اۋعانستاندا قورشاۋدا قالعان كەڭەس جاۋىنگەرلەرى وق-ءدارىسى تاۋسىلىپ, ءتىرى قالۋ مۇمكىندىگى جوعىن ءتۇسىندى. سول ساتتە جاس سارباز اۋىر بولسا دا, ۇنەمى تاسىپ جۇرەتىن گارمونىن قولىنا الىپ, تۋعان جەرى تۋرالى مۇڭلى اۋەن ويناي باستادى. جاۋىنگەرلەر ءۇنسىز تىڭدادى. ءتىپتى دۇشپاندارى دا قارۋىن تومەن ءتۇسىرىپ, بۇل اۋەندى سوڭىنا دەيىن ايتۋعا مۇمكىندىك بەردى. بىراق كوپ ۇزاماي اتىس قايتا جالعاستى, ال سارباز سوڭعى انىنەن كەيىن ءتىل تارتپاي كەتتى.
گەرمانيا. بەرلين. سوعىستىڭ سوڭعى كۇندەرى. كەڭەس سولداتى كوشەدە شاڭ باسقان پيانينونى كورىپ, كىلت توقتادى. ونىڭ پەرنەلەرىن اسقان ساعىنىشپەن باستى. قيراعان قالا ىشىندە باحتىڭ اۋەنى تولقىدى. كەشەگە دەيىن جاۋ بولعان ادامدار – نەمىس تۇرعىندارى – ۇيلەرىنەن شىعىپ, ءۇنسىز تىڭدادى. سول ساتتە ولار كەۋدەلەرىندە جۇرەك بارىن, سول جۇرەكتىڭ مەيىرىم اڭسايتىنىن ءتۇسىندى. بىراق ءبىر ساتكە عانا.
ونەر. ءولىم الدىندا دا ءوز قۇدىرەتىن جوعالتپايدى. ءبىز قازىر دە وسى وقيعالار ورتاسىندا ءجۇرمىز. اۋعانستاندىق اقىن قىز اميل ايتقانداي, قانشا ادامنىڭ قازىر دە وتانى جانىپ جاتىر...
سوعىس الاۋى جاندى...
وندا مەنىڭ وتانىم جانىپ جاتىر.
ول ورتتە مەنىڭ جانىم جانىپ جاتىر,
ارماندارىم,
سوسىن ەرتەڭگى تاڭىم جانىپ جاتىر...
