سۋرەت: iagorod.kz
وبلىستىق پوليتسيا دەپارتامەنتىندە باقىلاۋ كامەراسى بارىنشا كوپ مۇنداي پاترۋل كولىگىنىڭ سانى 11 ەدى. بيىلدان باستاپ تاعى 17 «ekin patrol» جولعا شىقتى.
بۇل اقىلدى پوليتسەي كولىگى كوبىنە رەسپۋبليكالىق ماڭىزى بار قاراعاندى-بالقاش, قاراعاندى – جەزقازعان, استانا – قاراعاندى باعىتىندا جانە قاراعاندى – قارقارالى, تەمىرتاۋ, شاحتينسك تاسجولدارىندا جۇرەدى.
– بىلتىر 15 مىڭنان اسا قۇقىق بۇزۋشىلىق تىركەلدى. بيىل اقىلدى پاترۋل كولىگى ءتىپتى كوبەيدى. توعىز كامەرالى كەشەن كولىك ۇستىندەگى ءتۇرلى-ءتۇستى جارقىلداتقىش قۇرىلعىسىنا ورناتىلعان. جول اپاتى كوبىنە جىلدامدىقتى شەكتەن تىس اسىرۋدان ورىن الادى. بۇعان قوسا جولدىڭ قارسى بەتىنە شىعىپ كەتەتىندەر دە كوپ. مۇنداي اقىلدى كەشەندى ورناتۋىمىزدىڭ باستى ماقساتى – سول جول-كولىك وقيعالارىنىڭ الدىن الۋ, – دەيدى وبلىستىق پوليتسيا دەپارتامەنتى اكىمشىلىك پوليتسيا باسقارماسىنىڭ اعا ينسپەكتورى رۇستەم ادەنوۆ.
ەرەجەنى ەلەمەيتىندەر ءالى دە جەتىپ ارتىلادى. قالاداعى كولىك قوزعالىسىن باقىلايتىن قىراعى كامەرالار كوبەيسە دە كولىك اپاتى ازايماي تۇر. وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى جاسقايرات قايىروۆ جىل باستالعالى بەرى وبلىس جولدارىندا 44 جول-كولىك وقيعاسى تىركەلىپ, 5 ادام قازا تاۋىپ, 58 ادام ءتۇرلى جاراقات العانىن ايتادى. سونىڭ الدىن الۋ ءۇشىن اقىلدى كەشەن ورناتقان پاترۋل كولىگىنىڭ سانىن كوبەيتىپ وتىر.
«Ekin patrol» دەپ اتالاتىن بۇل جۇيە – اينالاسىنا «مەن كەلە جاتىرمىن» دەپ بەلگى بەرەتىن جارقىلداتقىشقا ورناتىلعان «اقىلدى» قوندىرعى. ونىڭ كامەراسى 360 گرادۋسقا دەيىن شولىپ, وزىنەن 70 مەترگە دەيىنگى قاشىقتاعى اۆتوكولىكتىڭ ءنومىرىن جازىپ الادى. كولىك ۇستىندەگى «اقىلدى» كامەرالار اۆتوماتتى جانە ناقتى ۋاقىت رەجىمىندە بىردەي جۇمىس ىستەيدى. جول ءتارتىبىنىڭ بۇزىلعانى تۋرالى مالىمەتتەردىڭ ءبارىن جۇرگىزۋشىنىڭ قاجەتىنسىز بىردەن دەرەكقورعا جىبەرىپ وتىرادى.
– باقىلاۋ جۇيەسى الدى-ارتىنداعى جىلدامدىق مولشەرىن اسىرعان ماشينالاردى جازىپ الىپ وتىرادى جانە ىزدەۋدەگى اۆتوكولىكتەردى انىقتايدى. رادارى 120 مەترگە دەيىنگى راديۋستا جۇمىس اتقارادى. بۇعان قوسا 70 مەترگە دەيىنگى كولىكتەردى انىق كورە الادى, – دەيدى ر.ابەنوۆ.
اعا ينسپەكتوردىڭ ايتۋىنشا, جاڭا پاترۋل جول بويىندا دۇرىس تۇرماعان كولىكتى دە, جولداعى جولاقتان اسىپ كەتكەن نەمەسە قىزىل بەلگىگە ءوتىپ كەتكەن كولىكتى دە «شارت» ەتكىزىپ ءتۇسىرىپ الادى. جىلجىمالى باقىلاۋ جۇيەسىنىڭ باسقا كامەرالاردان باستى ەرەكشەلىگى – قالانىڭ كەز كەلگەن كوشەسىندە تاۋلىك سايىن كەزەكشىلىك ەتەدى.
ەندى جول ەرەجەسىن ورەسكەل بۇزاتىندار ازايادى. ايتپاي كەلگەن ايىپپۇلعا قالتاسىن كىم قاقتىرا بەرسىن؟ كولىك جۇرگىزۋشىلەردىڭ كوبى جول بويىنداعى ءبىر ورىندا ءىلىنىپ تۇرعان كامەرالاردىڭ جانىنان وتكەندە عانا ەرەجە ساقتايدى, ال جىلجىمالى كامەرا كەز كەلگەن جەردە ابايلاپ, ەرەجەنى بارىنشا ەسكەرىپ جۇرۋگە ۇيرەتەدى.
قاراعاندى وبلىسىنىڭ پوليتسيا دەپارتامەنتى باستىعىنىڭ ءبىرىنشى ورىنباسارى جايقايرات قايىروۆتىڭ ايتۋىنشا, وسى جىلدى ىشكى ىستەر مينيسترلىگى «پروفيلاكتيكا جىلى» دەپ بەكىتىپتى. سوعان وراي قاراعاندىدا جول قاۋىپسىزدىگىن قاداعالاۋ ماقساتىندا ءتۇرلى ءىس-شارا ۇزدىكسىز ءوتىپ تۇرادى.
– جول قوزعالىسىن ۇنەمى قاداعالاۋ ءۇشىن پوليتسيا دەپارتامەنتى اقپان ايىندا «قاۋىپسىز جول» رەسپۋبليكالىق جەدەل-پروفيلاكتيكالىق ءىس-شاراسىن وتكىزدى. ءىس-شارا كەزىندە وبلىس جولدارىندا پوليتسيا جاساقتارىنىڭ سانى ارتىپ, ءتارتىپ ساقشىلارى رەيد جۇرگىزدى. مۇنداعى ماقسات – كولىك قۇرالدارى يەلەرىنىڭ ءتارتىپتى ساقتاۋى. «زاڭ مەن ءتارتىپ» قاعيداتىن بارشامىز ۇستانۋىمىز كەرەك. پوليتسيانىڭ جۇمىسىنا ەنگىزىلىپ جاتقان جاڭاشىلدىقتار حالىقتىڭ تىنىشتىعى مەن قوعام قاۋىپسىزدىگىن ءتيىستى دەڭگەيدە قامتاماسىز ەتەدى. قابىلدانعان شارالار جول-كولىك وقيعالارىنىڭ سانىن ازايتۋعا سەپتىگى تيەدى. پاترۋلدىك مىندەتتەردى وڭتايلاندىرۋ ارقىلى قۇقىق قورعاۋ ورگاندارى قىزمەتكەرلەرىنىڭ جۇمىسى جاڭا دەڭگەيگە كوتەرىلەدى. سونداي-اق پوليتسيا قىزمەتىن اۆتوماتتاندىرۋعا, پوليتسيا جۇمىسىن باقىلاۋعا, دەرەكتەرگە قولجەتىمدىلىكتى, باسقارۋشىلىقتى, ديسپەتچەرلەۋدى جاقسارتۋعا كومەكتەسەدى. ال ءتارتىپ ساقشىلارى ءوز كەزەگىندە حالىقتىڭ مۇددەسىنە ادال قىزمەت ەتەدى, – دەيدى ج.قايىروۆ.
قاراعاندى وبلىسى
