فوتولار: قورعانىس مينيسترلىگى
قورعانىس مينيسترلىگىنىڭ ءباسپاسوز قىزمەتى ءمالىم ەتكەندەي, اتالعان ايماقتاردىڭ جەرگىلىكتى اۋماقتىق قورعانىس بريگادالارى مەن اسكەري بولىمدەردىڭ جەكە قۇرامى وزەن جاعالاۋلارىن نىعايتۋمەن, قاپتارعا توپىراق سالۋ-توسەۋ جۇمىستارىمەن اينالىسىپ جاتىر.
اباي وبلىسىندا اسكەري قىزمەتشىلەر اياگوز اۋدانىنىڭ مامىرسۋ اۋىلىنا كومەك كورسەتۋدە. اياگوز وزەنىنىڭ جاعاسىنا توپىراق تاسىمالداۋ ءۇشىن 10 كاماز كولىگى مەن جۇك تيەگىش ءبولىندى.
اقمولا وبلىسىنىڭ اتباسار, اقكول قالالارىندا اسكەري قىزمەتشىلەر قاپ دايىنداۋمەن اينالىسىپ جاتىر.
سولتۇستىك قازاقستان وبلىسى اۋماقتىق قورعانىس بريگاداسىنىڭ جەكە قۇرامى زارەچنىي جانە تەپليچنىي ەلدى مەكەندەرىندە ەرىگەن قار سۋىنا توسقاۋىل قويماق. بەسكول كەنتىندەگى جاعالاۋدى نىعايتۋ ءۇشىن 44813 ءبولىمىنىڭ اسكەري قىزمەتشىلەرى قۇم سالىنعان قاپتاردى دايىنداۋ جۇمىستارىنا تارتىلعان.
قوستاناي وبلىسىندا جەرگىلىكتى بريگادانىڭ جاۋىنگەرلەرى نوۆوسەلوۆكا اۋىلىندا جۇمىس جۇرگىزىپ, وباعان وزەنىنىڭ جاعالاۋىن نىعايتتى.
اۋماقتىق قورعانىس بريگاداسىنىڭ جەكە قۇرامى باتىس قازاقستان وبلىسى قاراتوبە كەنتىندەگى سۋ تاسقىنىنا قارسى ءىس-شارالارعا تارتىلدى.
اتىراۋ قالاسىندا اسكەري بولىمدەردىڭ اسكەري قىزمەتشىلەرى جاقىن ماڭداعى تۇرعىزبا, شوقپارتوعاي, باقاشى, قۇلسارى ەلدى مەكەندەرىندە جۇمىس جۇرگىزىپ جاتىر.
اقتوبە وبلىسىنا قوناەۆ گارنيزونى ينجەنەرلىك-ساپەرلىك بريگاداسىنىڭ اسكەري قىزمەتشىلەرى كومەككە كەلدى. ولار وزدەرىمەن بىرگە پونتوندىق كوپىر پاركىنىڭ ەلەمەنتتەرىن, ونىڭ ىشىندە پونتوندىق كوپىر سەگمەنتتەرى بار ەكى ءىرى تونناجدى جەر ءۇستى كولىگى (كراز-255ب), قالقىمالى تاسىمالداۋشى, سونداي-اق كاماز جانە كراز كولىكتەرىنىڭ بازاسىنداعى ەكى سۇيرەتكىش موتورلى قايىق الا كەلگەن. اسكەري ينجەنەرلەر كەز كەلگەن ۋاقىتتا ويىل وزەنىنە ۋاقىتشا وتكەل ورنالاستىرۋعا دايىن.
سۋ تاسقىنىنا قارسى ءىس-شارالارعا بارلىعى 2300-گە جۋىق اسكەري قىزمەتشى جانە 770-تەن اسا تەحنيكا جۇمىلدىرىلعان.
