القالى جيىنعا باس رەداكتورلار كلۋبى مۇشەلەرى, سونداي-اق سپورت پەن مادەنيەت, ءبىلىم-عىلىم جانە اقپارات سالالارىنىڭ قايراتكەرلەرى قاتىستى. ءىس-شارا اياسىندا قازاقتىڭ ۇلتتىق سپورت تۇرلەرى مەن مادەنيەتى تۋرالى قۇندى اقپاراتتار ايتىلىپ, بەلگىلى كۇش مادەنيەتىن زەرتتەۋشى ابىلايحان قالنازاروۆتىڭ قازاق كۇرەسى مەن بالۋاندار, اسىق اتۋ, كوكپارعا قاتىستى بىرقاتار كىتابىنىڭ قولجازبا نۇسقاسى, سونداي-اق «قازاق كۇشىنىڭ كارتاسى» اتتى ارنايى جوباسى تانىستىرىلدى.
«Baluan tas» قۇرىلتايشىسى ا.قالنازاروۆ جاڭا قۇرىلىمنىڭ ماقساتى, باعىت-باعدارىمەن, الداعى جوسپارلارىمەن ءبولىستى.
«وسى ساتتەن باستاپ «قازاق كۇشىنىڭ كارتاسى» جوباسى رەسمي تۇردە باستاۋ الادى. ونى تۇرلىشە اتاۋعا بولادى. «قازاق كۇشىنىڭ كارتاسى», ياكي «قازاق كۇش-قايراتىنىڭ كارتاسى» نەمەسە « ۇلى دالانىڭ كۇش كارتاسى» دەسەك تە, ءبارىنىڭ ماعىناسى ءبىر. تۇركى الەمىنىڭ الەۋەتىن كورسەتەدى. باستى ماقسات – حالقىمىزدىڭ جاۋىنگەرلىك-سپورتتىق تاريحى مەن مادەنيەتىنىڭ اجىراماس بولىگى الىپ كۇش-قايرات يەلەرىنىڭ كۇش مۇراسىن تىزىمدەۋ مەن زەرتتەۋ. ەل اۋزىندا «بالۋان تاس» دەپ اتالاتىن اۋىر تاستاردى ىزدەپ تاۋىپ, ولاردىڭ گەوگرافيالىق ورنالاسۋ نۇكتەلەرىن كارتاعا ءتۇسىرىپ, ۇلتتىق قۇندىلىق رەتىندە مارتەبەلەۋ مەن ناسيحاتتاۋ», دەدى ول.
سونداي-اق سەناتور بيبىگۇل جەكسەنباي تاريحي-مادەني مۇرانىڭ ىشىندە بالۋاندىق سىناقتار ءراسىمىنىڭ ماڭىزدى بولعانىن ايتا وتىرىپ, اۋىر تاستاردىڭ قازاق حالقىنىڭ ەرلىك ءداستۇرىن, كۇش پەن باتىرلىقتى دارىپتەيتىن ەلەمەنتتەر رەتىندە عاسىرلار بويى ساقتالىپ كەلە جاتقانىنا توقتالدى.
«قازاقتىڭ الىپ كۇش يەلەرىنىڭ تاريحي ءرولىن ناسيحاتتاۋ ماقساتىندا اۋىر تاستاردى زەرتتەۋ – ۇلتتىق مادەنيەتىمىزدى جاڭعىرتىپ, جاستارعا رۋحاني مۇرامىزدى ءتۇسىندىرىپ, ناسيحاتتاۋدىڭ ماڭىزدى تاسىلدەرىنىڭ ءبىرى. بۇل جاعىنان ەلىمىزدە العاش باستاما كوتەرىپ وتىرعان ابىلايحان مامىرايحان ۇلىن قولداۋعا قاشاندا ءازىرمىز. مەن ونىڭ باتىر, بالۋان, تىپتەن «تۇيە بالۋان» بولعان انالارىمىز – داريعا, ايساۋلە, ۇمسىن, كۇرەش تۋرالى اڭگىمەلەرىن تالاي ەستىگەن ەدىم. ولار دا نازاردان تىس قالمايدى دەپ بىلەمىن», دەدى بيبىگۇل جەكسەنباي.
«قازاق كۇشىنىڭ كارتاسى» جوباسى بالۋان تاستاردىڭ گەوگرافيالىق ورىندارىن كارتالىق تىزىمگە ەنگىزىپ, تاريحي جانە مادەني-سپورتتىق مۇرا رەتىندە ساقتاۋعا جول اشۋ, بالۋان تاستارعا قاتىستى اڭىز-ءاپسانا, حيكايالار مەن ەل اۋزىنداعى اڭگىمەلەر, تاريحي دەرەكتەردى جيناقتاۋ جانە وسىنداي كوشپەلى سالاماتتى ءومىر سالتى مەن سپورتتىق-جاۋىنگەرلىك ەرلىك ءداستۇرىن عىلىمي اينالىمعا ەنگىزۋ سىندى ماقساتتاردى كوزدەيدى.
جيىن بارىسىندا بالۋان ارمان سۇلەيمەن, سپورتشى قۋانىش شارىپبەك ۇلى كۇش ويىنىن كورسەتىپ, ءاليحان دۇيسەنباي ءان شىرقادى. سونداي-اق ىنتىماقتاستىقتى جالعاستىرۋ ماقساتىندا «Baluan tas» پەن باس رەداكتورلار كلۋبى اراسىندا ءوزارا ءىس-قيمىل مەموراندۋمىنا قول قويدى.
جيىن «باس رەداكتورلار كلۋبى» قوعامدىق بىرلەستىگىمەن بىرلەسىپ, ۇلتتىق اكادەميالىق كىتاپحانانىڭ, ۇلتتىق سپورتتى قولداۋ قورىنىڭ قولداۋىمەن وتكىزىلدى.
