تانىمال سپورتشىلار, زيالى قاۋىم جانە باق وكىلدەرى مەن مەكتەپ وقۋشىلارى قاتىسقان تۇساۋكەسەردە كىتاپتى شىعارۋ تۋرالى يدەيانى ۇسىنعان وقۋشىلار سارايىنىڭ ديرەكتورى ينديرا يكاپوۆا جاستاردىڭ جىگەرىن وياتۋ ءۇشىن وسىنداي كىتاپتار جازۋ, كەزدەسۋلەر ۇيىمداستىرۋ ماڭىزدى ەكەنىن ايتىپ ءوتتى. ال بەكزاتتىڭ اناسى سىرلىگۇل شويبەكوۆا بالاسىنىڭ سپورتقا دەگەن سۇيىسپەنشىلىگى مەن تاباندىلىعى تۋرالى ەستەلىكتەرىمەن ءبولىستى. كىتاپتىڭ اۆتورى ەرجان ارعىنباەۆ تۋىندىنىڭ جازىلۋ تاريحىن تانىستىرىپ, بەكزاتتىڭ جەڭىستى جولى, رۋحاني بولمىسى مەن ارماندارى تۋرالى باياندادى. جيىنعا قاتىسۋشىلار بەكزاتتىڭ مۇراسىن ساقتاۋ مەن دارىپتەۋ جايلى وي-پىكىرلەرىن ورتاعا سالدى.
سونداي-اق تۇركىستان قالاسىنداعى «Olympic Center» سپورت كەشەنىندە بەكزات ساتتارحانوۆتى ەسكە الۋعا ارنالعان 2007-2008 جىلى تۋعان جاستار اراسىندا حالىقارالىق تۋرنير ءوتتى. بيىل ءححىII رەت ۇيىمداستىرىلعان بوكس دوداسىنا رەسەي, وزبەكستان, قىرعىزستان, موڭعوليا, تاجىكستان, ازەربايجان, قىتاي, ەگيپەت, ساۋد ارابياسى, كۋۆەيت ەلدەرىمەن قاتار قازاقستاننىڭ بارلىق ايماعىنان بىلعارى قولعاپ شەبەرلەرى قاتىستى. بوكس باسەكەسىندە ەرلەر 13 سالماق بويىنشا جۇدىرىقتاسسا, قىزدار 6 سالماق دارەجەسىندە جەڭىمپازداردى انىقتادى. جالپى 30 كوماندا, 300-گە جۋىق بوكسشى باق سىناعان دودادا تۇركىستان وبلىسىنىڭ جىگىتتەر قۇراماسى تولىق قۇرامدا ءوڭىر نامىسىن قورعاسا, قىزدار قۇراماسى 4 سالماق دارەجەسىندە رينگ تورىنە كوتەرىلدى.
ايتا كەتەيىك, IBA تالاپتارىنا ساي وتكەلى جاتقان حالىقارالىق بوكس دوداسىندا جەڭىمپاز اتانعان سپورتشىلارعا سپورت شەبەرى اتاعى بەرىلەدى.
