ءبارىمىز بىلەتىن بەلگەر

الماتى قالاسىنداعى م.اۋەزوۆ اتىنداعى اكادەميالىق دراما تەاتردان ادەبيەتسۇيەر قاۋىم قازاقتىڭ بەلگىلى قالامگەرى گەرولد بەلگەردى سوڭعى ساپارعا شىعارىپ سالدى. ازالى جيىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ كوڭىل ايتۋ جەدەلحاتىن وقىپ بەرگەن مادەنيەت جانە اقپارات ءمينيسترى ارىستانبەك مۇحامەدي ۇلى كەلەشەكتە گەرولد بەلگەر ەسىمى ەلەنەتىنىن جەتكىزدى. كوزى تىرىسىندە: «قازاق توپى­راعىنان ءنار العان مەن ءۇشىن قازاقتىڭ قورجىنىنىڭ تولىق بولعانى اسا قاجەت. كوپشىل ادام رەتىندە ماعان نەمىستىڭ شۇجىعى مەن سىراسى جەتىسپەسە دە, قازاقتىڭ قازىسى مەن شۇباتى جانىما جاقىن. ەڭ باستىسى, كوكىرەگىمدە قازاقىلىقتىڭ كۇيى ويناماسا, مەن ءوزىمدى كەمەلىنە كەلگەن اداممىن دەپ ەسەپتەمەيمىن», دەپ جازىپ كەتكەن گەراعامەن قوشتاسۋعا حالىق وتە كوپ جينالدى. مار­قۇمنىڭ قالامداس دوستارى مەن تىرىسىندە پىكىرلەس بولعان ازاماتتار, شىعارماشىلىعىن قۇرمەتتەيتىن ءارى جاقىن ارالاسا بىلگەن وقىرماندارى, بەلگىلى زيا­لى قاۋىم وكىلدەرى, ءبارى ورتاعا شىعىپ, سوڭعى قوشتاسۋ ءسوزىن تەبىرەنە سويلەدى. الماتى قالاسىندا ورنا­لاسقان گەرمانيا كون­سۋل­دىعىنىڭ باس وكىلى رەناتە شيمكورايت قازاق قالامگەرى گەرولد بەلگەر تۋرالى: «ول قازاق-نەمىس حالقىنا قاتار قىزمەت ەتكەن تۇلعا بولدى. ەكى ۇلتتىڭ اراسىن ادەمى جالعاپ, بىزدەردى باۋىرلاستىرۋعا ءومىرىن ارنادى», دەگەن پىكىرىن ءبىلدىردى. بەلگىلى قوعام قايراتكەرى, ايتۋلى اقىن ولجاس سۇلەيمەنوۆ جازۋشىنىڭ قازاق حالقىنىڭ جادىندا ءاردايىم ساق­تالاتىنىن, ونىڭ ەڭبەكتەرى ۇزاق جاسايتىنىن تىلگە تيەك ەتتى. كوپشىلىك ىشىنەن قوس ۇلىن جەتەكتەپ شىققان ءبىر وقىرمان: «2010 جىلى دۇنيەگە كەلگەن ەگىزدەرىمنىڭ ءبىرىن – گەرولد دەپ, ەكىنشىسىن بەلگەر دەپ اتادىم», دەگەندە قوشتاسۋعا كەلگەن جۇرت تەبىرەنىپ كەتتى. قازاق مادەنيەتى مەن ادە­بيەتىنىڭ كوكجيەگىن كەڭەيتۋگە اتسالىسقان گەرولد بەلگەردى سوڭعى ساپارعا شىعارىپ سال­عاندا الماتىنىڭ اۋا رايى دا مەيلىنشە جايلىلىق تانىتتى. قانات ەسكەندىر, «ەگەمەن قازاقستان».