بەلگىلى قوناەۆتانۋشى وراز قاۋعابايدىڭ «اقىلماننىڭ بالالىق جانە جاستىق شاعى» اتتى كىتابىندا ماسكەۋدە وقىپ جۇرگەن دىنمۇحاممەد قوناەۆ دەمالىس الىپ, پويىزبەن ەلگە قايتىپ كەلە جاتقانىن جازادى. كورشى ۆاگوندا قارۋلى كۇزەتپەن كەلە جاتقان ساياسي تۇتقىندار ورنالاسقان ەدى.
ديماش احمەت ۇلى ەكى ۆاگوننىڭ تۇيىسكەن تۇسىنان سىرتقا قاراپ تۇرعاندا, تۇتقىنداردىڭ ءبىرى ونىڭ قالتاسىنا الدەبىر قاعازدى سۇڭگىتىپ ۇلگەرەدى. قوناەۆ الگى ازاماتتىڭ تەگىن ادام ەمەسىن ءبىلىپ, ۆاگونىنا كەلىپ, كونۆەرتتى اشىپ قاراسا, ءالىمحان ەرمەكوۆتىڭ ايەلىنە جازعان حاتى ەكەن. حاتتا ەتاپپەن ايدالىپ بارا جاتقان تۇرمەنىڭ مەكەن-جايى جازىلىپتى.
الەكەڭ بەيتانىس حات تاسۋشىعا ارناپ, الماتىداعى مەكەن-جايىن دا تولىق كورسەتكەن. سونىمەن قاتار «وسى حاتتى جەتكىز, باۋىرىم!» دەي كەلىپ, ءوزىنىڭ ءالىمحان ەرمەكوۆ ەكەنىن جازىپتى. ديماش احمەت ۇلى ماتەماتيكا وقۋلىعىنىڭ اۆتورى ءالىمحان ەرمەكوۆتىڭ ءومىربايانى مەن ەڭبەگىن جاقسى بىلەتىن. سوندىقتان دا, اماناتقا قيانات جاساماي, حاتتى الاش ارىسىنىڭ جارىنىڭ قولىنا تيگىزەدى.
ارادا زىمىراپ تالاي جىل وتەدى. الاش ارىسى ءالىمحان ەرمەكوۆ اقتالىپ, الماتىعا كەلەدى. ول كەزدە دىنمۇحاممەد قوناەۆ مينيسترلەر كەڭەسىنىڭ توراعاسى بولاتىن. ءالىمحان ەرمەكوۆ جۇمىس جانە باسپانا ماسەلەسىمەن توراعانىڭ قابىلداۋىنا جازىلادى.
ديمەكەڭ الاشورداشىلاردىڭ سوڭعى تۇياعىن قۇشاق جايا قارسى الىپ: ء«سىزدىڭ الماتىدا ەمەس, قاراعاندىدا تۇرعانىڭىز دۇرىس. مۇندا دۇشپاندارىڭىز كوپ. ولار جۇمىس ىستەتپەي, شەتقاقپاي بولاسىز», دەپ كەڭەسىن بەرەدى. سونداي-اق باياعىدا پويىزداعى حاتتى دا ەسىنە سالىپ, جەڭگەيگە اماناتتى تاپسىرىپ, العىسىن العانىن دا ايتادى.
الەكەڭ ورنىنان اتىپ تۇرىپ: «قۇداي تاعالا ماعان قايىرىمدى جىگىتتى تەككە كەزىكتىرمەگەن ەكەن», دەپ ءىنىسىن قۇشاقتاي الادى. ونىڭ اقىلىنا قۇلاق اسىپ, «قايداسىڭ, قاراعاندى؟» دەپ تۋعان جەرىنە اتتانىپ كەتە بارادى.
لەنيننىڭ الدىندا ايقاسقا ءتۇسىپ, قازاق شەكاراسىن شەگەندەۋ ىسىندە ەرلىك كورسەتكەن ءالىمحان ەرمەكوۆ پەن قازاقستاندى ۇزاق جىلدار بويى باسقارعان دىنمۇحاممەد قوناەۆتىڭ توسىننان جولىعۋى كەزدەيسوقتىق پا؟ ساياسي ساۋاتتى ديمەكەڭنىڭ «ساياسي تۇتقىن» سانالاتىن ەرمەكوۆتىڭ قۇپيا حاتىن جارىنا جەتكىزۋى باتىلدىق ەمەس پە؟ بۇل سۇراقتارعا وقىرماندار ءوزى جاۋاپ تابار دەپ ويلايمىز.
