زاماناۋي تەحنولوگيالارمەن جابدىقتالعان ءوندىرىس ورنى ءونىمنىڭ بەرىكتىگى مەن ەكولوگيالىق تازالىعىن قامتاماسىز ەتەدى. جاشىكتەر حالىقارالىق ستاندارتقا ساي قۇيىلىپ, بارلىق تاسىمالداۋ جانە ساقتاۋ تالاپتارى قاتاڭ ساقتالادى. قازىرگى وندىرىستىك قۋاتى اۋداننىڭ جاشىككە دەگەن قاجەتتىلىگىنىڭ 50 پايىزىن وتەيدى. كاسىپورىن الداعى ۋاقىتتا ءوندىرىس كولەمىن 2 ەسە ارتتىرۋدى جوسپارلاپ وتىر. جاڭا قۇرىلعىلار ورناتىلىپ, جىلدىق ءونىم كولەمىن 1,2 ملن داناعا دەيىن ۇلعايتۋ كوزدەلگەن. جوبا ءوڭىردىڭ ونەركاسىپتىك الەۋەتىن ارتتىرىپ قانا قويماي, جەرگىلىكتى تۇرعىنداردى جۇمىسپەن قامتۋعا, پلاستيك قالدىقتارىن ءتيىمدى پايدالانۋعا مۇمكىندىك بەرمەك.
ۇيعىر اۋدانىنىڭ اكىمى بوتا ەلەۋسىزوۆا جاڭا ءوندىرىستىڭ اشىلۋى ءوڭىر ەكونوميكاسىن دامىتۋعا زور ۇلەس قوساتىنىن اتاپ ءوتتى.
«بۇل كاسىپورىن – اۋدانىمىز ءۇشىن ماڭىزدى باستاما. بىرىنشىدەن, جاڭا جۇمىس ورىندارى اشىلىپ, جەرگىلىكتى تۇرعىندار تۇراقتى جۇمىسپەن قامتىلدى. ەكىنشىدەن, وڭىرىمىزدەگى ونەركاسىپ سالاسى دامىپ, پلاستيك قالدىقتارىن قايتا وڭدەۋ ارقىلى ەكولوگياعا دا وڭ اسەر ەتەمىز. بولاشاقتا وسىنداي وندىرىستەر سانى ارتا بەرەدى دەپ سەنەمىز», دەدى اۋدان اكىمى.
جاڭا ءوندىرىس ورنىنىڭ ىسكە قوسىلۋى قارادالا ءوڭىرىنىڭ ونەركاسىپتىك الەۋەتىن ارتتىرۋمەن قاتار, جاس كاسىپكەرلەرگە ۇلگى دە بولارى انىق.
«توپىراعى قۇنارلى اۋدانىمىزدا جەمىس-جيدەكتىڭ, اسىرەسە سارى ورىكتىڭ سان ءتۇرى توگىلىپ جەمىس بەرەدى. ءوزىمنىڭ دە ورىك وسەتىن اۋقىمدى باعىم بار. ناۋقان كەزىندە جاڭا پىسكەن جەمىستى جيناپ, وتكىزۋگە كەرەك جاشىكتەردى كورشىلەس رەسەي, قىتاي, قىرعىزستاننان ساتىپ الىپ جۇردىك. سول سەبەپتى, وسى ءوندىرىستى زەرتتەي كەلە, اۋدانىمىزدان قاراپايىم جاشىك وندىرەتىن تسەح اشۋعا بەل بۋدىق. كۇزگى جيىن-تەرىن ۋاقىتىندا ساپالى ءارى ەكولوگيالىق تازا ونىمگە سۇرانىس ەسەلەپ ارتادى. ەندى سىرتتان تاسىپ اۋرە بولماي, جيىن-تەرىمگە كەرەك جاشىكتى وزىمىزدە ءوندىرىپ, قاجەتتىلىكتى وتەۋگە كۇش جۇمىلدىرامىز», دەيدى «اتتيلا-ءال فارابي» جشس جەمىستەر مەن كوكونىستەرگە ارنالعان پلاستيكالىق جاشىكتەر ءوندىرۋ تسەحىنىڭ باسشىسى ءالىمجان ءاشىموۆ.
الماتى وبلىسى
