كاسىپقوي بوكستا جەڭىلىپ كورمەگەن, 16 جەكپە-جەك وتكىزىپ, 11 ايقاسىنا نوكاۋتپەن نۇكتە قويعان جانىبەك ءالىمحان ۇلى كەزەكتى جەڭىسىن ەنشىلەدى. قارسىلاسى فرانتسيالىق اناۋەل نگاميسسەنگە دە – كاسىپقوي بوكستا 13 جەكپە-جەك وتكىزىپ, بارلىعىندا جەڭىسكە جەتكەن جامپوز.
ايقاس الدىنداعى ءباسپاسوز ءماسليحاتىندا نگاميسسەنگە: «مەن ءوزىمنىڭ الەۋەتىمدى پاش ەتۋگە كەلدىم, ورتا سالماقتا چەمپيوندىق بەلبەۋدەن ءۇمىتىم زور», دەپ كوكەيىندەگىسىن اقتارىپ سالعان ەدى. جانىبەك جانكۇيەرلەرىنە شوۋ سىيلايتىنىن ايتقان-دى.
راسىندا دا ايتا جۇرەر ايقاس ءوتتى. 12 راۋندقا راسىمدەلگەن جەكپە-جەك ءتىپتى 1-راۋندتا تۇگەسىلە جازدادى. جانىبەكتىڭ جويقىن سوققىسىنان ەسەڭگىرەپ قالعان قارسىلاسى نوكداۋن العان ەدى, الايدا گونگ ءۇنى قۇتقارىپ كەتتى. ەكەۋى دە سولاقاي بولعاندىقتان, ۇرىمتال تۇستى كوپ اڭدىستى. جانىبەك قورعانىستا قىمتانىپ الماي, اشىق ۇرىسقا شاقىرىپ, قارسىلاسىن قامشىلاپ وتىردى دا, 5-راۋندتا شىقشىتتان ەكى مارتە سوعىپ سۇلاتىپ ءتۇسىردى.
ء«سوز جوق, جانىبەك تالانتتى بوكسشى, ورتا سالماقتىڭ سەركەسى ەكەنىن مويىندايمىن. مەنىڭ ماقساتىم – تاۋەكەلگە بارۋ. قارسىلاستىڭ قارىمىنان جۇرەكسىنبەي ايقاستىم. ساراپشىلار مەنى ايقاستىڭ الدىندا-اق «وڭاي ولجا» دەپ باعالاپ, 3-راۋندتان اسا المايتىنىما ساۋەگەيلىك تانىتتى. راس, جەڭىلىسكە ەشكىمدى ايىپتامايمىن. ۇزاق ۋاقىت ازىرلىك وتكىزدىم, جەڭەمىن دەپ ۇمتىلدىم. الايدا قارسىلاسىمنىڭ دەڭگەيى مەن ويلاعاننان دا جوعارى ەكەن. كاسىپقوي بوكستاعى العاشقى جەڭىلىسكە ءىشىم اشيتىنى, كوڭىلىم قۇلازيتىنى راس, بىراق وراسان تاجىريبە جينادىم», دەدى ا.نگاميسسەنگە.
اناۋەل 5-راۋندتا رەفەريدىڭ جەكپە-جەكتى توقتاتقانىنا شاعىم ايتپايتىنىن دا جەتكىزدى. «تورەشىنىڭ شەشىمىن قۋاتتايمىن. مەن ەت قىزۋىمەن ايقاستى جالعاستىرسام, بۇدان دا اۋىر سوققىلار الىپ, دەنساۋلىعىمدى ءتىپتى قۇرتىپ الاتىنىم داۋسىز ەدى», دەگەن بوكسشى جانىبەككە ساتتىلىك تىلەدى.
جەكپە-جەكتەن كەيىن جانىبەك ءالىمحان ۇلى قولداۋ كورسەتكەن بارشا جانكۇيەرگە ريزاشىلىق ءبىلدىردى. «قۇرمەتتى جەرلەستەر, بۇل ءبىزدىڭ كوماندانىڭ عانا جەڭىسى ەمەس, ەلدىڭ ورتاق جەتىستىگى. ءبىز مۇنىمەن توقتامايمىز, ەنشىمىزدە ەكى بىردەي تۇجىرىمنىڭ چەمپيوندىق بەلبەۋى بار, ءالى باسقا تۇجىرىمداردىڭ دا بەلبەۋىن الامىز. ءبىزدىڭ ءوز ەلىمىزدە وسىنداي جەكپە-جەك وتكىزۋگە مۇرىندىق بولعان ۇيىمداستىرۋشىلارعا, الاڭسىز جاتتىعۋعا مۇمكىندىك تۋدىرعان جاناشىر ازاماتتارعا العىس ايتامىن», دەدى.
مەنەدجەر بەرىك سۇلتان بۇل ايقاسقا ازىرلىكتى شىمكەنت قالاسىندا جۇرگىزگەنىن ايتتى. سپاررينگ وتكىزۋگە ۇلتتىق قۇراما مۇشەلەرى امان قونىسباەۆ, نۇرقانات رايىس, بەكسۇلتان ماناپ سەكىلدى بوكسشىلاردىڭ سەپتىگى تيگەنىن ءمالىم ەتتى.
قوس بوكسشىنىڭ سپورتتىق جىلناماسىندا سايكەستىك بار. ەكەۋى دە 2016 جىلى ريو وليمپياداسىنا 75 كگ سالماق دارەجەسىندە قاتىستى. اناۋەل ول كەزدە ءوزىنىڭ اتاجۇرتى كونگو مەملەكەتىنىڭ نامىسىن قورعاعان ەدى. الايدا العاشقى اينالىمدا الجيرلىك يلياس ابباديگە ەسە جىبەردى. جانىبەك سول ءابباديدى شيرەك فينالعا شىعاردا ايقىن جەڭگەن بولاتىن.
استاناداعى كاسىپقوي بوكس كەشىنىڭ اياسىندا ياعني اندەركاردتا بىرنەشە ساڭلاق جەكپە-جەك وتكىزدى. جارتىلاي ورتا سالماقتا جەرلەسىمىز الىشەر ءابدۋالىم ۇندىستاندىق اشيش ءچاۋدحاريدى ۇپاي باسىمدىعىمەن ەڭسەردى. كاسىپقوي بوكستا بۇعان دەيىن 3 مارتە ايقاسقا ءتۇسىپ, ەكەۋىندە نوكاۋتپەن ۇتقان الىشەردىڭ سوققىلارىنا قارسىلاسى توتەپ بەردى. وكىنىشكە قاراي, اقنيەت ءالىمباي (جارتىلاي ورتا سالماق) چەحيالىق يوزەف دۋبسكيگە ەسە جىبەردى. جارتىلاي ورتا سالماقتا ءوزىنىڭ دەبيۋتتىك جەكپە-جەگىنە شىققان تورەحان سابىرحان چەح بوكسشىسى يرجي حاۋكەنى 3-راۋندتا تەحنيكالىق نوكاۋتپەن ۇتتى. وزبەكستاندىق وتابەك حولماتوۆ فيليپپيندىك دجەيسون كانو مانيگوستى 8-راۋندتا نوكاۋتپەن جەڭدى. جەڭىل سالماقتا سىنعا تۇسكەن جەرلەسىمىز بالاۋسا مۇزدىمان فيليپپين قىزى ماريا تەرەزا پينيليدەن ۇپاي سانىمەن باسىم ءتۇستى. ەكىنشى جەڭىل سالماقتا باعىن سىناعان ماحمۇد سابىرحان ۆەتنامدىق دانگ داك ءحاينحتى 2-راۋندتا تەحنيكالىق نوكاۋتپەن ۇتتى. ماحمۇدتىڭ قارسىلاسى ايقاسقا ءبىر كۇن قالعاندا اۋىستى. ءاۋ باستا كولۋمبيالىق نيكولاس توردەسياليامەن تارتىسقا تۇسەتىنى بەلگىلى بولعان. الايدا ۇيىمداستىرۋشىلار «وتكەل ۇستىندە ات اۋىستىرىپ» حاينحتى الدىردى.
ءبىرىنشى ورتا سالماقتا باتىر جۇكەمباەۆ (23-1, 17 كو) پەن بريتاندىق كەين گاردنەردىڭ (17-4, 7 كو) جەكپە-جەگى 10 راۋندقا ۇلاسىپ, تورەشىلەردىڭ شەشىمىمەن باتىر جەڭىسكە جەتتى. «ەلىمىزدە ءدال مۇنداي اۋقىمدا ۇيىمداستىرىلعان بوكس كەشىندە سايىسقا ءتۇسۋ ماعان زور مارتەبە بولدى. قارسىلاسىم وسال ەمەس, نوكاۋتپەن جەڭسەم دەپ جوسپارلادىم, بىراق قورعانىسى مىعىم كەين كوپ سوققىمدى دارىتپادى. 5 ءساۋىر – مەنىڭ تۋعان كۇنىم. ءتول مەرەكەمدە وزىمە ءوزىم سىي جاساعانداي بولدىم», دەدى باتىر.
سپورت كەشەنىنە جينالعان قالىڭ جانكۇيەر دە, كوگىلدىر ەكرانعا كوز سۋارىپ بوكس كەشىن تىكەلەي ەفيردەن تاماشالاعان كورەرمەن دە ەكى دۇركىن وليمپيادا چەمپيونى, اۋەسقوي بوكستا ءجۇرىپ تە كاسىپقوي جەكپە-جەككە 14 رەت ءتۇسىپ, بارلىق ايقاسىن نوكاۋتپەن ۇتقان وزبەكستاندىق ساڭلاق ءباحادۇر جالولوۆ نوكاۋتپەن جەڭەدى دەپ سەنگەن ەدى. الايدا ۋكراينالىق يگور شەۆادزۋتسكي (12-2, 10 كو) 10 راۋندتىق جەكپە-جەكتە ءباحادۇردىڭ جويقىن سوققىسىنا توتەپ بەردى. تورەشىلەر راۋند سايىن شابۋىلداعانىن ەسكەرىپ, وزبەك بوكسشىسىنىڭ ەنشىسىنە جەڭىس جازدى.
IBF Intercontinental تۇجىرىمى بويىنشا ەكىنشى ورتا سالماقتاعى جەكپە-جەك جەرلەسىمىز سۇلتان زاۋربەك (19-0, 13 كو) پەن وڭتۇستىك افريكا رەسپۋبليكاسىنىڭ بوكسشىسى ازينگا فۋزيلە 18-2, 12 كو) اراسىندا ءوتىپ, 10 راۋندتىڭ قورىتىندىسىندا سۇلتان جەڭىسكە جەتتى.
ەلوردا تورىندەگى كاسىپقوي بوكس كەشىن «Nomad Promotions» كومپانياسى ۇيىمداستىردى. بىلتىر عانا قۇرىلعان كومپانيا كەلەشەكتە كاسىپقوي بوكس جۇلدىزدارىنىڭ باسىن قوسىپ, اۋقىمدى ايقاس وتكىزۋدى جوسپارلاپ وتىر. پروموۋتەرلىك ۇجىم 30 جىلدان بەرى كاسىپقوي بوكس ورىسىندە ەڭسەلى ىستەردى يگەرىپ جۇرگەن بريتاندىق «Excelsior Sports Club» ۇيىمىمەن تىعىز ىنتىماقتاستىق ورناتقان.
