ورتالىق رەفەرەندۋم كوميسسياسىنىڭ توراعاسى نۇرلان ءابدىروۆتىڭ ايتۋىنشا, داۋىس بەرۋ ۋچاسكەلەرىن زاڭناما تالاپتارىنا تولىق ساي ازىرلەۋ قاجەتتىگى, اسىرەسە مۇگەدەكتىگى بار ادامدار ءۇشىن قولايلى ءارى كەدەرگىسىز ورتا قالىپتاستىرۋ ماسەلەسىنە باسىمدىق بەرىلگەن.
الماتىداعى رەفەرەندۋمعا دايىندىق بارىسى
«بۇگىندە بارلىق داۋىس بەرۋ ۋچاسكەلەرىندە مۇگەدەكتىگى بار ازاماتتارعا ارنالعان ارنايى بۇرىشتار جابدىقتالعان. وندا كومپيۋتەرلەر, ۇلكەيتكىش اينەكتەر, قوسىمشا جارىق كوزدەرى, داۋىس بەرۋ بيۋللەتەنىنە ارنالعان برايل قارپىندەگى ترافارەتتەر, سونداي-اق كونستيتۋتسيا جوباسىنىڭ مەملەكەتتىك جانە ورىس تىلدەرىندەگى اۋديو نۇسقالارى قاراستىرىلعان. سونىمەن قاتار, ۋچاسكەلەر پاندۋستارمەن, كىرەبەرىستەگى تاكتيلدى كورسەتكىشتەرمەن جانە عيمارات ىشىندەگى تاكتيلدى ناۆيگاتسيا قۇرالدارىمەن قامتاماسىز ەتىلگەن. ال مۇنداي جابدىقتار ءالى تولىق ورناتىلماعان نىسانداردا جەرگىلىكتى اتقارۋشى ورگاندار ۋاقىتشا پاندۋستار مەن تاكتيلدى باعىتتاعىشتاردى ورنالاستىرۋ جۇمىستارىن قولعا العان. بۇل مۇگەدەكتىگى بار ادامداردىڭ داۋىس بەرۋ ۋچاسكەلەرىنە ەش كەدەرگىسىز كىرۋىنە مۇمكىندىك بەرەدى», دەدى نۇرلان ءابىدروۆ.
داۋىس بەرۋ كۇنى دە قوسىمشا قولداۋ شارالارى قاراستىرىلعان. اتاپ ايتقاندا, مۇگەدەكتىگى بار ازاماتتار ءۇشىن ينۆاتاكسي قىزمەتى مەن سۋردواۋدارماشىلاردىڭ كومەگى ۇسىنىلادى. بۇل ولاردىڭ رەفەرەندۋمعا تولىققاندى قاتىسۋىنا جاعداي جاساۋدىڭ ماڭىزدى تەتىگى بولماق.
«كوميسسيا مۇشەلەرىن دايارلاۋ ءىسى دە نازاردان تىس قالعان جوق. ۋچاسكەلىك كوميسسيالاردى قوسا العاندا, كوميسسيا مۇشەلەرى مۇگەدەكتىگى بار ادامداردىڭ قۇقىقتارى مەن قاجەتتىلىكتەرىنە قاتىستى ارنايى وقىتۋدان ءوتتى. وقۋ بارىسىندا قارىم-قاتىناس ادەبى, دۇرىس تەرمينولوگيانى قولدانۋ جانە مۇگەدەكتىگى بار ازاماتتاردىڭ ءتۇرلى ساناتتارىمەن ءتيىمدى جۇمىس ىستەۋ ەرەكشەلىكتەرى كەڭىنەن ءتۇسىندىرىلدى», دەدى ورك توراعاسى.
رەفەرەندۋم-2026: سايلاۋ ۋچاسكەسىن eGov Mobile ارقىلى تەكسەرۋگە بولادى
بۇدان بولەك, ەلىمىزدىڭ ءۇش وڭىرىندە – اقتوبە, قوستاناي جانە پاۆلودار وبلىستارىندا پيلوتتىق جوبا اياسىندا مۇگەدەكتىگى بار ادامدارعا ارنالعان جاڭا يننوۆاتسيالىق شەشىمدەر ەنگىزىلگەن ءبىر-بىردەن ارنايى داۋىس بەرۋ ۋچاسكەسى جۇمىس ىستەيدى.
وسىلايشا, رەسپۋبليكالىق رەفەرەندۋمعا دايىندىق بارىسىندا ينكليۋزيۆتى ورتا قالىپتاستىرۋعا باعىتتالعان ناقتى شارالار قولعا الىنىپ وتىر. بۇل ءار ازاماتتىڭ ءوزىنىڭ كونستيتۋتسيالىق قۇقىعىن تەڭ جاعدايدا جانە قولايلى ورتادا جۇزەگە اسىرۋىنا مۇمكىندىك بەرەدى.
