جاڭا نىسان وقىرمانعا كەڭ اۋقىمدى قىزمەتتەر ۇسىنباق. كىتاپحانا قورىندا برايل قارپىمەن جازىلعان كىتاپتار, اۋديوكىتاپتار, تاكتيلدى باسىلىمدار مەن ءىرى قارىپپەن جازىلعان كىتاپتار قامتىلادى. سونداي-اق پايدالانۋشىلارعا ىڭعايلى بولۋ ماقساتىندا كومپيۋتەرلىك رەسۋرستار, ەكراننان وقۋ باعدارلامالارى, ينتەرنەتكە قولجەتىمدىلىك جانە بەيىمدەلگەن ۆەب-سايتتار ۇسىنىلادى.
كىتاپحانا كەڭىستىگى كوپفۋنكتسيونالدى ايماق رەتىندە جوبالانعان. وندا وقۋ زالدارى, كىتاپ كلۋبتارىنا, دارىستەرگە, سەمينارلار مەن كورمەلەرگە ارنالعان الاڭدار, سونداي-اق جايلى دەمالىس ايماقتارى قاراستىرىلعان. مۇنىڭ ءبارى – وقۋعا, الەۋمەتتەنۋگە جانە تۇلعالىق دامۋعا قولايلى ورتا. جاڭا كىتاپحانا جىل سايىن 20 000 ادامعا دەيىن قىزمەت كورسەتىپ, ءبىلىم مەن وقۋ رەسۋرستارىنا قولجەتىمدىلىكتى ارتتىرادى.
قازىرگى ۋاقىتتا قۇرىلىس جۇمىستارى 90%-عا اياقتالىپ, عيماراتتىڭ ىشكى ارلەۋ عانا قالدى. جاقىن ارادا كىتاپحانا ەسىگىن ايقارا اشىپ, ءاربىر ازامات ءۇشىن ءبىلىم مەن مادەنيەت ورنىنا اينالادى.
وسىلايشا, «Samruk-Kazyna Trust» قولداۋىمەن قوعامدىق ينفراقۇرىلىمعا بارلىق ازاماتتار ءۇشىن تەڭ مۇمكىندىكتەردى قامتاماسىز ەتەتىن ينكليۋزيۆتى ستاندارتتار ەنگىزىلىپ جاتىر. جاڭا كىتاپحانا قۇرىلىسى – جاي عانا الەۋمەتتىك جوبا ەمەس, ءاربىر جاننىڭ فيزيكالىق مۇمكىندىكتەرىنە قاراماستان, ءبىلىم مەن وقۋ رەسۋرستارىنا ەركىن قول جەتكىزۋىنە باعىتتالعان ماڭىزدى قادام.
ايتا كەتەيىك, وتكەن جىلى «Samruk-Kazyna Trust» قورىنىڭ قولداۋىمەن سەمەي قالاسىندا اباي اتىنداعى كىتاپحانا قايتا جوندەۋدەن ءوتىپ, سونداي-اق كورۋ قابىلەتى ناشار جانە زاعيپ جاندارعا ارنالعان ارنايى كىتاپحانا عيماراتى قاجەتتى قۇرال-جابدىقتارمەن تولىقتىرىلدى. بۇل باستامالار اقپاراتقا قولجەتىمدىلىكتى كەڭەيتىپ, كىتاپحانالىق كەڭىستىكتەردىڭ جايلىلىعىن ارتتىردى.
