعى وبلىسىمىزدىڭ 130-دان اسا جاس سۋرەتشىلەر مەن قولونەرشىلەردىڭ 200-گە جۋىق تۋىندىلارى قويىلعان. ولاردىڭ اراسىندا مۇمكىندىگى شەكتەۋلى بالالاردىڭ ەڭبەكتەرىندە كورۋگە بولادى.
جيىن بارىسىندا مەكەمە باسشىسى مۋباراك قاسىمقىزى قاتىسۋشىلاردىڭ ەڭبەكتەرىن باعالاپ, قاتىسۋشى جاس تالانتتارعا العىس حاتتار تابىس ەتتى.
سالتاناتتى جيىن سوڭى كورمە زالىنىڭ مەڭگەرۋشىسى جازيرا شىلدەباەۆانىڭ قوناقتاردى كورمە جۇمىسىمەن تانىستىرۋىمەن ءتامامدالدى.
ايتا كەتەيىك, «مەنىڭ الەمىم» بەينەلەۋ جانە قولونەرشىلەر كورمەسى 15 ساۋىرگە دەيىن جالعاساتىن بولادى. كورمەنى تاماشالاۋعا كەلەم دەۋشى قالا قوناقتارى مەن تۇرعىندارىنا دوستىق ءۇيىنىڭ ەسىگى اشىق. مەكەن-جايى: تولە بي كوشەسى, №23/ب.
