فوتو: egemen.kz/ەرلان ومار
سونداي-اق, جاڭا ورمان تالىمباقتارى قۇرىلىپ, ەرەكشە قورعالاتىن تابيعي اۋماقتار كەڭەيتىلىپ, قالدىقتاردى كادەگە جاراتۋ جوبالارى جۇزەگە اسىرىلۋدا, ال سيرەك كەزدەسەتىن جانۋارلار – جولبارىستار, قۇلاندار جانە پرجەۆالسكي جىلقىلارى تابيعاتقا قايتارىلعان.
ورمانداردى قورعاۋدى كۇشەيتۋ جانە ماتەريالدىق-تەحنيكالىق جاڭارتۋ ءۇشىن ورتالىق بيۋدجەتتەن ورتكە قارسى جانە ورمان ءورت ءسوندىرۋ تەحنيكاسىن ساتىپ الۋعا 5,4 ملرد تەڭگە باعىتتالعان. ال جەرگىلىكتى قۇرىلىمداردان 6,7 ملرد تەڭگە بولىنگەن. ورمان ورتتەرىن ءتيىمدى ءسوندىرۋ ءۇشىن تراكتورلار, ارنايى تەحنيكا مەن جابدىقتار ساتىپ الىنۋدا.
ورمان ورتتەرىن ەرتە انىقتاۋ جۇيەسى «قازاقتەلەكوممەن» بىرلەسىپ جۇزەگە اسىرىلىپ, «جاسىل ايماق» پەن «سەمەي ورمانى» سياقتى 24 ورمان شارۋاشىلىعى اۋماقتارىن زەرتتەۋ جۇمىستارى باستالعان.
«6 وڭىردە جاڭا ورمان تالىمباقتارىن قۇرۋ جۇمىستارى جۇرگىزىلىپ جاتىر. جالپى بيۋدجەت 21,2 ملرد تەڭگەنى قۇرايدى, ءاربىر تالىمباققا 3,5 ملرد تەڭگەدەن قارالعان. ونىڭ قۋاتى – 6 ملن كوشەت. قۇرىلىس 2025 جىلى باستالادى. بيوالۋانتۇرلىلىكتى ساقتاۋ تۇجىرىمداماسىن ازىرلەۋ باستالدى. جاڭا ەرەكشە قورعالاتىن تابيعي اۋماقتار (ەقتا) – «مەركە» وڭىرلىك پاركى (86 مىڭ گا), «ارال» (471 مىڭ گا) جانە «جايىق ورمانى» (46,9 مىڭ گا) رەزەرۆاتتارى قۇرىلۋدا. ءۇش اۋماقتى – ءۇستىرت, قاراتاۋ, ىلە-بالقاش, 648 مىڭ گەكتارعا كەڭەيتۋ جوسپارلانۋدا. 6 ەقتا-دا باقىلاۋ وتكىزۋ پۋنكتەرىن اۆتوماتتاندىرۋ جانە ەلەكتروندىق تولەم جۇيەسىن ەنگىزۋ ءۇردىسى باستالدى», دەلىنگەن ەكولوگيا جانە تابيعي رەسۋرستار مينيسترلىگىنىڭ حابارلاماسىندا.
2024 جىلدان باستاپ «تازا قازاقستان» اكتسياسىنا 6 ملن ادام, ونىڭ ىشىندە 230 مىڭ ەرىكتى قاتىسقان. 1,1 ملن توننا قوقىس جينالىپ, 1,6 ملن اعاش وتىرعىزىلدى. ەكومادەنيەتتى دامىتۋدىڭ 2029 جىلعا دەيىنگى تۇجىرىمداماسى بەكىتىپ, وڭىرلىك جوسپارلار ماقۇلدانعان. مينيسترلىك ەكولوگيالىق باستامالار قوعام تاراپىنان بەلسەندى قولداۋعا يە بولىپ جاتقانىن ەرەكشە اتاپ وتكەن.
«2 ملرد ءتۇپ اعاش وتىرعىزىلۋدا. 2021 جىلدان باستاپ 1,145 ملرد اعاش ەگىلدى. سونداي-اق ارال تەڭىزىنىڭ قۇرعاعان تابانىن كوگالداندىرۋ جۇمىستارى جۇرگىزىلۋدە – 1,1 ملن گەكتارعا سەكسەۋىل وتىرعىزۋ جوسپارلانعان.
قاتتى تۇرمىستىق قالدىقتارعا قاتىستى ماسەلەلەردى شەشۋ ماقساتىندا 238 ملرد تەڭگەگە 94 جوبادان تۇراتىن پۋل قالىپتاستىرىلدى. زاماناۋي پوليگوندار سالۋ, قايتا وڭدەۋدى دامىتۋ جانە قالدىقتاردى بولەك جيناۋدى ەنگىزۋ نەگىزگى باعىتتار سانالادى», دەلىنگەن مينيسترلىك حابارلاماسىندا.
