قىزىلوردا پروكۋراتۋراسى ىزدەگەن ازامات ارمەنيادان الدىرىلدى

استانا. 11 اقپان. بۇگىن قازاقستان  باس پروكۋراتۋراسى ىشكى ىستەر ورگاندارىمەن بىرلەسە وتىرىپ, قازاقستان ازاماتى ارايك ايۆازياندى ارمەنيادان ەكستراديتسيالاۋعا قول جەتكىزدى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى. ا.ايۆازيانعا ءىرى كولەمدە الاياقتىق جاسادى دەگەن ايىپ تاعىلىپ وتىر. وسى ءۇشىن وعان قىزىلوردا وبلىسىنىڭ پروكۋراتۋرا ورگاندارى ىزدەۋ جاريالاعان بولاتىن. ا.ايۆازيان 2011 جىلى قۇرىلىس كومپانياسىنىڭ اتقارۋشى ديرەكتورى بولعان كەزىندە ارال قالاسىنداعى كولىك جولدارىن جوندەۋدى ورىنداۋ بارىسىندا 62 501 620 تەڭگە سوماسىنداعى بيۋدجەتتىك قاراجاتتى ۇرلاعان. تەرگەۋ بارىسىندا ايىپتالۋشى تەرگەۋ ورگاندارىنان جاسىرىنىپ قالعان جانە ونىڭ تۇرعىلىقتى مەكەنىن انىقتاۋ ۇزاق ۋاقىت بويى مۇمكىن بولماعان. ايۆازيان 2014 جىلعى قىركۇيەكتە ەرەۆان قالاسىندا ۇستالعاننان كەيىن قازاقستاننىڭ باس پروكۋراتۋراسى بەلگىلەنگەن ءتارتىپ بويىنشا ونى قىلمىستىق جاۋاپكەرشىلىككە تارتۋ ءۇشىن ۇستاپ بەرۋ تۋرالى سۇراۋ جولداعان جانە ارميان تاراپى بۇل سۇراۋدى اعىمداعى جىلعى قاڭتاردا قولدادى. قازىرگى تاڭدا قىزىلوردا وبلىسىنىڭ ارنايى پروكۋرورلارى اتالمىش قىلمىستىق ءىس بويىنشا تەرگەۋ جۇرگىزۋدە. قۇرىش نۇرىمبەت. دەرەك: قازاقستان باس پروكۋراتۋراسىنىڭ ءباسپاسوز قىزمەتى.