سۋرەتتەردى تۇسىرگەن – ۆەرا وستانكوۆا
وسى ورايدا «Nest Stroy» جشس ديرەكتورى الەكساندر نەستەرتسوۆ پەن «وتباسى بانك» باسقارما توراعاسىنىڭ ورىنباسارى نۇرلان اقشانوۆ «ناۋرىز جۇمىسكەر» باعىتىن جۇزەگە اسىرۋ جانە بانك كليەنتتەرى قولجەتىمدى نەسيەگە قول جەتكىزۋ ءۇشىن ارلەنگەن پاتەرلەردى بەرۋ بويىنشا ىنتىماقتاستىق تۋرالى كەلىسىمدەرگە قول قويدى. وسى قۇجاتتاردىڭ ارقاسىندا قۇرىلىس كومپانياسىندا جىلدار بويى ادال جۇمىس ىستەپ كەلە جاتقان كاسىبي قىزمەتكەرلەرگە «ناۋرىز جۇمىسكەر» باعىتىنا قاتىسۋ ءۇشىن باستاپقى جارنا رەتىندە قايتارىمسىز 1 ملن تەڭگە بەرىلەدى.
كومپانيا قىزمەتكەرلەرىنىڭ «وتباسى بانكتەگى» جيناق شوتتارىنا قاراجات اۋدارعاننان كەيىن ولار «وتباسى بانك» فيليالىنا جۇگىنىپ, تولەم قابىلەتتىلىگىن راستاپ, «ناۋرىز جۇمىسكەرگە» قاتىسۋعا ءوتىنىش بەرە الادى. بۇدان بولەك, «Nest Stroy» جشس قاناتقاقتى رەجىمدە «وتباسى بانك» سالىمشىلارىنا قولجەتىمدى نەسيەلەۋ ءۇشىن «Gate City» تۇرعىن ءۇي كەشەنىنەن 20 پاتەر بەرەدى. ارلەنگەن دايىن پاتەرلەردى باسپانا قۇنىنىڭ 50%-ىن جيناعان, بىراق نەسيەلەۋ ءۇشىن باعالاۋ كورسەتكىشى از بانك كليەنتتەرى ساتىپ الا الادى. دەسە دە, باسىمدىلىق ءبىرىنشى كەزەكتە جۇمىسشى ماماندىق يەلەرىنە بەرىلمەك.
«وتباسى بانكتە» ارالىق نەسيە الۋ ءۇشىن باعالاۋ كورسەتكىشىنىڭ ەڭ تومەنگى ءمانى 5 بولۋى كەرەك. وعان پاتەر قۇنىنىڭ 50%-ى مولشەرىندە دەپوزيت تولتىرعاننان كەيىن كەمىندە 6 اي وتكەن سوڭ جەتۋگە بولادى. سوندا عانا بانك جىلدىق 8,5%-عا دەيىن (جتسم 9%-دان 9,6%-عا دەيىن) مولشەرلەمەمەن نەسيە بەرەدى.
وسىلايشا, «Gate City» تۇرعىن ءۇي كەشەنىنەن پاتەر ساتىپ العان كليەنتتەر باعالاۋ كورسەتكىشى 5-كە جەتكەنىن كۇتپەي بىردەن دايىن ۇيگە كوشىپ, قونىس تويىن تويلاي الادى. التى اي بويى پاتەردە تۇرعان كەزدە تەك كوممۋنالدىق قىزمەتتەردىڭ اقىسىن تولەيدى.
«Gate City – الاتاۋ قالاسىنداعى العاشقى تۇرعىن ۇيلەردىڭ ءبىرى. بۇگىن ءبىز كومپانيامەن ەكى مەموراندۋمعا قول قويدىق. باسپانا قۇنىنىڭ جارتىسىن جيناپ, 6 اي ىشىندە كوممۋنالدىق تولەمدەردى عانا تولەپ تۇرۋ دەگەن – جاڭا باستاما. تازا ارلەنگەن پاتەرلەر نارىقتا وتە سيرەك كەزدەسەدى. ادەتتە قازاقستاندا قۇرىلىس كومپانيالارى پاتەردى ارلەۋسىز ساتا بەرەدى. ال ءۇي جوندەۋگە, سانتەحنيكاعا ساتىپ الۋشىنىڭ قالتاسىنان اقشا شىعادى. سوندىقتان «Nest Stroy» باسقالارعا ۇلگى بولىپ وتىر. سونداي-اق كومپانيا ءوز قىزمەتكەرلەرىنە «ناۋرىز جۇمىسكەر» باعىتىنا قاتىسۋ ءۇشىن باستاپقى جارنا رەتىندە قايتارىمسىز 1 ملن تەڭگە بەرەدى. مىسالى, ءۇي قۇنى 30 ملن تەڭگە بولسا, باستاپقى جارنانىڭ ۇشتەن ءبىرىن كومپانيا تولەيدى. بۇل باستاما جۇمىسشىلاردى ىنتالاندىراتىنى ءسوزسىز», دەدى «وتباسى بانك» باسقارما توراعاسىنىڭ ورىنباسارى نۇرلان اقشانوۆ.
«Gate City» تۇرعىن ءۇي كەشەنىندە ۇيلەر 9 قاباتتى, تازا ارلەنگەن پاتەرلەر. اۋلاسى اباتتاندىرىلعان, بالالار الاڭى جانە work out الاڭى بار. اۋلاعا كولىك كىرمەيدى, بۇل بالالاردىڭ قاۋىپسىزدىگى ءۇشىن قولايلى بولماق. پاتەردىڭ ءبىر شارشى مەترى 395 مىڭ تەڭگەدەن ساتىلادى. پاتەر قۇنى 18 ملن تەڭگەدەن باستالادى.
«پاتەرلەر, اۋلا ۇنادى. اۋلادا سەرۋەندەۋگە, بالالار ويناۋعا, جاتتىعۋ جاساۋعا جاعداي جاسالعان. اپاتتان ساقتانۋ ءۇشىن كولىك كىرمەگەنى ءجون. قازىر ادامدار وسىنداي قاۋىپسىز ۇيلەردە تۇرعىسى كەلەدى. الماتىعا اۆتوبۋس قاتىنايدى. مەكتەپ پەن بالاباقشا سالىنىپ جاتىر. مۇنىڭ ءبارى قاراپايىم دۇنيە بولىپ كورىنگەنىمەن, بۇل ادامداردىڭ جايلى ورتادا ءومىر سۇرۋىنە جاعداي جاسايدى. ۇيلەردىڭ ءتۇرلى تۇسكە بويالۋى دا جايلىلىقتىڭ بەلگىسى», دەدى نۇرلان اقشانوۆ.
ايتۋىنشا, «ناۋرىز», «ناۋرىز جۇمىسكەر» باعىتىنىڭ قاتىسۋشىلارى تازا ارلەنگەن ءۇيدى العان جاعدايدا باستاپقى جارنا سوماسى 20%-دان 10%-عا تۇسەدى. وسىلايشا, «وتباسى بانك» سەرىكتەس قۇرىلىس كومپانيالارعا دا پاتەرلەردى تازا ارلەنگەن دايىن كۇيدە پايدالانۋعا بەرۋدى ۇسىنىپ وتىر.
ء«بىز «وتباسى بانكپەن» بۇرىننان سەرىكتەسپىز. بۇگىن كومپانيالار اراسىندا ءوزارا ستراتەگيالىق مەموراندۋمعا قول قويدىق. «ناۋرىز جۇمىسكەر» اياسىندا قىزمەتكەرلەرىمىز دە باسپانالى بولسىن دەپ ولارعا باستاپقى جارنا ءۇشىن قايتارىمسىز 1 ملن تەڭگە بەرەمىز. الماتىدا جەر جەتپەيدى, ءۇي سالۋ قيىنداپ بارادى. سول ءۇشىن الاتاۋ قالاسىندا اۋلاسى كەڭ, ساپالى تۇرعىن ءۇي سالعىمىز كەلدى. مەكتەپ, بالاباقشا, ءارتۇرلى نىساندار بوي كوتەرىپ, قالا كوركەيەدى دەپ سەنەمىز», دەدى «Nest Stroy» جشس ديرەكتورى الەكساندر نەستەرتسوۆ.
«وتباسى بانكتىڭ» الماتى وبلىستىق فيليالىنىڭ ديرەكتورى قۋانىش ۇلاسبەكوۆ «Nest Stroy» مەن بانك اراسىنداعى قولجەتىمدى نەسيەلەۋ جوباسىنا كەز كەلگەن ادام قاتىسا الاتىنىن, قاناتقاقتى جوبا ءساتتى ىسكە اسسا پاتەر سانى دا كوبەيەتىنىن اتاپ ءوتتى. «وتباسى بانك» باسشىلىعى وسى جوباعا باسقا دا قۇرىلىس كومپانيالارى قوسىلادى دەپ ۇمىتتەنەدى. «وتباسى بانك» بۇل تەتىكتى «ساتىپ الۋ قۇقىعىمەن جالعا بەرۋ» دەپ اتادى. ول «كورپوراتيۆتىك» ءونىم اياسىندا جۇزەگە اسىرىلادى. «Gate City» تۇرعىن ءۇي كەشەنىندە نەسيەگە بەرىلەتىن پاتەرلەردىڭ ەڭ جوعارعى قۇنى 36,8 ملن تەڭگەنى قۇرايدى.
2025 جىلعى 14 ساۋىردەن باستاپ «وتباسى بانكتىڭ» الماتى وبلىستىق فيليالىندا ءوتىنىش بەرۋگە بولادى. پاتەرلەردى ۇلەستىرۋ كەزىندە جۇمىسشى ماماندارعا باسىمدىق بەرىلەدى.
