فوتو: كوللاجدى جاساعان –زاۋرەش سماعۇل, «ەQ»
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, جىل باسىنان ەلگە قانداستاردىڭ 46,4% – قىتايدان, 41% – وزبەكستاننان, 7,1% – تۇرىكمەنستاننان, 1,9% – رەسەيدەن, 1,6% – مونعوليادان جانە 2% باسقا ەلدەردەن كەلگەن.
«وسى جىلعى 1 ناۋرىزداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 60,8%-دى, كامەلەتكە تولماعاندار 30,8%-دى جانە زەينەتكەرلەر 8,4%-دى قۇرايدى. ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 16,8%-ى جوعارى ءبىلىمدى, 30,7%-ى ورتا كاسىبي ءبىلىمدى, 50,8%-ى جالپى ورتا ءبىلىمدى جانە 1,7%-ىنىڭ ءبىلىمى جوق», دەلىنگەن حابارلامادا.
ەتنيكالىق قازاقتار ەلىمىزدىڭ ءتۇرلى وڭىرلەرىنە قونىستانعان. ولاردى ورنالاستىرۋ ءۇشىن ەڭبەك كۇشى تاپشى اقمولا, اباي, قوستاناي, پاۆلودار, اتىراۋ, باتىس, شىعىس جانە سولتۇستىك قازاقستان وبلىستارى بەلگىلەنگەن.
«قونىستاندىرۋ وڭىرلەرىندە 2025 جىلعا ارنالعان قانداستاردى قابىلداۋ كۆوتاسى 2 309 ادامدى قۇرايدى. 2025 جىلعى 1 ناۋرىزداعى جاعداي بويىنشا قونىستاندىرۋ وڭىرلەرىنە 389 قانداس قونىس اۋداردى. جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى – ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (275,2 مىڭ تەڭگە) مولشەرىندە; تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (59-دان 118 مىڭ تەڭگەگە دەيىن) مولشەرىندە», دەپ حابارلادى مينيسترلىكتىڭ ءباسپاسوز قىزمەتى.
ايتا كەتەيىك, جىل باسىنان بەرى 84 قانداسقا ءتۇرلى قولداۋ شارالارى كورسەتىلىپ, 56 ادام تۇراقتى جۇمىسقا ورنالاستىرىلعان.
سونىمەن قاتار, قونىستانۋشىلارعا تۇرعىن ءۇي ساتىپ الۋ, سالۋ نەمەسە يپوتەكالىق قارىزدىڭ باستاپقى جارناسىن تولەۋگە ەكونوميكالىق ۇتقىرلىق سەرتيفيكاتى بەرىلەدى. بۇل سەرتيفيكات تۇرعىن ءۇي قۇنىنىڭ 50%-ىن نەمەسە ءبىر وتباسى ءۇشىن 4,56 ملن تەڭگەگە دەيىنگى سومانى وتەۋسىز جانە قايتارىمسىز نەگىزدە جابۋعا مۇمكىندىك بەرەدى.
