– ءسىز وتانعا ادال قىزمەت ەتۋدىڭ جارقىن ۇلگىسىسىز. ءسىز لايىقتى ءومىر ءسۇرىپ, كوپتى كورگەن ادامسىز. سوعىس جانە سوعىستان كەيىنگى كەزەڭنىڭ قاتال سىناقتارىنا ابىرويمەن توتەپ بەرگەن باتىرسىز. بوستاندىق پەن بەيبىت اسپان ءۇشىن, جەڭىس ءۇشىن سىزدەردىڭ الدارىڭىزدا باس يەمىن. سىزدەرگە زور دەنساۋلىق جانە سۇيىسپەنشىلىك, قامقورلىق ءۇشىن باقىتتى كۇندەر تىلەيمىز, – دەپ قۇتتىقتادى وبلىس اكىمى مەن قالا باسشىلىعىنىڭ اتىنان قازىبەك بي اۋدانى اكىمىنىڭ ورىنباسارى رينات قارجاسباەۆ.
ماريا ەفيموۆنا 1925 جىلى 13 ساۋىردە قاراعاندى وبلىسى روستوۆكا اۋىلىندا دۇنيەگە كەلگەن. 1944 جىلى 19 جاسىندا اسكەرگە شاقىرىلدى. ماسكەۋ باس اسكەري مەكتەبىنىڭ ايەلدەر مەرگەندىك مەكتەبىندە وقىعان, سودان كەيىن 1945 جىلدىڭ تامىزىنا دەيىن 3-ءشى بەلورۋس جانە ۋكراينا مايداندارىندا مەرگەن بولعان. جەڭىستى پراگادا قارسى العان.
ءىى دارەجەلى وتان سوعىسى وردەنىمەن, «ەرلىگى ءۇشىن», «گەرمانيانى جەڭگەنى ءۇشىن» ەكى مەدالىمەن, كەڭەس وداعىنىڭ مارشالى گ. ك. جۋكوۆتىڭ مەدالىمەن, «ۋكراينانى ازات ەتكەنى ءۇشىن» جانە جاۋىنگەرلىك ەڭبەگى ءۇشىن العىس حاتتارمەن ماراپاتتالعان.
– 9 مامىر – ەڭ اتاۋلى كۇن. مەن ونى ءالى كۇنگە دەيىن تولقىپ, كوزىمە قۋانىشتىڭ جاسى تولا ەسكە الامىن. ءبىز جەڭىستى كۇتتىك جانە ونىڭ كەلەتىنىنە سەندىك. ال جاستارعا مەن ءبىر كەڭەس بەرگىم كەلەدى. ارقاشان قوزعالىستا بولۋ, جۇمىس ىستەۋ جانە جالقاۋلانباۋ قاجەت. ۇلكەندەردى قۇرمەتتەپ, ءوز قۇرداستارىڭا ۇلگى بولىڭدار, – دەيدى ارداگەر.
ارداگەردى تۋعان كۇنىندە قورعانىس مينيسترلىگىنىڭ وكىلدەرى دە قۇتتىقتادى. قاراعاندى وبلىسى قورعانىس ىستەرى جونىندەگى دەپارتامەنتى باستىعىنىڭ ورىنباسارى پولكوۆنيك ەركەبۇلان مۇستاعۇلوۆ ماريا شينكەۆيچكە ءمينيستردىڭ اتىنان قۇتتىقتاۋ حاتىن تاپسىردى. سونداي-اق, ارداگەرگە قوناققا «جاس سارباز» مەكتەبىنىڭ وقۋشىلارى مەن نۇركەن ءابدىروۆ اتىنداعى مەكتەپتىڭ تاربيەلەنۋشىلەرى دە باردى.
– ءومىر بارلىعىنا بەرىلەدى, بىراق ونى وسىلاي ابىرويمەن ءسۇرۋ اركىمنىڭ تاعدىرىنا جازباعان. ەرلىكتەرىڭىز ءۇشىن راحمەت! ءسىز سوعىستا عانا ەمەس, سوعىستان كەيىن دە ەڭبەك ەتىپ, ەلدى قالپىنا كەلتىردىڭىز. سىزدەر سياقتى جانداردىڭ ارقاسىندا ءبىز بەيبىت ەلدە ءومىر ءسۇرىپ جاتىرمىز, بۇل ءبىزدىڭ باتىرلارىمىزدىڭ ەڭ جاقسى ەستەلىگى, – دەدى قالالىق ءماسليحاتتىڭ توراعاسى التىنتورە بوكەنوۆ.
قاراعاندى وبلىسى
