فوتو: اشىق دەرەككوز
دەپۋتاتتىڭ مالىمدەۋىنشە, شۋ وزەنى قىرعىزستاننان باستاۋ الىپ, سىردارياعا قۇيۋى ءتيىس, الايدا سوڭعى جىلدارى سۋ سوزاق دالاسىنا جەتپەي, جول بويىندا قالىپ قويعان. بۇل جاعداي ايماقتاعى 80 مىڭ تۇرعىننىڭ تۇرمىسىن قيىنداتىپ, ەكولوگيالىق اپات قاۋپىن كۇشەيتىپ وتىر.
«تۇرعىنداردىڭ ايتۋىنشا, تاس پەن توپىراقتان بوگەت سالىپ, وزەننىڭ اعىسىن توقتاتىپ تاستاعان مويىنقۇمدىق بيزنەسمەنگە سوت جوق. 12 مىڭ ءىرى قاراسى بار دەيدى. درونمەن تۇسىرىلگەن فوتو-ۆيدەولارىنا دەيىن قولىما ۇستاتتى. وزەن بىرنەشە جەردەن زاڭسىز بوگەلگەن», دەدى ماقسات تولىقباي.
ماقسات تولىقباي ماۋسىم ايىندا جامبىل وبلىسىنا بارعان ساپارىندا بۇل اقپاراتتىڭ راس-وتىرىگىن پرەمەر-ءمينيستردىڭ ءوزى سۇراعاننىن اتاپ ءوتتى.
«الايدا, جەرگىلىكتى شەنەۋنىكتەر مەن سالالىق مينيستىرلىك بۇل «جالعان اقپارات» دەپ بەكتەنوۆتى كەرى قايتارعان. سۋ رەسۋرستارى ءمينيسترى بۇل فازەندانى نەگە قورعاشتاپ الەك؟ جاعدايدى بىلمەي مە, الدە كاسىپكەرگە ءسوزى وتپەي مە؟ نەمەسە 12 مىڭ سيىر اسىرايتىن شارۋاشىلىق مينيستر نۇرجان نۇرجىگىتوۆتىڭ وزىنە تيەسىلى مە؟», دەدى دەپۋتات.
دەپۋتاتتىڭ ايتۋىنشا, سوزاق اۋدانىنداعى 8 اۋىلدىڭ تۇرعىندارى استاناعا كەلىپ, ءوز ماسەلەلەرىن تىكەلەي بيلىككە جەتكىزۋگە دايىن وتىر.
«راسىندا اڭقاسى كەپكەن ايماقتىڭ تۇزى شىعىپ, وزەندى جاعالاي مەكەندەگەن 80 مىڭ حالىق ەكولوگيالىق اپاتتىڭ الدىندا تۇر. سوزاقتىقتاردىڭ ونسىزدا ۋران وندىرىسىنەن كورىپ جاتقان ەكولوگيالىق زاردابى از ەمەس ەدى. ەندى مىنە, سۋدىڭ جوقتىعىنان جەرى قىزىل قۇمعا, دالاسى ايتاقىرعا اينالىپ, مالمەن كۇنەلتكەن حالىق شابىندىق ءشوپتىڭ ءوزىن قىزىلوردادان ساتىپ الۋعا ءماجبۇرمىز دەيدى. ايتپەسە, ءبىر كەزدەرى سىردارياعا دەيىن جەتەتىن شۋ وزەنىنىڭ ەكى جاعى قامىس, اينالاسى شابىندىق بولعان. قازىر ءار جەردە ءبىر ءبولىنىپ قالعان, ساسىپ جاتقان سۋ بالدىرىنان باسقا ەشتەڭە تاپپايسىڭ», دەپ اشىندى دەپۋتات.
ماقسات تولىقباي سۋ رەسۋرستارى مينيسترىنەن تەز ارادا سۋ رەتتەگىش قۇرالدارى مەن زاڭسىز سالىنعان بوگەتتەردى بۇزۋعا ىقتال ەتۋىن تالاپ ەتتى.
«سونداي-اق, گيدروتەحنيكالىق قۇرىلىس-جايلاردىڭ ءىس جۇزىندەگى ەسەبى جۇرگىزىلسىن. بۇعان قوسا وزەننىڭ ارناسىن بۇرىپ الىپ, اينالاسىن توپىراق, تاسپەن قورشاعان فازەندا جايىندا باياندالعان ۆيدەو-فوتوعا مينيسترلىك تاراپىنان تۇسىنىكتەمە بەرىلسىن. مونيتورينگ پەن باقىلاۋدى كۇشەيتىپ, وزەنگە مەحانيكالىق تازالاۋ جۇمىستارىن جۇرگىزۋدى سۇرايمىن», دەدى م.تولىقباي.
