ەكى كەزدەسۋدە دە جەڭىسكە جەتكەن جەرلەستەرىمىز جارىستىڭ نەگىزگى بولىگىندە كۇش سىناسۋعا مۇمكىندىك بەرەتىن جالعىز جولدامانى يەلەندى.
قازاقستاننىڭ تەننيسشىلەرى الەم چەمپيوناتىنا بالانعان جارىسقا جولداما الۋ ءۇشىن العاشقى اينالىمدا اۋستراليادان 2:1 ەسەبىمەن ايلاسىن اسىرعانى جايىندا ءبىز بۇعان دەيىن جازعانبىز. كەلەسى كۇنى كولۋمبيامەن كۇش سىناستىق. وڭتۇستىك امەريكا قۇرلىعىنان كەلگەن ويىنشىلار جەرلەستەرىمىزگە جارىتىپ قارسىلىق كورسەتە المادى. اتاپ ايتساق, يۋليا پۋتينتسەۆا ۆالەنتينا ارياستى 6:0, 6:1 ەسەبىمەن ويسىراتا ۇتتى. جارقىن جەڭىسكە جەتۋ ءۇشىن يۋلياعا نەبارى 38 مينۋت جەتكىلىكتى بولدى. ەلەنا رىباكيناعا دا ءوز قارسىلاسىن ەڭسەرۋ ايتارلىقتاي قيىندىق تۋعىزعان جوق. ول يۋليانا ليزارازونىڭ «ماسەلەسىن» بار-جوعى 52 مينۋتتا شەشتى – 6:1, 6:2.. ءسويتىپ, ءبىزدىڭ بۇرىمدىلار ەندى 16-21 قىركۇيەك ارالىعىندا قىتايدىڭ شەنچجەن قالاسىندا جالاۋى جەلبىرەيتىن جارىستىڭ فينالدىق بولىگىندە كۇش سىناسادى.
ەستەرىڭىزگە سالا كەتەيىك, بيللي دجين كينگ كۋبوگى 1963 جىلدان بەرى ۇيىمداستىرىلىپ كەلەدى. 2020 جىلعا دەيىن ول فەدەراتسيا كۋبوگى دەپ اتالدى. وسى تۋرنيردە ەڭ مول ولجاعا اقش قۇراماسى كەنەلدى. امەريكالىقتار 18 جارىستا الدىنا جان سالمادى. چەحيانىڭ 11 مارتە مەرەيى ۇستەم بولسا, اۋستراليانىڭ التى الاماندا اسىعى الشىسىنان ءتۇستى. جەكەلەگەن تەننيسشىلەر اراسىنان كريس ەۆەرتكە تەڭ كەلەر ەشكىم جوق. حح عاسىردىڭ 70-80 جىلدارى جاسىنداي جارقىلداعان اقش-تىڭ فلوريدا شتاتىنىڭ تۋماسى 8 تۋرنيردە توپ جاردى. ال بيللي دجين كينگتىڭ ءوزى جەتى رەت جەڭىس تويىن تويلادى.
وسىعان دەيىن قازاقستان قۇراماسى اتالعان جارىستىڭ فينالدىق بولگىندە 2022 جانە 2023 جىلدارى ونەر كورسەتتى. بىراق قادامىمىز ءساتتى بولمادى. بالكىم, وسى جولى جەرلەستەرىمىز بارىنشا ناتيجەلى ويىن ورنەگىن كورسەتىپ, ءوز جانكۇيەرلەرىن قۋانتادى دەگەن ويدامىز.
