سۋرەتتى تۇسىرگەن – قايسار شەرىم
– نە بولىپ قالىپتى, تۇگە؟ – دەدى قاريا كىرجيىپ.
– كەيدە تىم ارتىق كەتىپ قالاسىڭ. سوڭىڭنان كەلە جاتقان, ءبىراز جاسقا كەلگەن ۇلىڭدى ءالى بالا كورەسىڭ. ء«ىستىڭ كوزىن تاپپايسىڭ» دەپ بالا-شاعانىڭ كوزىنشە تۇقىرتۋ بىزگە ەندى جاراسپايدى. ءوز تىرلىگىنە مىعىم جان وسىنداي-اق بولسىن. بالامىزدىڭ ءيىنى جۇمساق, اتا-انا سىيلاپ قالعان, باسقا بولسا سەندەي اكەمەن باياعىدا-اق ءجۇز شايىسىپ, ءوز جولىمەن كەتەر ەدى, – دەدى كەمپىر.
– ءاي, سەن جايىڭا وتىر, اقىل ۇيرەتپەي ادامعا, – دەدى قاريا كەمپىرىنە ءتۇسىن سۋىتا قاراپ, – بالاما ۇرىسسام ادام بولسىن, تىرلىگىنە ماككامدىق تانىتسىن دەيمىن. جەككورگەننەن ۇرىسپايمىن. نە دەسەم دە ءوز بالام, ون جەردەن جاسى ۇلعايسا دا مەن ءۇشىن ءسابي. ىسىنە ۇقىپتى بولسا دا, ودان سايىن شيرىقتىرىپ, شيراتا ءتۇسۋ ارتىق ەتپەيدى.
– مەن ساعان ۇلىڭا وڭاشادا ايت, بىراق بالا-شاعانىڭ الدىندا ارتىق كەتپە دەپ وتىرمىن. سەن وزەۋرەپ, جەردەن الىپ, جەرگە سالىپ سويلەگەنىڭدە بايعۇس ۇرىس ەستىپ تۇرعان بالاداي ءبۇرىسىپ, بۇكجيىپ قالادى. ول دا اكە. ءتورت پەرزەنتى بار. ەشكىمنەن كەم ەمەس. مەنىكى ەرتەڭ بالا-شاعاسى الدىندا ابىروي-بەدەلى تومەن بولىپ قالماۋىن ويلاعاندىق, – دەدى كەيۋانا.
قاريا ەسكى قيقار مىنەزىنە سالىپ, كەمپىرىنە قولىن ءبىر سىلتەپ ورنىنان تۇرىپ كەتتى دە, ەسىك الدىنداعى ورىندىققا جايعاستى. اينالا تىپ-تىنىش. اۋلانى قورشاعان بيىك دۋالدىڭ ار جاعىنان ۇلى مەن ۇلكەن نەمەرەسىنىڭ سويلەسكەندەرىن ەستىپ قالدى. ءبىرى جۇمىستان, ءبىرى مەكتەپتەن كەلە جاتقانى بۇعان بەلگىلى.
– اتاسىنىڭ بالاسى, ءۇي تاپسىرماسىن ورىنداپ بولعان سوڭ قورانى تازالاپ, سيىرعا سۋ بەرىپ, ازداپ ءشوپ تۋراپ قوي. بۇگىن مەنىڭ شۇعىل شارۋالارىم بار, ايتپەسە ءوزىم-اق ىستەر ەدىم, – دەدى قولداعى بالا.
نەمەرەسى اكەسىنە ءتىل قاتتى. داۋىسى ءزىلدى.
– قورا-پوراداعى تىرلىككە قولىم تيمەيدى. ىستەمەيمىن, – دەدى اتا-اجەگە ارقا سۇيەپ قالعان ۇلكەن نەمەرە.
– ايتقان ءتىلدى ال, بالا, قيىن شارۋا ەمەس قوي, – دەدى ۇلى جۇمساق داۋىسپەن.
– ۇنەمى ءوز اكەسىن تىڭدامايتىن, تەك رەنجىتەتىن ادامنىڭ ءتىلىن المايمىن, – دەدى نەمەرە قاتقىل ۇنمەن.
نەمەرەنىڭ مىنا ءسوزىن ەستىگەن قاريانىڭ ءجۇنى جىعىلىپ قالدى. ول ويلادى: «كەمپىردىكى ءجون ەكەن. ەندى ەسكى «تاكتيكانى» تاستاپ, جاڭاسىنا كوشۋ كەرەك». ول قانداي «تاكتيكا», ونى قاريانىڭ ءوزى بىلەدى.
