اتىراۋ وبلىسىندا اناسىن ولتىرگەن جىگىت 8 جىلعا سوتتالدى

اتىراۋ. 11 اقپان. اتىراۋ وبلىسىندا ءوز اناسىن ولتىرگەن جىگىتتى 8 جىلعا سوتتاۋعا شىعارىلعان ۇكىم كۇشىنە ەندى. بۇل تۋرالى اتىراۋ وبلىستىق سوتىنىڭ ءباسپاسوز قىزمەتى حابارلادى. «ماحامبەت اۋداندىق سوتى قىلمىستىق كودەكستىڭ 103-بابىنىڭ 3-بولىگىمەن (دەنساۋلىققا قاساقانا اۋىر زيان كەلتىرۋ) سوتتالۋشى الەكساندر بازاروۆقا قاتىستى قىلمىستىق ءىستى قارادى. سوتتالۋشى ا.بازاروۆ 2014 جىلدىڭ 10 قاراشاسىندا 23.00 ساعات شاماسىندا ماس كۇيىندە اقتوعاي اۋىلىنداعى ۇيىنە كەلىپ, دەمالىپ جاتقان اناسىنا تيىسەدى. انا مەن بالا اراسىندا ۇرىس-كەرىس تۋىندايدى. اقىلىن اراق جەڭگەن الەكساندر اناسىن سوققىعا جىعادى. ونىمەن قويماي, ءىلۋلى تۇرعان ساعاتپەن باسىنان بىرنەشە رەت ۇرىپ, اياعىمەن وڭ جاق قابىرعاسىنان, موينىنان جانە باسىنان تەپكىلەيدى. ۇلىنىڭ قاتىگەز قىلىعىنا شىداي الماعان انا سول جەردە ماڭگىلىككە كوز جۇمادى», دەپ حابارلادى وبلىستىق سوتتىڭ ءباسپاسوز حاتشىسى بورانباي عاليەۆ. باستى سوت تالقىلاۋىندا سوتتالۋشى وزىنە تاعىلىپ وتىرعان ايىپتى تولىعىمەن مويىنداعان. ءوزىنىڭ جاساعان ءىس-ارەكەتى ءۇشىن شىن جۇرەكتەن وكىنەتىنىن ايتىپتى. سوت جازا تاعايىنداۋ كەزىندە قىلمىستىڭ سيپاتى مەن قوعامعا قاۋىپتىلىك دارەجەسىن, ايىپكەردىڭ جەكە باسىن, سونىمەن بىرگە, ونىڭ قىلمىس جاساعانعا دەيىنگى جانە ودان كەيىنگى مىنەز-قۇلقىن, جاۋاپتىلىق پەن جازانى جەڭىلدەتەتىن جانە اۋىرلاتاتىن ءمان-جايلار تۋرالى قاعيدانى باسشىلىققا الا وتىرىپ, وعان جوعارىدا اتالعان باپ بويىنشا 8 جىل مەرزىمگە باس بوستاندىعىن ايىرۋ جازاسىن تاعايىندادى. سوت ۇكىمى زاڭدى كۇشىنە ەندى. جولداسبەك شوپەعۇل. دەرەك: اتىراۋ وبلىستىق سوتىنىڭ ءباسپاسوز قىزمەتى. سۋرەت: news.nur.kz.