اۆتورلىق قۇقىق «KEGOC» اق-عا تيەسىلى
«KEGOC» كومپانياسىنىڭ قاراماعىندا مىڭداعان شاقىرىمدى قۇرايتىن جوعارى كەرنەۋلى ەلەكتر جەلىلەرى بار. دالىرەك ايتقاندا, ۇلتتىق ەلەكتر تورابىن قۇرايتىن, ۇزىندىعى شامامەن 27 مىڭ شاقىرىمنان استام 220–1150 كۆ كەرنەۋلى ەلەكتر جەلىلەرى مەن 83 قوسالقى ەلەكتر ستانساسى ۇزدىكسىز جۇمىس ىستەيدى. بۇل ەلەكتر جەلىسىنىڭ سەنىمدى جۇمىس ىستەۋى ءۇشىن كومپانيا جىل سايىن جوندەۋ-پايدالانۋ جۇمىستارىن جۇرگىزەدى.
ناۋرىز مەيرامى قارساڭىندا «KEGOC» اق باسقارما توراعاسىنىڭ ورىنباسارى باقىتحان جازىقباەۆتىڭ توراعالىعىمەن وتكەن ەڭبەك قاۋىپسىزدىگى جانە قاۋىپسىزدىك تەحنيكاسى بويىنشا جينالىستا وتكەن كەزەڭدەگى جۇمىستار قورىتىندىلانىپ, كەزەكتى ماۋسىمعا دايىندىق بارىسى پىسىقتالدى.
«KEGOC» اق ۇجىمىنىڭ ۇيلەسىمدى جۇمىسىنىڭ ناتيجەسىندە, 2024-2025 جىلدارداعى كۇزگى-قىسقى كەزەڭدى ويداعىداي ءساتتى وتكەردىك. ەلىمىز قاتاڭ كونتينەنتتىك كليماتىمەن ەرەكشەلەنەدى, قىسى سۋىق, جازى ىستىق. ياعني كۇزگى-قىسقى كەزەڭ – ەنەرگەتيكتەردىڭ بىلىكتىلىگى مەن دايىندىعى سىنالاتىن ۋاقىت. جىلدار بويى جيناقتالعان تاجىريبە بەن ءبىلىمنىڭ ارقاسىندا بۇل جولعى قيىن كەزەڭدى دە ءساتتى اياقتادىق. ءبىر اتاپ وتەرلىگى, بيىل الدىڭعى كەزەڭمەن سالىستىرعاندا تەحنولوگيالىق بۇزۋشىلىقتار سانى 54%-عا ازايدى. بۇل – 39 جاعداي 18 جاعدايعا دەيىن قىسقاردى دەگەن ءسوز. ال ەلەكتر ەنەرگياسىن تولىمسىز بوساتۋ كولەمى 2,5 پايىزعا ازايدى», دەپ اتاپ ءوتتى باقىتحان جازىقباەۆ.
بيىل دا كۇن جىلىنا سالىسىمەن, ءساۋىر ايىنان باستاپ «KEGOC» ەنەرگەتيكتەرى كەزەكتى جوندەۋ ناۋقانىنا كىرىستى. اسىرەسە وڭتۇستىك ايماقتاردا جوندەۋ جۇمىستارى قارقىندى جۇرگىزىلىپ جاتىر.
«KEGOC» اق ەلەكتر جەلىلەرىن 2025-2026 جىلدارداعى كۇزگى-قىسقى كەزەڭگە دايىنداۋ ءۇشىن بيىل 99 ەلەكتر جەلىسى مەن 43 قوسالقى ستانساسى جابدىعىنا جوندەۋ جۇمىستارىن جۇرگىزۋ جوسپارلانىپ وتىر. جوندەۋ جۇمىستارى بەكىتىلگەن جابدىقتار مەن اۋە جەلىلەرىن اجىراتۋ كەستەلەرىنە سايكەس جۇرگىزىلەدى.
«ەڭ الدىمەن وندىرىستىك قاۋىپسىزدىكتى ارتتىرۋعا باسا نازار اۋدارامىز. «KEGOC» كومپانياسىندا ەڭبەكتى قورعاۋدىڭ ءتيىمدى جۇيەسى قۇرىلعان. وعان باسشىلاردىڭ «Health & Safety» سالاسىنداعى جەكە جاۋاپكەرشىلىگى دە كىرەدى. بۇل جۇيە قىزمەتكەرلەرگە قاۋىپتى جاعدايلار انىقتالعان جاعدايدا جۇمىستى توقتاتۋ قۇقىعىن بەرەدى. سونىڭ ناتيجەسىندە جاراقاتتانۋ جانە ءولىم-ءجىتىم كورسەتكىشتەرى ايتارلىقتاي تومەندەدى. ال كەيىنگى 15 جىلدا بىردە-ءبىر ءورت وقيعاسى تىركەلگەن جوق. بۇل سوزىمىزگە دالەل, كەيىنگى جىلدارى «KEGOC» وندىرىستىك قاۋىپسىزدىك سالاسىندا «سامۇرىق-قازىنا» اق پورتفەلدىك كومپانيالارى اراسىندا كوشباسشىلاردىڭ قاتارىندا كەلەدى», دەيدى باقىتحان جازىقباەۆ.
«KEGOC» بيىلعى جوندەۋ جۇمىسىن قازان ايىنا دەيىن اياقتاۋدى جوسپارلاپ وتىر. جوندەۋ جۇمىسىنىڭ قورىتىندىسى مەن كەزەكتى جىلىتۋ ماۋسىمىنا دايىندىعىن راستايتىن پاسپورت بەرىلەدى. رەسمي قۇجاتتى ۋاكىلەتتى ورگان – ەنەرگەتيكا مينيسترلىگىنىڭ اتومدىق جانە ەنەرگەتيكالىق قاداعالاۋ مەن باقىلاۋ كوميتەتى تابىستايدى. بۇل كومپانيانىڭ قىسقى ماۋسىمعا دايىندىعىن كورسەتەدى.
