وتكەن جىلى جاپونيانىڭ عىلىم جانە تەحنولوگيالار جونىندەگى اگەنتتىگى (JST) قورشاعان ورتانى قورعاۋ, ەنەرگيا/بيورەسۋرستار/اپاتتاردىڭ الدىن الۋ جانە ازايتۋ سياقتى ءۇش نەگىزگى باعىت بويىنشا وتىنىمدەردى قابىلداۋدى باستاعان. ارنايى كوميتەت وتىنىمدەردى باعالاپ, ۇمىتكەرلەرمەن اڭگىمەلەسكەننەن كەيىن, 64 ۇسىنىستىڭ ىشىنەن 10 عىلىمي جوبانى ىرىكتەپ الدى. ولاردىڭ اراسىندا Hokkaido University پروفەسسورى ەحەي كاۆامۋرا مەن NU پروفەسسورى فيدەليس سۋورينەنيدىڭ بىرلەسكەن جوباسى بار. ەلىمىز بۇل باعدارلاماعا العاش رەت 56 ەلمەن قاتار قاتىسىپ وتىر.
Next-generation Smart Mining Plus for Sustainable Resources Development قازاقستاندىق-جاپوندىق عىلىمي جوباسى قازاقستاندا تاۋ-كەن ونەركاسىبىنىڭ ەكولوگيالىق قاۋىپسىز جۇيەسىن قۇرۋعا باعىتتالعان. بۇل ونەركاسىپتىك دامۋ مەن دەكاربونيزاتسيا اراسىنداعى تەپە-تەڭدىككە قول جەتكىزۋگە مۇمكىندىك بەرەدى. قازاقستان تابيعي رەسۋرستارمەن, ونىڭ ىشىندە سيرەك كەزدەسەتىن مەتالدارمەن باي ەل رەتىندە تاۋ-كەن قازۋ جۇمىستارىنان كومىرتەگى شىعارىندىلارى مەن سۋدىڭ لاستانۋىنا تاپ بولىپ وتىر. زەرتتەۋ وسى ماسەلەلەردى شەشۋ ءۇشىن اقىلدى تەحنولوگيالار مەن ەكولوگيالىق تازا ءوندىرۋ ادىستەرىن ەنگىزۋگە باعىتتالعان.
زەرتتەۋلەر 2030 جىلعى 31 ناۋرىزعا دەيىن جالعاسادى, ال گرانتتىڭ جالپى سوماسى – $3,2 ملن. زەرتتەۋشىلەر الدىندا ەكولوگيالىق مونيتورينگ جۇيەسىن قۇرۋ, تسيفرلىق ەگىزدى ازىرلەۋ, لاستانۋدى باقىلاۋ تەحنولوگيالارىن ەنگىزۋ جانە «Smart Mining+» ءۇشىن ينستيتۋتسيونالدىق قۇرىلىمدى دامىتۋ مىندەتتەرى تۇر.
جوبا ونەركاسىپ جانە قۇرىلىس مينيسترلىگىنىڭ قولداۋىمەن جۇزەگە اسىرىلۋدا. سونداي-اق وسى جوبا ارقىلى NU زاماناۋي جابدىقتاردى جەتكىزۋ, وقىتۋشىلار قۇرامىمەن الماسۋ, ستۋدەنتتەر مەن تەحنولوگتاردى وقىتۋ جانە قىزمەتكەرلەرگە ارنالعان بىلىكتىلىكتى ارتتىرۋ باعدارلامالارىن قوسا العاندا, ايتارلىقتاي ارتىقشىلىقتارعا يە بولادى.
