تۇركسوي باس حاتشىسى سۇلتان راەۆپەن وتكەن اڭگىمە بارىسىندا اقتاۋدىڭ تۇركى الەمىنىڭ مادەني استاناسى رەتىندە تاڭدالۋىنىڭ سيمۆولدىق مانىنە ەرەكشە نازار اۋدارىلدى. سۇلتان راەۆ ءمينيستردى وسى ماڭىزدى وقيعامەن قۇتتىقتاپ, بۇل مارتەبەنىڭ ماڭىزى تەك قازاقستان ءۇشىن عانا ەمەس, بۇكىل تۇركى ەلدەرى ءۇشىن اسا جوعارى ەكەنىنە توقتالدى. تاراپتار تۇركى الەمى ەلدەرى اراسىنداعى مادەنيەت پەن رۋحاني مۇرا سالاسىنداعى ديالوگتى تەرەڭدەتۋدىڭ ماڭىزدىلىعىن اتاپ ءوتتى.
تۇركى اكادەمياسىنىڭ پرەزيدەنتى شاحين مادجيدوعلى مۋستافاەۆپەن كەزدەسۋ بارىسىندا عىلىمي جانە تاريحي-مادەني ىنتىماقتاستىق ماسەلەلەرى تالقىلاندى. اتاپ ايتقاندا, تۇركى وركەنيەتى ءۇشىن ەرەكشە ماڭىزعا يە ەجەلگى سارايشىق قالاشىعىنىڭ اۋماعىندا ارحەولوگيالىق جانە ەتنوگرافيالىق سيمپوزيۋم ۇيىمداستىرۋ ماسەلەسى قاراستىرىلدى.
ۆەنگريا ۇكىمەتىنىڭ كوميسسارى پەتەر حوپپالمەن وتكەن كەزدەسۋدە قازاقستان مەن ۆەنگريا اراسىنداعى مادەني جانە گۋمانيتارلىق ىنتىماقتاستىقتى دامىتۋ ماسەلەلەرى ءسوز بولدى. اتاپ ايتقاندا, مادەني ءىس-شارالارعا (فەستيۆالدەر, كونتسەرتتەر, كورمەلەر جانە ءبىلىم بەرۋ باعدارلامالارى) شىعارماشىلىق ۇجىمداردىڭ قاتىسۋى ماسەلەسى تالقىلاندى. سونىمەن قاتار, ەكى ەل مۋزەيلەرى اراسىندا ەكسپوزيتسيالارمەن الماسۋ جانە بىرلەسكەن عىلىمي جوبالاردى جۇزەگە اسىرۋ ارقىلى ىنتىماقتاستىق ورناتۋ جايى دا نازاردان تىس قالعان جوق.
قىرعىز رەسپۋبليكاسىنىڭ مادەنيەت, اقپارات جانە جاستار ساياساتى ءمينيسترى ميربەك مامبەتاليەۆپەن وتكەن كەزدەسۋ بارىسىندا تاراپتار ەكىجاقتى مادەني جانە اقپاراتتىق ىنتىماقتاستىقتى جانداندىرۋعا دەگەن نيەتىن راستادى. اتاپ ايتقاندا, قىرعىزستاندىق ارتىستەر مەن مادەنيەت قايراتكەرلەرىنىڭ حالىقارالىق فەستيۆالدەرگە, تەاتر قويىلىمدارى مەن وزگە دە مادەني ءىس-شارالارعا قاتىسۋ جوسپارى ناقتى تالقىلاندى.
كەزدەسۋلەر سەنىم مەن ءوزارا تۇسىنىستىك رۋحىندا ءوتىپ, تۇركى الەمىنىڭ باي مۇراسىن بىرلەسىپ ناسيحاتتاۋ, مادەني بايلانىستاردى نىعايتۋ مەن حالىقارالىق سەرىكتەستىكتى دامىتۋ جولىنداعى ورتاق ۇمتىلىستىڭ ايقىن كورىنىسىنە اينالدى.
