كەزدەسۋ بارىسىندا بەيبىت شاحانوۆ الماتى اكىمدىگىنىڭ اتىنان ميحايل شايدوروۆقا 2,5 ميلليون تەڭگە كولەمىندە قارجىلاي سەرتيفيكات تابىستادى. سپورتتى دامىتۋعا جانە قالانى حالىقارالىق دەڭگەيدە تانىتۋعا قوسقان زور ۇلەسىن ەرەكشە اتاپ ءوتىپ:
«مانەرلەپ سىرعاناۋدىڭ ابىرويىن ارتتىرىپ قانا قويماي, جۇزدەگەن جاس سپورتشىعا وزىنە سەنۋگە جانە العا ۇمتىلۋعا شابىت بەردىڭىز. ەرەكشە العىستى جاتتىقتىرۋشىڭىز اسەم قاسانوۆاعا ايتقىم كەلەدى. ول ءوز ىسىنە دەگەن جوعارى كاسىبيلىگىمەن, دانالىعى جانە شىنايى ادالدىعىمەن ەرەكشەلەنەدى. قازاقستان رەسپۋبليكاسىنىڭ مانەرلەپ سىرعاناۋ بويىنشا باس باپكەرى رەتىندە ول سپورتتىڭ دامۋىنا جانە مۇز ايدىنىندا جاڭا جۇلدىزداردىڭ قالىپتاسۋىنا ۇلكەن ۇلەس قوستى», دەدى ب.شاحانوۆ.
ءوز كەزەگىندە ميحايل شايدوروۆ قولداۋ كورسەتكەنى ءۇشىن اكىمدىككە العىس ءبىلدىردى.
