سۋرەتتى تۇسىرگەن – ۆالەري بۋگاەۆ
ناۋرىز مەرەكەسى قارساڭىندا وبلىس تۇرعىندارى ەستاي اتىنداعى مادەنيەت سارايىندا الەمدىك وپەرا جۇلدىزى ماريا مۋدرياك پەن «استانا بالەت» تەاترى سيمفونيالىق وركەسترىنىڭ كونتسەرتىن تاماشالادى.
باعدارلامادا يتاليالىق وپەرا, اۋستريالىق وپەرەتتانىڭ رومانتيكا جانە يسپانيالىق سارسۋەلا جانرىنداعى ۇزدىك شىعارمالار ورىندالدى.
– ماعان ءوزىم تۋىپ-وسكەن پاۆلودارىمدا كونتسەرت بەرۋگە مۇمكىندىك بەرىلگەنىنە وتە قۋانىشتىمىن. سونداي-اق «استانا بالەت» تەاترىنا وزدەرىنىڭ سيمفونيالىق وركەسترىمەن بىرگە ونەر كورسەتۋگە تاعى ءبىر مۇمكىندىك بەرگەنىنە العىسىمدى بىلدىرەمىن. بۇگىن ساحنادا ەڭ اۋەلى ءوز رەپەرتۋارىمداعى شىعارمالاردى ورىندادىم. موتسارت پەن ۆەرديدەن جانە مەرەكەلىك كوڭىل كۇي سىيلايتىن, جەڭىل اۋانداعى تۋىندىلاردان, ماسەلەن, ارديتي, لەگاردىڭ كومپوزيتسيالارى بار. بۇل وپەرانى سۇيەتىن قاۋىمعا عانا ەمەس, مۇنداي كونتسەرتكە العاش رەت كەلىپ وتىرعان كورەرمەندەرگە دە ۇنادى دەگەن ويدامىن, – دەدى ماريا مۋدرياك.
ونەر يەسى تىڭدارمانداردى الدەبىر ساناتقا ءبولۋ دەگەن ۇعىمنان ادا بولۋ كەرەك ەكەنىن جەتكىزدى. ءبىر ادام با, الدە مىڭ ادام با, باستىسى كەز كەلگەن اۋديتوريادا بارىنشا تاماشا ەتىپ ونەر كورسەتسە, ماقساتىنىڭ ورىندالعانى دەپ بىلەدى ەكەن. ءارى كونتسەرتتە مەيلىنشە كوبىرەك ءان شىرقاعاندى جانى قالايتىنىن, كونتسەرت رەپەرتۋارى داۋىس مانەرىنىڭ قالايشا داميتىنىمەن تىعىز بايلانىستى ەكەنىن اتاپ ءوتتى.
«مەن داۋىسىمدى ۇنەمى باقىلاپ وتىرامىن, سوعان وراي قاي پارتيانىڭ قاي تۋىندىدان كەيىن ورىندالاتىنىن كونتسەرت بارىسىندا جۇرە جوسپارلايمىن. مۇنداي پارتيالاردىڭ سانى وتە كوپ», دەدى ءانشى.
الەمدىك ماماندار ماريانىڭ داۋسىن قازىرگى زاماننىڭ ەڭ ادەمى جانە بىرەگەي داۋىستارىنىڭ ءبىرى دەپ تانيدى. بىرەگەي داۋىس يەسى وپەرا انشىلەرىنىڭ الەمدىك توپ-10-دىعىنا ەنگەن. سوندىقتان مەرەكەلىك كونتسەرتتى پاۆلودار وبلىسىنىڭ عانا ەمەس, ەلىمىزدىڭ دە جارقىن مادەني وقيعاسى بولعانىن ايتار ەدىك.
ايتىپ وتەيىك, ماريا مۋدرياك ءان ايتۋدى ءۇش جاسىنان باستاعان. 5 جاسىندا پاۆلودار قالاسىنىڭ №1 مۋزىكالىق مەكتەبىنە وقۋعا تۇسەدى. ال 13 جاسىندا دجۋزەپپە ۆەردي اتىنداعى ميلان مەملەكەتتىك كونسەرۆاتورياسىنا ءتۇسىپ, «لا سكالا» تەاترىنىڭ قويىلىمدارىنا قاتىستى.
پاۆلودار وبلىسى
