فوتو: ۇكىمەتتىڭ ءباسپاسوز قىزمەتى
«تسيفرلاندىرۋ – تۋريستىك سالانى دامىتۋدىڭ تاعى ءبىر ماڭىزدى باعىتى. ءتۋريزمنىڭ بىرىڭعاي تسيفرلىق ەكوجۇيەسىن قۇرۋ ماسەلەسى ءپىسىپ-جەتىلدى. وسى ورايدا TravelStan قوسىمشاسىنىڭ جاسالۋى – وتە وزەكتى. سەرۆيس نارىقتىڭ بارلىق قاتىسۋشىلارىن بىرىكتىرە وتىرىپ, تۋريستەردىڭ ساپالى ءارى سەنىمدى قىزمەتتەرگە قول جەتكىزۋىنە كەپىلدىك بەرەدى. وتكەن جىلى Your tourist pass جوباسى باستالدى. بۇل قۇرال QR-كودتى سكانەرلەۋ ارقىلى ۇلتتىق تۋريستىك پورتالعا, eQonaq كوشى-قون سەرۆيسىنە, تاكسي قىزمەتىنە جانە باسقا دا پايدالى رەسۋرستارعا بىرىڭعاي قول جەتكىزۋدى قامتاماسىز ەتەدى. بۇعان قوسا, الەمنىڭ كوپتەگەن ەلدەرىندە كەڭىنەن تانىمال Tax Free پيلوتتىق جوباسى دا جاقسى ناتيجە كورسەتىپ وتىر», دەدى ولجاس بەكتەنوۆ.
پرەمەر-مينيستر تۋريزم جانە سپورت مينيسترلىگىنە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, ءۇش اي مەرزىمدە ءتۋريزمنىڭ بىرىڭعاي تسيفرلىق ەكوجۇيەسىن قۇرۋ جونىندەگى ناقتى ءىس-شارالار جوسپارىن بەكىتۋدى تاپسىردى. كۋرورتتىق ايماقتار مەن تابيعي پاركتەردىڭ باس جوسپارلارىن تسيفرلاندىرۋعا ەرەكشە نازار اۋدارۋ قاجەت. سونداي-اق ۇلتتىق تۋريستىك پورتالعا كىرۋگە مۇمكىندىك بەرەتىن QR-كودتاردى اۋەجايلاردا, ۆوكزالدار مەن شەكارا بەكەتتەرىندە, تۋريستەر كوپ جينالاتىن جەرلەردە ورنالاستىرۋ قاجەتتىگى اتاپ ءوتىلدى.
سونىمەن قاتار تۋريزم جانە سپورت مينيسترلىگىنىڭ الدىنا قارجى مينيسترلىگىمەن بىرلەسىپ, «Tax Free» تەتىگىن ەنگىزۋدىڭ ناقتى الگوريتمىن ازىرلەۋ مىندەتى قويىلعان. بۇل قۇرالدى تۋريستەرگە ىڭعايلى بولۋى ءۇشىن, اسىرەسە اۋەجايلاردا قاراجاتتى قايتارۋ تەتىگىن ىسكە اسىرۋ ءۇشىن تولىعىمەن تسيفرلاندىرىپ, اۆتوماتتاندىرۋ كەرەك.
ايتا كەتەيىك, ۆيزا ماسەلەسىنە ەرەكشە نازار اۋدارىلدى. وتىنىمدەر بەرۋدىڭ بارلىق راسىمدەرىن تولىعىمەن تسيفرلاندىرۋ ارقىلى Neo Nomad Visa-نى تانىمال ەتۋ تاپسىرىلدى. تۋريزم جانە سپورت مينيسترلىگى مادەنيەت, سىرتقى ىستەر مينيسترلىكتەرىمەن بىرلەسىپ, ەل ىشىندە جانە شەتەلدەردە قازاقستاننىڭ تۋريستىك الەۋەتى تۋرالى بەلسەندى اقپاراتتىق ناۋقان جۇرگىزۋدى قامتاماسىز ەتۋ مىندەتتەلدى.
