ولاردىڭ قاتارىندا قاراپايىم پرەپاراتتارمەن قاتار ءبىر قاپتاماسىنىڭ قۇنى 34 ميلليون تەڭگەگە دەيىن جەتەتىن جوعارى باعالى دارىلەر دە بار. بۇل تۋرالى مەديتسينالىق ساقتاندىرۋ قورىنىڭ الماتى قالالىق فيليالىنىڭ ديرەكتورى ءىلياس مۇحامەدجان وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا مالىمدەدى.
«الماتىلىقتارعا پاراتسەتامول سياقتى قاراپايىم پرەپاراتتارمەن قاتار, ج ۇلىننىڭ بۇلشىقەت اتروفياسى سياقتى اۋىر اۋرۋلارعا ارنالعان ومىرلىك ماڭىزدى ءدارى-دارمەكتەر دە بەرىلدى», – دەدى ءىلياس مۇحامەدجان.
سونىمەن قاتار, قورمەن ستوماتولوگيالىق قىزمەتتەرگە 3 ملرد تەڭگە تولەندى. ونىڭ ىشىندە, جاق-سۇيەك كەسەلىمەن تۋعان بالالارعا ارنالعان ورتودونتتىق كومەك تە بار.
سپيكەردىڭ ايتۋىنشا, حالىقتان كەلىپ تۇسكەن وتىنىشتەرمەن دە بەلسەندى جۇمىس جۇرگىزىلۋدە. 2024 جىلى الماتىلىقتاردان Qoldau 24/7 ءموبيلدى قوسىمشاسى, msqory.kz سايتى جانە 1414 بايلانىس ورتالىعى ارقىلى 13 033 ءوتىنىش كەلىپ تۇسكەن.
«وتىنىشتەر اراسىندا مەديتسينا قىزمەتكەرلەرىنە العىس بىلدىرگەن حاتتار دا, شاعىمدار مەن كونسۋلتاتسيالىق سيپاتتاعى سۇراقتار دا بار. 2025 جىلدىڭ ءبىرىنشى توقسانىندا وتىنىشتەر سانى وتكەن جىلدىڭ سايكەس كەزەڭىمەن سالىستىرعاندا 23%-عا ازايىپ, جۇيەنىڭ جۇمىسىنداعى جاقسارتۋلاردى كورسەتتى», – دەپ اتاپ ءوتتى ءىلياس مۇحامەدجان.
ول قوردىڭ مەديتسينالىق ۇيىمدارمەن جانە پاتسيەنتتەردى قولداۋ قىزمەتتەرىمەن بىرلەسىپ, ماسەلەلەردى «وسىندا جانە قازىر» شەشۋ ءۇشىن ىنتىماقتاستىقتى جالعاستىرىپ جاتقانىن اتاپ ءوتتى.
