سۋرەت: vk.com
شىنىندا, ەڭ ۇلكەن وكىنىش – سانا قاراڭعىلىعىندا وتكەرگەن ۋاقىت ەكەن. بارىنە قول جەتكىزۋگە بولادى, بىراق از اقىلدىڭ ازابىمەن, ساعىم قۋىپ ساندالىپ وتكەن ۋاقىتتىڭ وكىنىشى قاتتى. بۇل وكىنىشتەن اقىلى ارشىلا باستاعان ءار جان قۇر قالماسى انىق.
ون جاسىنان اكەسىنىڭ كىتاپحاناسىن ۇرلانا وقىعان پۋشكين وقۋعا ەرتە باس قويىپتى. فرانتسۋز ءتىلىن جەتىك مەڭگەرگەن ول, بالا كۇنىندە-اق فرانتسۋز ادەبيەتىمەن ەتەنە تانىسىپ, ليتسەيگە تۇسكەندە لاتىن, گرەك ءتىلىن مەڭگەرىپ, وۆيدي مەن ۆەرگيليدى تۇپنۇسقادان وقىپتى. ونىمەن قوسا, اعىلشىن, يتاليالىق, نەمىس, يسپان تىلدەرىن ۇيرەنىپ, قۇندى شىعارمالارعا ءتول تىلىندە باس قويىپتى. ءومىر بويى بىلىمقۇمارلىقتان ءبىر تانباي, قايدا بارسا دا قويىن-قونىشىندا كىتاپ ءجۇرىپتى, كىتاپحاناسىندا 14 تىلدەگى ءارتۇرلى قولجازبالار ورىن العان.
وتىز بەس جاسىندا اقىلىنا ساۋلە قونىپ, قالت ويانعان اباي, وركەنيەتتى ەل تۇلعالارىنىڭ ومىربايانىمەن تانىسىپ, قايعىدان قان جۇتىپ جىر جازادى.
«جاسىمدا عىلىم بار دەپ ەسكەرمەدىم,
پايداسىن كورە تۇرا تەكسەرمەدىم.
ەرجەتكەن سوڭ تۇسپەدى ۋىسىما,
قولىمدى مەزگىلىنەن كەش سەرمەدىم».
راسىندا, ابايداي تۇلعا وركەنيەتكە جەتكەن ەلدە تۋىپ, پۋشكين سەكىلدى ون جاسىنان اقىل-وي الىپتارىمەن قۇنىعا سۋسىنداسا قالاي بولماق ەدى؟ وندا قازاق ساناسى بۇگىنگىدەن ون ەسە بيىك بولار ما ەدى؟ اسىرە دىنشىلدىككە قامالماي, ەۋروپانىڭ ءزاۋلىم ونەرىنە, گرەك-ءريمنىڭ تۇنىق باستاۋلارىنا قۇمارتىپ جوعارعى وي مۇناراسىنا قارىشتار ما ەدى؟
اۋىل اراسىندا بولىستىقتىڭ شالىعىمەن جاس ءومىرىن وتكەرگەن شاكارىم قۇدايبەردى ۇلى الەمنىڭ جارىعىن سەزىنگەن سوڭ قالىڭ وكىنىش تۇمانىنا ەنەدى.
«جيىرما مەن قىرىق اراسى,
جاس ءومىردىڭ ساراسى.
بوس وتكەنىن قاراشى,
جۇرەككە توگىپ قاندى ءىرىڭ».
قالاي قاراساق تا, سوكراتتىڭ سوزىندە شىندىق بار. «جالعىز عانا يگىلىك بار, ول – ءبىلىم, جالعىز قانا جاماندىق بار, ول – ناداندىق». ال وكىنىشتىڭ ۇلكەنى...
