فوتو: ۇكىمەتتىڭ ءباسپاسوز قىزمەتى
ءوڭىر كاسىپكەرلەرىمەن كەزدەسۋ بارىسىندا ولجاس بەكتەنوۆ ۇكىمەت وتاندىق تاۋار وندىرۋشىلەردى جان-جاقتى قولداۋ بويىنشا جۇمىس جۇرگىزىپ جاتقانىن اتاپ ءوتتى. مەملەكەتتىك ساتىپ الۋ سالاسىندا وتاندىق وندىرۋشىلەر تاۋارلارىنىڭ, جۇمىستارى مەن كورسەتىلەتىن قىزمەتتەرىنىڭ تىزبەسى كەڭەيتىلدى, ساتىپ الۋ راسىمدەرى وڭتايلاندىرىلىپ, ۇزاقمەرزىمدى شارتتار جاساۋ تەتىگى ەنگىزىلدى. اوك-تە جەڭىلدىكپەن نەسيە بەرۋ مولشەرى ۇلعايتىلدى, بۇل 2024 جىلى رەكوردتىق جوعارى ونىمدىلىككە قول جەتكىزۋگە مۇمكىندىك بەردى. ەكونوميكانىڭ ناقتى سەكتورىن دامىتۋ ءۇشىن شاعىن بيزنەستى قولداۋدى قامتاماسىز ەتەتىن قارجىلاندىرۋدى كەڭەيتۋ جانە كەپىلدىك قورلارىن قۇرۋ كوزدەلگەن. الداعى بەس جىلدا 13 ترلن تەڭگە ينۆەستيتسياعا ەنەرگەتيكالىق جانە كوممۋنالدىق سەكتورلاردى جاڭعىرتۋ جونىندەگى ۇلتتىق جوبا ىسكە قوسىلدى.
پرەمەر-مينيستر ءبىرىنشى كەزەكتە ەكونوميكالىق الەۋەتى بار باسىم باعىتتاردى دامىتۋ قاجەتتىگىن اتاپ ءوتىپ, كاسىپكەرلەردى مەملەكەتتىك قولداۋ باعدارلامالارىنا بەلسەندى قاتىسۋعا شاقىردى.
«مەملەكەت باسشىسى كاسىپكەرلىكتى دامىتۋ جانە قولداۋ ماسەلەسىن بىرنەشە رەت كوتەردى. ول ءۇشىن ءبىز بيزنەستى جۇرگىزۋگە بارىنشا قولايلى جاعدايلار جاسايمىز. وتكەن اپتادا مەن ەكىنشى دەڭگەيلى بانكتەرمەن كەزدەسۋ وتكىزدىم. ولار ەكونوميكانىڭ ناقتى سەكتورىن قارجىلاندىرۋدى ارتتىرۋعا نيەتتى. سوندىقتان ءبىز سىزدەردەن كەلەشەگى زور جوبالاردى, وركەندەۋدىڭ جاڭا باعىتتارىن جانە ەكسپورت نارىعىن كەڭەيتۋدى كۇتەمىز. مەتالداردى تەرەڭ وڭدەۋ, مۇناي, گاز جانە كومىر حيمياسى, ەنەرگەتيكا جانە ماشينا جاساۋ, تۋريزم سياقتى باسىم باعىتتاردى دامىتۋ قاجەت. بۇل ءونىم ساپاسى مەن كومپانيالاردىڭ باسەكەگە قابىلەتتىلىگىن ارتتىرۋ, جاڭا جۇمىس ورىندارىن اشۋ, حالىقتىڭ تابىسى مەن بيۋدجەتكە تۇسەتىن كىرىسىن ارتتىرۋ تۇرعىسىنان پايدا اكەلەدى», دەدى ولجاس بەكتەنوۆ.
ۇلتتىق ەكونوميكا ۆيتسە-ءمينيسترى باۋىرجان وماربەكوۆ بيزنەس جۇرگىزۋ ءۇشىن جاعدايدى جاقسارتۋ جانە ونى باسىم تۇردە قولداۋ جونىندەگى جۇمىس تۋرالى باياندادى. اكىمشىلىك جۇكتەمەنى ازايتۋ ءۇشىن كاسىپكەرلىك قىزمەتتى «تازا پاراقتان» رەتتەۋ ەنگىزىلدى, 10 مىڭ نەگىزسىز تالاپ قىسقارتىلدى, سونداي-اق تەكسەرۋلەر جۇيەسى وڭتايلاندىرىلدى, بۇل ولاردىڭ سانىن 2019 جىلمەن سالىستىرعاندا ەكى ەسەگە قىسقارتۋعا مۇمكىندىك بەردى. بيىل كاسىپكەرلىكتى كەشەندى قولداۋ باعدارلاماسى اياسىندا 271,1 ملرد تەڭگە ءبولۋ جوسپارلانىپ وتىر. ونىڭ 12,5 ملرد تەڭگەسى پاۆلودار وبلىسى كاسىپكەرلەرىن قولداۋعا باعىتتالادى.
2025 جىلى وڭىردە وڭدەۋ سالاسىندا قۇنى 125,3 ملرد تەڭگەدەن اساتىن بەس جوبانى ىسكە قوسىپ, 1,2 مىڭنان استام جۇمىس ورنى اشۋ جوسپارلانعان.
«بايتەرەك» حولدينگىنىڭ باسقارما توراعاسى رۋستام قاراعويشين كاسىپكەرلىكتى قولداۋ بويىنشا قابىلدانىپ جاتقان شارالار تۋرالى حابارلادى. ماسەلەن, 2025 جىلى كاسىپكەرلىكتى, تۇرعىن ءۇي قۇرىلىسى مەن ينۆەستيتسيالىق جوبالاردى قارجىلاندىرۋ كولەمىن 2027 جىلعا قاراي 10 ترلن تەڭگەگە دەيىن ۇلعايتا وتىرىپ, 8 ترلن تەڭگە باعىتتاۋ جوسپارلانىپ وتىر. ءىرى بيزنەس ءۇشىن – 5 ترلن تەڭگەگە دەيىنگى جوبالاردى قارجىلاندىرۋدى كوزدەيتىن 1,5 ترلن تەڭگەگە دەيىنگى مەملەكەتتىك كەپىلدىكپەن, ال شوب ءۇشىن – قارىز سوماسىنىڭ 85%-نا دەيىنگى كەپىلدىكتەرمەن قامتاماسىز ەتۋگە مۇمكىندىك بەرەتىن كەپىلدىك قورلارى قۇرىلادى. سونىمەن قاتار بانكتەرمەن بىرلەسكەن جۇمىس قاراستىرىلعان.
وتىرىس بارىسىندا مەتاللۋرگيا, اۋىل شارۋاشىلىعى, ساۋدا, قىزمەت كورسەتۋ جانە باسقا دا سالالاردا قىزمەت ەتەتىن كاسىپكەرلەر ءوزارا ءىس-قيمىلدى جاقسارتۋ بويىنشا يدەيالارى مەن ۇسىنىستارىن ءبولىستى.
«اەمز» جشس باس ديرەكتورى مارات احمەتجانوۆ تاريفتىك ساياساتتىڭ ءوڭىردىڭ مەتاللۋرگيا سالاسىنا اسەرى ماسەلەسىن كوتەردى. ول ءىرى جوبالاردى ىسكە اسىرۋدىڭ بارلىق كەزەڭىنە ارنالعان ەلەكتر ەنەرگياسىنا جەڭىلدىگى بار ينۆەستيتسيالىق ءتاريفتى بەكىتۋدى جەدەلدەتۋدى سۇرادى. ونىڭ پىكىرىنشە, بۇل الەمدىك نارىقتاردا ەكسپورتقا باعدارلانعان ءونىمنىڭ باسەكەگە قابىلەتتىلىگىن ساقتاۋعا, قازاقستانعا جاڭا ينۆەستورلار تارتۋعا جانە مەتاللۋرگيا ءوندىرىسىنىڭ ورتالىعى رەتىندە ەلىمىزدىڭ ءيميدجىن نىعايتۋعا مۇمكىندىك بەرەدى.
«ەدىگە شوڭ» جشس باس ديرەكتورى توعجان مۇزاپاروۆ اوك باعدارلامالارىن مىسالعا الا وتىرىپ, جەڭىلدىگى بار پايىزدىق مولشەرلەمەمەن تىكەلەي قارجىلاندىرۋ تەتىگىن ەنگىزۋگە قاتىستى ۇسىنىسىن ايتتى. كاسىپكەردىڭ پىكىرىنشە, بۇل قولداۋ الۋدى جەدەلدەتىپ, كاسىپكەرلەردىڭ قارجىلىق تۇراقتىلىعىن كۇشەيتەدى ءارى بيزنەستى دامىتۋعا قولايلى جاعداي جاسايدى.
«گاليتسكوە» جشس ديرەكتورى الەكساندر كاسيتسين پايىزدىق مولشەرلەمەلەردى تىكەلەي سۋبسيديالاۋدى جانە جىلدىق 6%-بەن «تازالانعان» قارىزدار بەرۋدى قوسقاندا, اگرارلىق سەكتوردى مەملەكەتتىك قولداۋدىڭ ماڭىزدىلىعىن اتاپ ءوتتى. سونداي-اق كاسىپكەر پرەزيدەنتتىڭ ءوندىرىس كولەمىن ۇلعايتۋعا, ءونىم ساپاسىن جاقسارتۋعا جانە ەلىمىزدىڭ ازىق-ت ۇلىك قاۋىپسىزدىگىن قامتاماسىز ەتۋگە مۇمكىندىك بەرەتىن بىرىڭعاي اۋىل شارۋاشىلىعى سالىعىن ەنگىزۋ تۋرالى باستاماسىن قولدادى. سونىمەن قاتار ول ديقاندار كوكتەمگى دالا جۇمىستارىنا ءتيىستى قاراجاتتى تولىق كولەمدە الا باستاعانىن جانە قاجەتتى ججم-نىڭ جارتىسىن جەتكىزگەنىن اتاپ ءوتتى. الدىن الا ەگىسكە قاراجات بولىنەتىن بۇل تاجىريبەنى ۇكىمەت بىلتىر العاش رەت ەنگىزگەن بولاتىن.
«ECO CITY PAVLODAR» جك باسشىسى ماحاببات اناەۆا پاۆلودار وبلىسىندا 56 مىڭنان استام كاسىپكەرلىك سۋبەكتىسى بار ەكەنىن, ولاردىڭ جارتىسى ايەلدەر ەكەنىن اتاپ ءوتتى. ايەلدەر كاسىپكەرلىگىن قولداۋعا باعىتتالعان مەملەكەتتىك باعدارلامالاردىڭ مۇمكىندىكتەرىن كەڭەيتۋ ۇسىنىلدى, بۇل قوعامنىڭ بىرقاتار ماڭىزدى الەۋمەتتىك ماسەلەلەرىن شەشۋگە مۇمكىندىك بەرەدى.
«Fonet Er-Tai AK Mining» جشس باس ديرەكتورىنىڭ مىندەتىن اتقارۋشى ازامات ءالجاپاروۆ پاۆلودار وبلىسىندا قۇنى 9,4 ملرد تەڭگەنى قۇرايتىن كاتودتى مىس وندىرەتىن گيدرومەتاللۋرگيالىق زاۋىتتىڭ قۇرىلىسى تۋرالى حابارلادى. بۇگىنگى تاڭدا كومپانيا گەولوگيالىق بارلاۋ جۇمىستارىن جۇرگىزىپ, ەلەكتر بەرۋ جەلىسى سالىندى. سونىمەن قاتار كاسىپكەر ەكولوگيالىق قۇجاتتاردى كەلىسۋ بويىنشا راسىمدەردىڭ ۇزاقتىعىن اتاپ ءوتتى.
«ەكودوم-پاۆلودار» جشس ديرەكتورى جانە پاۆلودار وبلىسى كاسىپكەرلەر پالاتاسى ايەلدەر كاسىپكەرلىگىن دامىتۋ جونىندەگى سالالىق كەڭەسىنىڭ مۇشەسى مارينا رەيدينا مەملەكەتتىك قولداۋدىڭ, اتاپ ايتقاندا جەڭىلدەتىلگەن نەسيەلەۋدىڭ, سۋبسيديالاردىڭ جانە اكسەلەراتسيالىق باعدارلامالارعا قاتىسۋدىڭ ارقاسىندا ءتورت جىل ىشىندە شاعىن ءوندىرىس ءسۇت ونىمدەرىنىڭ 150-دەن استام ءتۇرىن شىعاراتىن زاماناۋي كاسىپورىنعا اينالعانىن ايتتى.
تالقىلاۋ قورىتىندىسى بويىنشا پرەمەر-مينيستر پاۆلودار وبلىسىنىڭ اكىمدىگىنە, ۇلتتىق ەكونوميكا مينيسترلىگىنە جانە باسقا دا مەملەكەتتىك ورگاندارعا «اتامەكەن» ۇلتتىق پالاتاسىمەن بىرلەسىپ ايتىلعان ۇسىنىستاردى پىسىقتاۋدى تاپسىردى.
