سۋرەتتەردى تۇسىرگەن – گۇلنار ماحان
بۇل باستاما اكادەميك ەۆنەي بوكەتوۆتىڭ 100 جىلدىق مەرەيتويىنا «100 يگى ءىس» جوباسى اياسىندا جۇزەگە اسىرىلىپ وتىر. سونىمەن زاماناۋي كىتاپحانانىڭ سالتاناتتى اشىلۋ ءراسىمىن ەدىگە مۇحتار ۇلى, پروفەسسورلار بەيسەمباي ەرعالي ۇلى, جاندوس قوجاحمەت ۇلى جاساپ, قۇتتىقتاۋ لەبىزىن ءبىلدىردى.
ەدىگە مۇحتار ۇلى ۋنيۆەرسيتەتتىڭ جاڭا كىتاپحاناسىنا كلاسسيك جازۋشى مۇحتار ماعاۋيننىڭ 26 تومدىق تولىق جيناعىن, «قاسىم» كىتاپ ءۇيى شىعارعان بىرنەشە كىتاپتى سىيعا تارتتى.
– كىتاپحانا زامان تالابىنا ساي قۇرىلىپتى. ءتانتى بولدىق. الداعى ۋاقىتتا جاستاردىڭ ءىلىم-ءبىلىمىن شىڭداۋعا قىزمەت ەتە بەرسىن. بايقاعانىم, قاراعاندىعا ەلىمىزدىڭ باسقا دا وبلىستارىنان جاستار كەلىپ ءبىلىم الادى ەكەن. بوكەتوۆ ۋنيۆەرسيتەتى – ەلىمىزدەگى جەتەكشى وقۋ ورىندارىنىڭ ءبىرى. اكەمنىڭ بۇل ۋنيۆەرسيتەتكە, ەۆنەي ارىستان ۇلىنا قۇرمەتى بولەك ەدى. ەگەر اكەمنىڭ جاس كەزىندە تاۋلىك بويى جۇمىس ىستەيتىن وسىنداي كىتاپحانا بولسا, وندا قونا جاتار ەدى, – دەدى ەدىگە مۇحتار ۇلى.
كۇنى-ءتۇنى وقىرمانىنا اشىق كىتاپحانادان ستۋدەنتتەر مەن وقىتۋشىلار ىزدەنىستى ۇدەتىپ, عىلىمعا دەن قويۋعا مۇمكىندىك الادى.
– نەگىزگى ماقسات – جاس بۋىنعا تەرەڭ ءبىلىم بەرۋ. «اسا مارتەبەلى ستۋدەنت» دەگەندى ءجيى ايتامىز. بارلىق يگىلىك ستۋدەنتتەر ءۇشىن جاسالا بەرەدى دە. ماسەلەن, جاپونيا, امەريكا سىندى دامىعان ەلدەردە كىتاپحانانىڭ 24 ساعات جۇمىس ىستەيتىنىن كوردىم. ال بىزدە 18:00-دە جابىلىپ قالادى. كەيىنگى كەزدە «جاستارعا دۇرىس جاعداي جاساماي ءجۇرمىز بە؟» دەگەن وي مازالاي بەردى. نەگە مۇمكىندىك تۋدىرماسقا؟ مىنە, بۇعان دا جەتتىك. بۇل كىتاپحانا تاۋلىك بويى جۇمىس ىستەيدى. الداعى ۋاقىتتا بارلىق فاكۋلتەتتىڭ كىتاپحانالارىن جاڭعىرتۋ جوسپاردا بار, – دەدى ۋنيۆەرسيتەت رەكتورى نۇرلان دۋلاتبەكوۆ.
رەكتور نۇرلان ورىنباسار ۇلى ەدىگە مۇحتار ۇلىنا ۋنيۆەرسيتەت اتىنان ەستەلىك سىيلىق تابىستاپ, رازىلىعىن ءبىلدىردى. سونىمەن قوسا كىتاپحاناعا جازۋشى كەمەل توقاەۆتىڭ ەڭبەكتەرىن تارتۋ ەتتى. فاكۋلتەت ۇجىمى ەدىگە ماعاۋينگە «تەرەڭگە تارتقان تامىرىن» اتتى بيوگرافيالىق كىتاپ سىيلادى.
جاڭا كىتاپحانانىڭ تسيفرلىق جۇيەگە نەگىزدەلۋى ءبىلىم الۋشىلاردىڭ ۋاقىتىن ۇنەمدەپ, ىزدەنىسىن جەڭىلدەتۋگە زور مۇمكىندىك بەرەدى. ID كارتالار ارقىلى قاجەتتى كىتاپتى ءوز بەتىنشە تاۋىپ, قولدانۋ – ۋاقىت تالابىنا ساي جاسالعان ءتيىمدى شەشىم.
– كىتاپحانا ءبىر مەزەتتە 100 ادامعا دەيىن قابىلداپ, ساپالى قىزمەت كورسەتە الادى. قورىندا 200 مىڭنان استام كىتاپ بار. نەگىزگى زالعا ەۆنەي ارىستان ۇلى مەن وقۋ ورداسىنىڭ ءوسىپ-وركەندەۋىنە ۇلەس قوسقان عالىمداردىڭ پورترەتتەرىن ىلدىك. جوبا بۇعان دەيىن ۋنيۆەرسيتەتتىڭ 13 فاكۋلتەتىنىڭ ۇشەۋىندە جۇزەگە اسىرىلعان. بۇل – ءتورتىنشىسى. ارقايسىسى ءبىر-بىرىنە ۇقسامايتىن ستيلدە. فيلولوگيا جانە فيلوسوفيا فاكۋلتەتىندە ورنالاسقاندىقتان, ەتنو-ستيل تاڭدالدى. كەلەسى كىتاپحانا شەت تىلدەرى فاكۋلتەتىندە جابدىقتالماق, – دەيدى ۋنيۆەرسيتەتتىڭ عىلىمي كىتاپحانا ديرەكتورى گاۋھار قۋانىشقىزى.
كىتاپحانا سەگىز بولىكتەن تۇرادى. كونفەرەنتسيا زالى, جەكە جۇمىس, سيرەك قور, مۋلتيمەديالىق رەسۋرستار, ەتنوايماق, ابونەمەنت, كىتاپ قورى جانە وقۋ زالى. اسىرەسە Wi-Fi جەلىسىمەن قامتىلىپ, تسيفرلىق جۇيەنىڭ ەنگىزىلۋى ءبىلىم الۋشىلارعا تاپتىرماس كومەك. عىلىممەن اينالىساتىن جاندارعا ارنالعان سيرەك كىتاپتار قورىندا ەكى مىڭعا جۋىق كىتاپ بار.
بەلگىلى كاسىپكەر, اتىمتاي ازامات ەرلان ءاشىم «قاسىم» كىتاپ ءۇيى باسىپ شىعارعان كىتاپتاردى جاڭا كىتاپحانا قورىنا سىيلادى.
سونداي-اق ۋنيۆەرسيتەتتە «الاش» كوۆوركينگ-ورتالىعى اشىلدى. جاڭا ورتالىقتا ىڭعايلى جۇمىس ايماعى, تەگىن Wi-Fi جانە ءدامدى كوفەحانا قاراستىرىلعان. مۇندا ستۋدەنتتەر وقۋ كەزدەسۋىن وتكىزەدى. جوبالارمەن جۇمىس ىستەيدى ءارى ءۇزىلىس كەزىندە دەمالۋ ءۇشىن تاپتىرماس ورىن.
قاراعاندى وبلىسى
