سۋرەت: cnews.ru
قانداي وزگەرىستەر بار؟ ءتىزىپ شىعايىق. بىرىنشىدەن, بانك كارتالارى ەندى تەك ءوز نومىرىڭىزگە تىركەلەدى. ياعني بانكتەر بارلىق شوت پەن كارتالاردى تەك ازاماتتىڭ ءوز اتىنا راسىمدەلگەن وتاندىق تەلەفون نومىرىنە بايلايدى. بۇل قارجىلىق وپەراتسيالاردى باقىلاۋدى كۇشەيتىپ, بوتەن ادامداردىڭ بىرەۋدىڭ اتىنان كارتا راسىمدەۋىنە توسقاۋىل قويادى.
ەكىنشىدەن, 18-21 جاس ارالىعىنداعى جاستار ونلاين كارتا الا المايدى, قايتا شىعارۋعا دا ءوتىنىش بەرە المايدى. بۇل جاس ەرەكشەلىگىنە بايلانىستى قاۋىپتەردى ازايتىپ, قارجىلىق الاياقتىقتىڭ الدىن الۋ ءۇشىن جاسالعان. ەندى جاس ازاماتتار بانك كارتاسىن راسىمدەۋ ءۇشىن بانك بولىمشەسىنە وزدەرى بارىپ, جەكە باسىن راستاۋعا ءتيىس.
ۇشىنشىدەن, شەتەلدىكتەرگە بانك كارتاسىن الۋ قيىندايدى. ەلىمىزدە جۇرگەن شەتەلدىك ازاماتتار ەندى بانك كارتاسىن الۋ ءۇشىن وزدەرىنىڭ ەلدە زاڭدى تۇردە جۇرگەنىن دالەلدەۋى كەرەك. بۇعان قوسا, جاڭا كارتا اشىلعاننان كەيىنگى العاشقى 3 اي ىشىندە بارلىق قارجىلىق وپەراتسيا مۇقيات باقىلانادى. ەگەر جاسالعان اۋدارىمدار كۇدىكتى بولىپ, كليەنتتىڭ كورسەتكەن ماقساتىنا سايكەس كەلمەسە, قوسىمشا تەكسەرۋ جۇرگىزىلەدى.
تورتىنشىدەن, قنردا الاياقتىق سحەمالاردى بولدىرماۋ ماقساتىندا ء«بىر ادام – ءبىر كارتا» قاعيداسىن ەنگىزۋدى جوسپارلاپ وتىر. ياعني ءار ازامات تەك ءبىر تولەم كارتاسىن عانا پايدالانا الادى. دەگەنمەن بۇل شەكتەۋ ارنايى الەۋمەتتىك تولەمدەر ءۇشىن اشىلعان كارتالارعا, بالالار كارتالارىنا جانە نەسيە كارتالارىنا قولدانىلمايدى.
بەسىنشىدەن, ونلاين نەسيە راسىمدەۋ قيىندايدى. ءبىرىنشى رەت نەسيە العىسى كەلەتىندەر ەندى ونلاين ءوتىنىم بەرە المايدى. ولار مىندەتتى تۇردە قارجى ۇيىمىنىڭ كەڭسەسىنە بارىپ, جەكە باسىن راستاۋى كەرەك. بۇل قادام نەسيە تاريحى جوق ازاماتتاردىڭ ويلانباي نەسيە الۋىن شەكتەۋگە ءارى ولاردىڭ تولەم قابىلەتتىلىگىن مۇقيات تەكسەرۋگە باعىتتالعان.
قارجى سالاسىنداعى ساراپشىلار بۇل وزگەرىستەر قارجىلىق ءتارتىپتى نىعايتىپ, زاڭسىز قاراجات اينالىمىنا توسقاۋىل قويادى دەپ ەسەپتەيدى. الاياقتاردىڭ جالعان شوتتار اشىپ, باسقا ادامداردىڭ اتىنان كارتا راسىمدەۋىن بولدىرمايدى دەگەن ءۇمىت بار.
