جەر جاھاننىڭ ەڭ مىقتى جاس ءارى جالىندى زىلتەمىرشىلەرىن انىقتايتىن جارىستا قازاق ەلىنىڭ نامىسىن ەدىگە ەگەمبەردى مەن ەراسىل ساۋلەبەكوۆ قورعايدى. ەكەۋى دە 81 كگ سالماق دارەجەسىندە سىنعا تۇسەدى. استانادا تۋىپ-وسكەن ەدىگە جەرگىلىكتى باپكەر ايبەك امانيازوۆتىڭ قول استىندا جاتتىعادى. قازاقتىڭ اسا دارىندى زىلتەمىرشىسى بۇعان دەيىن جاستاردىڭ الەمدىك دوداسىندا ءۇش رەت دارا شىقتى. سوڭعى رەت بىلتىر يسپانيانىڭ لەون قالاسىندا 89 كگ سالماقتا كۇش سىناستى. بارلىق التى مۇمكىندىگىندە ءمۇلت كەتپەگەن ول باستى قارسىلاستارى يراندىق اليرەزا اباسپۋر مەن كولۋمبيالىق دجوكسەر البورنوستى ارتقا تاستاپ, باس جۇلدەنى قانجىعاسىنا بايلادى. پيرەنەي تۇبەگىندە ەگەمبەردى 352 (153+199) كيلو سالماقتى ەركىن ەڭسەردى. سونداي-اق, ول قۇرلىق بىرىنشىلىگىندە دە الدىنا جان سالمادى. ەگەر ەدىگە وسى جولى دا توپ جارىپ جاتسا, وندا ءوزىنىڭ تۋعان كۇنىنە ۇلكەن سىي جاساماق. ويتكەنى, ءدال سول جارىس اياقتالاتىن كۇنى اتالعان ەگەمبەردىنىڭ نەمەرەسى 20 جاسقا تولادى.
ەراسىل ساۋلەبەكوۆتىڭ دە ەسىمى سپورت سۇيەر قاۋىمعا جاقسى تانىس. بىلتىر ول ءدال سول يسپانيادا الەم چەمپيوناتىنىڭ قولا مەدالىن موينىندا جارقىراتتى. سونىمەن قاتار, سىر بويىنىڭ سايىپقىرانى 2022 جىلى مەكسيكادا جانە 2023 جىلى البانيادا وتكەن جاسوسپىرىمدەردىڭ دۇنيەجۇزىلىك دوداسىندا باس جۇلدەنى ولجالادى. وسى جايتتاردىڭ ءوزى-اق ليماداعى جارىستا ەراسىلدىڭ دا جەڭىس تۇعىرىنىڭ ەڭ بيىك ساتىسىنا كوتەرىلۋگە جاقسى مۇمكىندىگى بار ەكەنىن ايعاقتاپ تۇر.
ال جاسوسپىرىمدەردىڭ الەم بىرىنشىلىگىندە قىزىلوردالىق بەيبارىس ەرسەيىت (61 كگ) پەن ەرنۇر مىرزاحمەت (81 كگ), الماتى وبلىسىنىڭ وكىلى كسەنيا پروزوروۆا (61 كگ), اقمولالىق كيرا دانيلوۆا (81 كگ) جانە الماتىلىق ماحامبەت الپىسباي (102 كگ) ونەر كورسەتەدى.
